عزومة حماتك في رمضان..ازاي تبهريها
العزومات في رمضان من أكثر الحاجات اللي أي ست بيت بتعمل حسابها. لكن عزومة حماتك بيكون لها حسابات تانية خالص. لأن العزومات دي بيكون هدفها الحصول على الرضا التام والسلام والوئام. كذلك ولأننا في رمضان احرصي إن نيتك تكون إكرام ضيفتك ومد حبال الود الصادق معاها.
كذلك زي ما في علاقات غير طيبة مع الحماة، لكن برضه في علاقات تستحق إننا نديها مجهود وتعب علشان نقويها ونخلي الرابطة الأسرية مابينا كلها محبة وخير. لذلك ازي تجهزي العزومة اللي ترضي حماتك بيها وتخليها تحبك.
نصائح لتجهيز عزومة حماتك في رمضان
في خطوات هتساعدك إنك تخلي عزومة حماتك يوم رائع جداً. هتخرج منه وهي بكامل السعادة، وتقول بعدها إنها حست إنها في بيت بنتها. ولو عملتي الحاجات الجاية بصدق وحب هتلاقي شعورها ناحيتك بقى أحلى وبقى شعور طيب جداً.
توجيه الدعوة
أفضل حاجة إنك توجهي الدعوة ليها بنفسك، ما تخليش جوزك هو اللي يبدأ بتوجيه الدعوة لأنها عايزة تحس إنها منك. كذلك ما تححديش انت اليوم، سيبيلها هي حرية الاختيار. بمعنى انك تقولي الجملة بالترتيب ده “أنا مستنية حضرتك تفطري يوم معانا..ياترى اليوم المناسب ليكي إيه؟”..
أما لو عايزة تحددي انت اليوم نتيجة لمشاغلك أو ارتباطك بعزومة تانية، فممكن لو قالت يوم مش مناسب ليكي، تخلي الحجة على جوزك، مثلاً، قولي لها بلاش اليوم الفلاني لأن جوزك مرتبط بشغل وهينزل على طول. كمان ممكن تديها أكثر من خيار للأيام المناسبة.
تحضير الفطار
طبعاً انت ممكن تعملي أصناف كثيرة وماتعجبهاش، لأن الناس الكبيرة بيكون ليهم طريقة تفكير معينة. لذلك وانت بتوجهي الدعوة اسأليها إيه أكثر صنف بتحبه علشان تجهزيه. كمان لو عايزة تكسبيها في صالحك أكثر جهزي الصنف بالطريقة اللي هي بتحبها.
طبعاً مش هنوصيكي بلاش كلام عن الدايت والأكل الصحي لو هي مش بتحب الحاجات دي. اكسري قاعدتك في اليوم ده، وقدمي الحاجات اللي من وجهة نظرها تكون أحسن حاجة.
كذلك في نقطة مهمة جداً، وهي إنك تقومي بتحضير أكبر جزء من الأكل قبلها بيوم. علشان يوم العزومة تكوني مش مشغولة وشكلك مش مرهق.
تفاصيل اليوم
اليوم أكيد مش فطار وبس، في حاجات وتفاصيل تانية مهمة ومنها:-
- من المهم إنك وقت الأكل تبيني ترجيب بيها، وانك سعيدة لأنها عندك.
- لو حماتك طلبت تدخل المطبخ تساعدك، ما تبينيش إنك متضايقة ومش عايزاها تقتحم مطبخك. لكن بالعكس اعتبري إن مامتك بتساعدك، وخليها تعمل الحاجة بطريقتها. في الآخر ده يوم وهيعدي مش هيكسر قواعد الكوكب.
- وقت تحضير السفرة اهتمي إنها تختار المكان اللي تحب تقعد فيه.
- طبعاً بعد الأكل ومن أهم قواعد الذوق إنك ما تنشغليش عنها بالتليفون أو الإنترنت.
- لو حماتك بتتفرج على مسلسل معين خليه واوعي تغيريه علشان المسلسل اللي انت عايزاه، لأنها في النهاية ضيفة ولازم تحسسيها إنها في مكان الكل فيه بيرحب بيها.
