4 نصائح للتوفير عند شراء سرير الأطفال

أول ما تقرري إن طفلك يكون ليه سرير منفصل يبقى لازم تشتري سرير الأطفال المناسب. أكيد فيه مواصفات أمان مهمة لازم تتوفر فيه علشان تحمي طفلك. لكن في نفس الوقت ازي توفري وما تدفعيش فلوس كتير وتحصلي على سرير بجودة عالية؟ ده السر اللي هنقوله لك النهاردة.

نصائح للتوفير عند شراء سرير الأطفال

أولاً الأمان والمتانة والقوة من أهم المواصفات اللي لازم تتوفر في سرير الأطفال ودي العوامل الأساسية اللي هتبني عليها اختيارك. بعد كده الإرشادات اللي هنقولها هتساعدك علشان تلاقي السرير بأفضل سعر وتقلل المصروفات المتعلقة بيه.

اختيار سرير له حجم قياسي

الحجم القياسي المتداول والمشترك في كل أسرة الأطفال يعتبر خيارك الأفضل. لأن ده معناه إنك مش هتكوني مقيدة بشراء المرتبة المخصصة له أو مرتبة من نوع معين. لكن المرتبة المناسبة ليه هتلاقيها متوفرة وبأسعار وخامات مختلفة ومناسبة للميزانية الخاصة بيكي.

كذلك السرير بالحجم القياسي هيكون مناسب لطفلك ولنموه ومش هتكوني محتاجة تغيريه لسنوات كتيرة على عكس الأسرة اللي لها حجم صغير.

هل انت في حاجة إلى سرير فقط؟

هل غرفة الطفل فيها دولاب ووحدات تخزين وأدراج وأرفف؟ إذا كانت الإجابة بلا فده معناه إنك في حاجة لشراء كل المستلزمات دي، وده برضه معناه إنك هتضاعفي ميزانيتك أكتر من مرة. لكن ليه ما تفكريش بطريقة عملية وموفرة؟

في الحالة دي شراء سرير بيحتوي على وحدات تخزين أو أدراج وفتحات هيكون موفر جدا، وكمان هيكون عملي وموفر في المساحة. ممكن تقولي إن سعره هيكون أغلي من السرير العادي، لكن السعر العالي ده لو قارنتيه بشراء كل وحدة على حدى أكيد هيبقى موفر جدا.

للمزيد: بالصور ..أفكار غرف نوم اطفال للأولاد والبنات

خذي وقت قبل الشراء

من المهم إنك تقومي بعملية بحث دقيقة قبل اختيار سرير الأطفال. ابدأي في البحث على المواقع المختلفة من خلال التصنيفات المناسبة للسعر والميزانية الخاصة بيكي. ممكن تلاقي فرص وعروض وممتازة وهتقدري تقارني بين جودة الأنواع المختلفة وإمكانيتها وبين الأسعار.

شراء المستعمل والتوفير

شراء الأثاث أو أسرة الأطفال المستعملة مفيد ليكي وللميزانية. أهم شيء تتأكدي أن الخشب سليم وإن السرير متماسك ومتوازن. شراء المستعمل مش معناه إنك بتشتري سلعة غير جيدة، لكن في عائلات جديدة بتحب تعمل تجديد كل فترة قصيرة أو بتستخدم الأثاث بحرص شديد وبالتالي بيكون محتفظ بجودته خاصة لو كان من البراندات المعروفة. علشان كده ابحثي في المستعمل وخاصة في المواقع الموثوقة أو عند الأشخاص اللي جربتي شراء مستلزمات مستعملة من خلالهم.

كذلك ممكن تبحثي وسط دائرة الأصدقاء عن أشخاص محتاجين يجددوا غرف الأطفال وتشتري منهم سرير مناسب وهنا هيكون له سعر مناسب لميزانيتك تماما وفي نفس الوقت هتكوني ضامنة جودته وأمانه لأطفالك.

للمزيد: ما هو النوم الآمن للرضيع؟ وكيف أختار السرير الأفضل له؟.