بالصور 6 أفكار مجنونة لأشكال الحلويات في حفلة رأس السنة
حفلة رأس السنة من أجمل الحفلات اللي كلنا بننتظرها. ولأن الاحتفال مع الأولاد له طعم تاني لازم نحاول نسعدهم بكل الطرق. ممكن السنة يكون ما فيش خروج أو حفلات برة البيت. لكن ده ما يمنعش إننا ممكن نحول البيت لأجمل مكان للاحتفال. طب إزي؟ ده اللي هنعرفه النهاردة.
أفكار مختلفة لتقديم حلويات حفلة رأس السنة
جهزي ركن صغير في البيت وعليه شجرة الكريسماس. طب هتحطي إيه في الركن ده؟ هنجهز مجموعة من الحلويات الصحية لكن في نفس الوقت مجنونة ولها علاقة بكل أيقونات رأس السنة. طب دي نعملها إزاي؟ هنعرف سوا مع بعض. لكن الأهم إن كل حاجة هتلاقيها مشروحة بالظبط في الصورة.
حلويات مجنونة في حفلة رأس السنة
توست على شكل سانتا
ممكن نجهز قطع من التوست على شكل بابا نويل، شكلها هيكون رائع وهي تعتبر حلوى صحية جداً. أما طريقة إعدادها سهلة جداً جداً.
- حضري التوست وعليه زبدة الفول السوداني.
- قطعي الموز والفراولة لشرائح زي اللي موجودة في الشكل.
- اصنعي وجه سانتا من شرائح الموز، أما القبعة فمن قطع الفراولة.
- بالنسبة للعينين والأنف ممكن نستخدم حبات من التوت الأحمر والأسود.
رجل الثلج بحلوى الأوريو
كل الأطفال مغرمين بشكل رجل الثلج. لكن الأهم هو إنهم بيعشقوا حلوى الأوريو. عشان كده ممكن تقدمي ليهم حلوى الأورويو على شكل رجل الثلج بالطريقة دي.
- جهزي الجبن الكريمي واخلطيه مع بسكويت الأوريو بعد تفتيته.
- شكل الخليط على شكل كرات وجمديها في الفريزر.
- جزء لون الحلوى الأبيض واخرجي كرات الأوريو من الفريزر واغمسي الكرات فيه.
- جهزي كرات الملبس أو الشيكابون لعمل العين والأنف.
- هاتي بسكويت الأوريو وخليه أعلى الكرة عشان يدي شكل قبعة رجل الثلج زي ما هو واضح في الصورة.
كوكيز رجل الثلج الذائب في حفلة رأس السنة
الكوكيز من الحلويات اللي لا يمكن ننساها في أي احتفال، وعشان تكون مناسبة لحفلة رأس السنة ياللا نعملها على شكل رجل الثلج الذائب.
- حضري قطع الكوكيز وسيبيها عشان تبرد.
- فوق الكوكيز حطي قطعة من المارشميلو بنفس الطريقة الموضحة في الصورة.
- جهزي الحلويات الملونة ووزعيها عشان تخلي الشكل أجمل.
موز على شكل سانتا
دي من أسهل الأشكال اللي ممكن نعملها ونقدمها للأولاد. الموز على شكل سانتا له شكل كوميدي ومحبب جداً. ده غير إننا كده نبقى بنقدم لهم أكل صحي تماماً في اليوم ده. طب نعمل إزاي الموز على شكل سانتا..بسيطة جداً.
- جهزي الموز وقطعيه بنفس الطريقة الموجودة في الصورة. لكن من المهم إنك تحطي الموز في عصير الليمون عشان ما يسودش.
- حضري قطع المارشميلو الفراولة وحبات الشيكوبون.
- هاتي عدد من خلة الشوي الطويلة ورصي عليها الموز والمارشميلو والفراولة بنفس الطريق الموجودة في الصورة.
كب كيك على شكل غزال
الكب كيك يعتبر من أكثر أنواع الحلوى المحببة للأطفال. وعشان تكون من أجمل الحلويات في حفلة رأس السنة، ياللا نخليها على شكل غزال جميل.
- حضري قطع كيك الشوكولاتة.
- جهزي حبات الشيكوبون وبعض قطع البسكويت المملح.
- عجينة السكر باللون الأبيض والأسود.
بعد تجهيز الكب كيك اعملي بالكريم شانتي شكل حلزوني فوق الكيك. ثبتي البسكويت المملح على الجانبين عشان يدي شكل قرون الغزال، واستخدمي عجينة السكر لعمل العين. أما الشيكوبون فاستخدميه لعمل الفم.
حلوى الأوريو على شكل شجرة عيد الميلاد
من أسهل الطرق والغير مكلفة تماماً هي إنك تقدمي مصاصة بشكل شجرة عيد الميلاد. أما كل اللي هتحتاجيه حبات من بسكويت الأوريو. شيكولاتة بيضاء مذابة. رقائق من الشكولاتة لها لون أخضر. أو عجينة السكر بشكل شجرة ونجمة الكريسماس. عصا المصاصة. لكن بالنسبة لطريقة التجهيز فهي سهلة جداً.
- حضري بسكويت الأوريو واغمسي أجزاء منه في الشكولاتة البيضاء. ومن الممكن تغمسيه كله.
- ثبتي عصا المصاصة في منتصف قطعة الأوريو.
- حضري رقائق الشوكولاتة الخضراء أو عجينة السكر وخليها في مقدمة البسكويت زي ما في الشكل.
دي كانت مجموعة من أجمل أشكال حلويات رأس السنة. لكن أهم شيء ممكن يدخل السعادة على قلب الأطفال هو مشاركتهم في صنع الحلويات دي. لذلك حاولي إنك تبدأي الاحتفال معاهم بالتفكير في تحضير الطلبات وبعد كده عمل الأشكال المختلفة.
