التجربة الجهنمية
اللي يضربك إضربه
الأم هتفضل تحاول تخلي ولادها ياخدوها حقهم بالعقل..بس لو الاب قال “اللي يضربك إضربه”..النهاردة موقف في منتهى الكوميديا بتحكيه لينا الكاتبة رانيا كمال العربي.
اللي يضربك إضربه
اسوأ حاجة لما بنتك تيجى تقولك ان صحبتها ضربتها. لأن ساعتها بتدخلى فى صراع بين انك عايزة بنتك تاخد حقها ومحدش يزعلها وبين انك مش عايزاها تكون عنيفة!!.
_مامي صحبتي ضربتني.
_ معلش ياحبيبتي.
_وقالتلي كلمه وحشة.
_الكلمة هتلف تلف وترجع لها.
_ وأخدت حاجات من شنطتي.
_ خلاص قولي للمس.
_ قولتلها معملتش حاجه.
_ خلاص انا هكلم مامتها.
_ماهي مامتها مش هتعمل حاجة
_ هتروح من ربنا فين؟.
_انا هقول لبابي.
_ لا أبوس إيدك متجيبيش سيرة لبابي وهجيب لك اللبس التنكري بتاع فروزن اللي إنتي بتحبيه.
_ لا مليش دعوة هقول لبابي.
_يومين مش هنعمل الهوم ورك وهفسحك وهوديكي تشيكي تشيز( اياكش يطمر).
برضه هقول لبابي
تاني يوم صاحيه من النوم علي صوت همس خفيف؟؟ إيه ده هو محمد راح فين؟؟ شكله بيتكلم في التليفون وبيكلم مين الفجر؟؟؟؟ وموطي صوته كده ليه أنا بدأت أتوغوش. لكن لاقيت جوزي وبنتي عاملين إجتماع مجلس إدارة الساعه خمسه الفجر!! وسمعته بيقولها:
_بصي ياحبيبتي أول ماتشوفي صحبتك تبوسيها وتقولي لها أنا جبت لك هدية تعالي أوريها لك برة الفصل. وأول ماتطلعوا تقومي مدياها كف علي وشها وتطلعي تجري.
– (يالهوي الراجل بيدربها علي دور محمد رمضان في نسر الصعيد).
_ولو جات كلمتك تاني ماتسكتيش إديها قلم تاني علي الناحية التانية (ياضنايا يابنتي ).
_ولو المس سألتك قوليها ما حضرتك مجبتيش حقي!!!.
– ( انا عايشه وسط عصابة ولاإيه إسترها معانا يارب).
وفجأة جوزى بينده عليا _نعم يا حصب الله قصدي يا سي محمد _ عايزين نفطر _ اه طبعا لازم تفطروا عشان تعرفوا تخططوا كويس ماأنتوا عصابة !!
_بابا أنا كمان واحد صحبي شتمني.
_ قالك إيه؟
_ قالي يا خاااااء _ روح قوله انت اللي خاء وستين خاااااء.
_ياسيدي كان بيقولك وخر وخر بالسعودي يعني وسع شوية مفيهاش حاجة يعني وبعدين ماالطيب أحسن.
_ماهو محدش بيجيب حقنا
– قولوا للمس.
_المس مش بتعمل حاجة _لازم ياخدوا حقهم.
_ ياخدوه بس بالعقل.
_بالعقل ازاي لازم يبقي ليهم هيبة وشخصية والفصل كله يخاف منهم (جوزي متعصب).
_يخافوا منهم ليه هما داخلين ماتش مصارعة حرة !!( انا بحاول أكون عاقلة).
_ لازم يتعملهم حساب مدام المس مش بتجيب حقهم!!( جوزي متعصب تاني).
_ المس هتعمل إيه ولاإيه بس؟؟ الله يكون في عونها .. احنا نقدم شكوى للمديرة نفسها لكن بلاش نرد العنف بالعنف ( أنا بحاول أكون عاقلة تاني).
لا بقى عقل مين
_علي فكرة يابابي المس قالتلي انتي أمورة أوي وشبه باباكي.
_ والله المس دي بتفهم أنا كده إتطمنت علي مستوي المدرسه( جوزي اللي كان متعصب).
_ نعم ياختي بتقولك إيه( أنا اللي كنت عاقلة!!).
_بتقولي أمورة زي بابي.
_طب أنا جاية لها المس دي.
_ الطيب أحسن يامامي.
_ لا طيب ده مات وإنتحر.
_خدي حقك بالعقل.
_ وانتوا خليتوا فيا عقل !!! ده أنا أهبل منكم بس متنسوش تجيبوا لي عيش وحلاوة ..
بقلم الكاتبة: رانيا كمال العربي
للمزيد: ماما زمانها نايمة
.
