هل ضرب الطفل لنفسه يدل على مشكلة نفسية خطيرة؟

الغضب والعياط جزء أساسي من رحلة نمو الطفل، لأن كل طفل بيكون عنده احتياجات أو آلام ومش بيلاقي طريقة يعبر بيها غير الغضب. لكن العياط، أو البكاء، أو حتى توجيه الغضب للآخرين كلها أمور طبيعية بدرجة كبيرة، ومع التصرف الصحيح هنقدر نساعده يطور من سلوكه لسلوك أفضل.

لكن ضرب الطفل لنفسه أثناء العياط أو الغضب أو الرغبة في التعبير عن الذات، هل ده سلوك طبيعي؟. ولا السلوك ده محتاج نفهمه بشكل أفضل؟ ويا ترى إيه التصرف السليم في الحالة دي؟

أسباب ضرب الطفل لنفسه

ممكن ضرب الطفل لنفسه يحصل بشكل عابر ويتكرر مرة أو اتنين، وهنا بيكون الأمر طبيعي. لكن لو الفعل ده اتكرر فأكيد بيحصل لسبب معين. وعادة أكثر الأسباب لحدوث المشكلة دي بتكون للآتي:-

عدم القدرة على التعبير والتواصل

أحياناً بيكون الطفل مش قادر يتواصل بين الحاجة اللي هو حاسس بيها وبين قدرته على التعبير عنها. زي مثلاً إنه يكون حاسس بالغضب أو الخوف، ولأنه مش قادر يقول أنا خايف، أو غضبان نتيجة لصغر سنه. كذلك نتيجة لأنه ماتعلمش كل الكلمات الخاصة بالمشاعر فهنا بيبدأ يعبر عن الغضي بتوجيه الضرب لنفسه. لكن برضه ممكن يكون الغضب من عدم قدرته على التعبير سبب أساسي لضرب الطفل لنفسه خلال العياط.

بيحاول يهدي نفسه

في المراحل العمرية المبكرة للطفل بيحاول دايماً إنه يكتشف الحواس الخاصة بيه، عشان كده لحظة الألم أو الغضب أو محاولة تنبيه الأم لشيء بيبدأ إنه يحسسها لنفسه عن طريق الضرب أو استخدام حواسه. الأمر ده طبيعي ومع الوقت يقدر يطور السلوك ده.

اقرأي أيضأ/ اعراض قصور الغدة الدرقية وعلاقتها بمشاكل النمو

لفت الانتباه

الأطفال أشخاص نرجسية في بدايتها، وبيحبوا دايماً يكونوا محور الاهتمام والجذب. لذلك ممكن يبدأ إنه يلفت نظر الأم أو الأب من خلال القيام بسلوك الضرب. ولو في المرة الأولى لقى إن طريقته بتنجح وإنك ضحكتي أو كنت متعاطفة معاه فللأسف هيفضل يكرره. 

ومشكلة السبب ده إن بالطبع كل أم هتنتبه وتحاول تمنعه من ضرب نفسه. لكن هنا هيوصل للطفل شعور أنه نجح في جذب الانتباه. لذلك لازم تمنعيه من الإيذاء لكن من غير ضحك أو مكافأة، لازم يفهم إنك بتحميه لكن في نفس الوقت رافضة سلوكه.

تقليد الكبار

من الأسباب اللي ممكن تخلي الطفل يلجأ للأسلوب ده هو تقليده للكبار، مجرد إنه بيشوف حد بيقوم بيه فبيقرر يستخدمه في لحظة الغضب. لذلك لازم نهتم جداً ونخلي بالنا من أي سلوك بنقوم بيه قدام الأطفال.

الشعور بالألم

أحياناً الطفل بيلجأ للسلوك ده نتيجة لشعوره بألم عضوي، وعلشان هو مش قادر يحدد طريقة التعبير عن الألم، ومش قادر يشاور عليها بيلجأ لضرب نفسه، وده بيكون بشكل شائع عند الأطفال الرضع.

المصدر: Why Do Toddlers Hit Themselves in the Head?

ازاي نمنع الطفل من ضرب نفسه؟

بالرغم إن الأسباب اللي فاتت مش بتعتبر عن مشكلة نفسية خطيرة، إلا إننا لازم نتعامل معاها ونحلها عشان نقدر نمنع الطفل من تكرارها. ونقدر نعمل ده من خلال الخطوات دي:-

الحماية من إيذاء النفس

أول خطوة لازم تهتمي بيها لو طفلك كرر السلوك ده هو حمايته من إيذاء نفسه. وده إنك تشيلي أي حاجة في محيطه ممكن يستخدمها في ضرب نفسه. كذلك ابعديه عن الحائط أو عن أي أسطح ممكن يخبط راسه فيها.

كمان لو كان بيتخدم قبضة إيده في الضرب امسكيها بهدوء وامنعي من ضرب نفسه. لكن ما تحاوليش تستخدمي العنف، اتعاملي مع الموقف بهدوء تام.

اتكلمي بهدوء

ما تبدأيش بتوضيح رفضك للسلوك. لكن ابدأي بكلمات بسيطة تساعده على الهدوء. زي أنا هنا، ما تخافش، أنا هساعدك، أنا بحبك. لما يبدأ الطفل في الهدوء تقدري توضحي له إنك رافضة سلوكه تماماً.

مساعدته على التعبير

وصلي للطفل إنك محبطة من فعله وإنك زعلانة منه، بعد كده حاولي تفهميه معنى شعوره بشكل غير مباشر. على سبيل المثال قوليله “أنا عارفة إنك غضبان، أنا متأكدة إنك حاسس بخوف، أنا حاسة بالألم أو رغبتك في الشيء” المصطلحات دي بتحفز الطفل على استخدامها للتعبير بدل الضرب. 

علاج مصدر الالم

لو كان الطفل بيركز الضرب على مكان واحد، حاولي تعرفي مكان الألم، وحددي من خلال الأعراض الثانية المشكلة. لو حاسة بوجود ألم لكن مش قادرة تحددي مشكلة طفلك هنا هيكون التوجه للطبيب هو أفضل حل.

المصدر: Why Does My Toddler Hit Himself

علامات تستدعي القلق

في بعض الأحيان ممكن يكون إيذاء الطفل لنفسه مصاحب لمشكلة ثانية أكثر خطورة. لذلك لو لاحظتي الأعراض الجاية لازم تعرضي إبنك على طبيب متخصص.

• لو الطفل بيضرب نفسه بشكل منتظم، وبيكون الضرب غير مصاحب لسبب من أسباب الغضب.
• في حالة تسبب الضرب لإيذاء بدني زي الجروح أو الكدمات.
• لو كان الطفل مصاب بتأخر الكلام.
• في حالة ملاحظة الأم والأب إن الطفل بيضرب نفسه بشكل غير طبيعي، أو شكهم في وجود مشكلة ثانية.

للمزيد:  الطفل العنيد وطرق مختلفة للتعامل معه وكيف نعاقبه؟.