لكل ماما حامل..ازي تجهزي شنطة الولادة في الشتاء

أي ماما حامل في الشهور الأخيرة وهتولد في فصل الشتاء لازم تفكر كويس في مكونات شنطة الولادة. لأنها لو ما جهزت كل الملابس والمنتجات اللي هتحتاجها ممكن يكون أول وقت لها مع البيبي مرهق ومتعب جدا. لذلك النهاردة هنقولك إيه أهم حاجة لازم تكون موجودة في شنطة الولادة الشتوية.

لو ماما حامل تجهز إيه للشتاء؟

كل ماما حامل بتفكر ازي تحمي البيبي من كل حاجة ممكن تأثر عليه، خصوصا البرد. وده معناه إنك هتحضري مستلزمات مختلفة عن اللي بتحتاجها الأم في فصل الشتاء أو الخريف. وأهم المستلزمات الشتوية هتلاقيها في القائمة الجاية.

بالطو شتوي

أول شيء يكون جاهز معاكي للحظة الولادة هو بالطو شتوي تقيل. لأنك لو معتمدة على الولادة الطبيعية فأكيد هتكوني محتاجة تلبسي حاجة سريعة وسهلة للحظة دي. لكن مش ده الأهم، بعد الولادة هيبدأ جسمك يشعر بالبرد بسهولة، علشان كده البالطو مهم للحظة خروجك من المستشفى علشان ما تحسيش بالبرد.

الجوارب الثقيلة

على حسب الوقت اللي هتقضيه في المسشفي جهزي عدد مناسب من الجوارب الثقيلة ليكي وللبيبي. لأن بعد الولادة جسمك هيحتاج وقت علشان الدورة الدموية ترجع لطبيعتها، وبالتالي الدم مش بيوصل بشكل جيد للأطراف. لذلك لازم تضمني التدفئة من خلال جوارب ثقيلة.

أما بالنسبة للبيبي فجسمه بيكون لسة مش قادر يعادل درجة حرارته مع درجة حرارة البيئة المحيطة به. وحتى لو كانت غرفته في المستشفى مجهزة بوسائل التدفئة، من الأفضل إنك تدفي رجله بشراب صوف خفيف.

طاقية الراس

جهزي طاقية راس خفيفة ليكي، وواحدة مناسبة لطفلك. الطواقي المصنوعة من القطن بتكون الأفضل للرضع لأنها بتساعدهم على الاحتفاظ بدرجة حرارة جسمهم وبتقلل الشعور من البرد. لكن لو هتختاري طواقي من الصوف لازم يكون صوف خفيف وناعم وقابل للتنفس علشان ما يكونش خشن على جلد البيبي.

روب ثقيل

أثناء تواجدك في المستشفى ممكن تحتاجي للحركة من سريرك للحمام أو لمكان وجود الطفل. لذلك وجود روب معاكي هيقلل تعرضك لصدمات الهوا. وفي نفس الوقت هيسهل عليكي ارتداء ملابس بسيطة تسهل الرضاعة. لأن لبس طبقات كثيرة من الملابس هيكون سبب في عدم شعورك بالراحة خاصة لو الولادة كانت قيصرية.

مرطب للشفاه

ما تنسيش أهم حاجة في شنطة الولادة في الوقت ده وهو مرطب الشفاه. لأنك خلال الولادة الجسم بيفقد سوائل كثيرة، علشان كده بتكوني معرضة لجفاف الجلد، ومع البرودة ممكن تزيد حالة جفاف الجلد وتوصل للشفاه وهتحسي إن شفافيك جافة جدا وملتهبة. علشان كده جهزي المرطب معاكي علشان تحمي نفسك من الالتهاب أو تشقق الشفاه.

بطانية خفيفة

من المهم إن يكون معاكي بطانية صغيرة للبيبي في المستشفى وكمان علشان تحميه من البرد وقت عودتك للمنزل. 

للمزيد:8 أساسيات أوعي تنسيهم في شنطة الولادة

الوقت المناسب لتحضير شنطة الولادة

سواء كانت ولادتك طبيعية أو قيصرية فمن المهم إنك تحضري شنطة الولادة قبل الميعاد المحدد بحوالي 3 أسابيع. الوقت ده هيساعدك تحصلي على منتجات أفضل بأسعار مناسبة ليكي. لكن تحضير شنطة الولادة قبلها بأيام قليلة ممكن يجبرك تشتري منتجات غير مناسبة نتيجة الاستعجال. كمان في حالات الولادة بتم فيها قبل الميعاد، فالاستعداد أفضل كتير وهيريحك جدا.

أهم مستلزمات شنطة الولادة

بعد ما تعرفنا على أهم المستلزمات اللي اي ماما حامل لازم تجهزها في شنطة الولادة في الشتاـ دلوقتى هنتعرف سوا على قائمة المسلتزمات المهمة اللي لازم تكون في أي شنطة ولادة.

بالنسبة للأم

• البطاقة الشخصية.
• بطاقة التأمين الصحي.
• الأوراق الخاصة بحالتك الصحية والأشعة والتحاليل الأخيرة للحمل.
• كل الروشتات الطبية للادوية اللي بتحصلي عليها.
• الأدوية.
• فستان أو بيجامة لوقت الولادة.
• أدوات النظافة الشخصية والاستحمام.
• الملابس الداخلية.
• فوط صحية.
• كريم مضاد لالتهاب الحلمات.
• فوط الرضاعة الصحية.
• كريم مرطب للجسم.
• كتاب أو مشغل موسيقى لو هتكوني في المستشفى لوقت طويل.

أدوات خاصة بالطفل

• الملابس الخاصة بالطفل للعودة للمنزل.
• ملابس داخلية.
• سالوبيت.
• بطانية خفيفة وطاقية وجوارب.
• زجاجة الرضاعة.
• حفاضات.
• قماط أو بطانية استقبال.

للمزيد: لكل ماما حامل..ازي تجهزي شنطة الولادة في الشتاء

 .