ازاي تشتري افضل بطانية للبيبي لحمايته في الشتاء؟
مع بداية فصل الشتا أكيد الحصول على بطانية للبيبي من أهم الخطوات اللي لازم تكوني مستعدة لها. لكن في نفس الوقت مش كل الأنواع ممكن تكون ومناسبة وصحية للبيبي. علشان كده النهاردة هنقولك على اهم مواصفات لازم تتدوري عليها وكمان الأنواع اللي لازم ما تشتريهاش.
ازي تختاري أفضل بطانية لطفلك
بطانية البيبي من أكثر الحاجات اللي هتكون متصلة بطفلك في فصل الشتاء. لذلك لازم تكوني متأكدة من اختيار خامة صحية تماما، وفي نفس الوقت تتأكدي من إنها قادرة تدي طفلك التدفئة المطلوبة. علشان كده دي أهم حاجات لازم تتأكدي منها وانت بتشتري البطانية.
للمزيد: منتجات الرضع المهمة في الشتاء
المواصفات المطلوبة
- خامة البطانية لازم تكون ناعمة على الطفل. لذلك البطاطين المصنوعة من القطن بتعتبر أكتر الأنواع الصحية للأطفال، لأنها ناعمة على بشرته وفي نفس الوقت بتديه التدفئة المطلوبة.
- لازم البطانية تكون قابلة لتمرير الهواء للطفل. وعلشان تتأكدي منها ممكن تضعيها قدام مروحة وتجربي هل الهواء قادر يمر من خلالها ولا لأ. والنوع ده مهم علشان الهوا يدخل للطفل بشكل طبيعي لأنه ما ينفعش يكون نايم ومافيش أي هوا واصل لجسمه.
- من المهم إنك تتأكدي إن البطانية مناسبة لحجم وعمر طفلك. لأنك ممكن تحتاجيها علشان تلفيه جواها وتحميه من البرد. لو كانت البطانيه حجمها مش بيغطي الطفل كويس ويلفه فانت أكيد محتاجة تحصلي على واحدة أكبر.
اقرأي ايضا: كيف نتأكد من تدفئة الرضيع في الشتاء؟
المواصفات غير المطلوبة
على جانب آخر لو لاقيتي المواصفات الجاية في البطانية فده معناه إنها غير مناسبة لطفلك وممكن تعرضه لمشاكل كتير. أما أهم المواصفات اللي لازم تبعدي عنها فهي:-
- ابعدي عن النوع اللي بيحتوي على فرو كثير وكثيف، لأن النوع ده من البطاطين ممكن يمنع تنفس الطفل وممكن الفرو يدخل عن طريق الفم أو الأنف.
- تجنبي الأنواع الثقيلة والناعمة في نفس الوقت، لأن من السهل إن طفلك يشدها على وجهه وبالتالي تعرضه لخطر الاختناق.
- ابعدي عن الأنواع المصنوعة من الستان أو المواد الصناعية، لأنها بتساعد على زيادة درجة حرارة جسم الطفل وممكن تعرضه لخطر الطفح الجلدي او مشاكل للجلد الحساس.
- تجنبي الأنواع اللي بتحتوي على شرائط أو أزرار لأنها ممكن تعرض الطفل لخطر الاختناق أو بلع الإكسسوارات.
ازاي تختاري حجم البطانية المناسب
بالتأكيد اختيار الحجم المناسب لبطانيات الأطفال أمر محير جدا لأنهم بينموا بشكل سريع. لكن عادة فمتوسط الحجم بيكون حوالي 34*46 بوصة. وكمان حجم البطانية بيختلف على حسب استخدامها:-
- بالنسبة لبطانية الطفل حديث الولادة في أول يوم فحجمها المناسب يتراوح ما بين 18 إلى 36 بوصة وعادة ما بتكون مربعة.
- ولو البطانية حتستخدم لتغطية الطفل في السرير فحجمها يتراوح مابين 36 × 54 بوصة إلى 45 × 60 بوصة. لكن بينصح بعدم استخدام النوع ده من البطانيات للأطفال أقل من عام.
للمزيد: نصائح أساسية لوقاية الرضع من نزلات البرد
.
