في الفلانتين..عايزة هدية ولا حنية؟

مافيش أجمل من الحب والاحتفال بعيد الحب سواء في مصر أو في العالم. وكأي ست في كوكبنا المصون كل واحدة فينا نفسها إن حياتها تكون كلها رومانسية وسعادة. لكن ثانية واحدة كده وخلينا نسأل السؤال المهم. إنت كأي زوجة مصرية إيه اللي يفرق معاكي أكثر، مجرد هدية أو علبة فيها شوكولاته ولا نفسك في أفعال تدوم العمر كله تحسي معاها بالأمان والحب. اكيد كل ست نفسها في حياة مليانة بالحب، والحب أفعال ومواقف وتضحية ومشاركة، ومتهيألي إننا لو سألنا الستات كلها هتقولنا في الفلانتين مش عايزة هدية لكن “قليل من الحنية”.

الفلانتين يوم واحد والحب كل يوم

طبعا لو جالك هدية يوم الفلانتين دي هتكون من أجمل الحاجات اللي بتحصل؟ بس لو جيتي للحق كل ست بيبقى نفسها إن عيد الحب الخاص بيها يكون كل يوم، مش عشان الهدايا، لكن لأن شعور الحب هو ده الشعور اللي بنقضي حياتنا كلنا ندور عليه ونطمن لما يكون موجود. لذلك لو بصيتي على الموضوع هتلاقي جانب تاني كلنا محتاجينه، جانب بعيد عن الانبهار والكلام المعسول، جانب قادر إنه يحولك لست وزوجة سعيدة. مثلا يعني لو الحاجات اللي جاية بتحصل لكل ست لينا هتبقى أيامها كلها عيد حب.

الاهتمام بالتفاصيل الصغيرة

كل ست بتحب إن شريكها يهتم بتفاصيلها الصغيرة البسيطة، وده ممكن يحصل أيام الخطوبة أو الحب الأولانية. لكن بعد الجواز تفاصيلك بتختلف وبتبقى عايزة الشخص اللي معاكي يحس بيها. كل ست بتحلم بالراجل اللي يقدر يفرق بين بصتها وهي تعبانة وبصتها وهي مرتاحة. وكل ست بتتمنى إن شريكها يقدر من نبرة صوتها يفهم هي بتمر بإيه ويفهمها. ساعتها التفاصيل الصغيرة من انت بتحبي إيه وبتكرهي إيه بتتحول من أنت فين وحاسة بإيه. وساعة ما بتلاقي جوزك قدر يشاركك ده بيبقي أهم من مليون هدية فالانتاين.

أحلى رسالة في عيد الحب

ممكن الراجل يبعت رسالة حلوة قوي يوم عيد الحب لحبيبته أو مراته وبعد الرسالة يخلص العيد ويخلص الحب. لكن من ناحية تانية هيكون الانتصار الحقيقي إن رسالة كل يوم وكل ساعة يبقى غرضها المشاركة. رسالة زي انت فين؟ أنا فاضي هاجي أوصلك. ما تعمليش أكل لو تعبانة وناكل بيض مقلي. ارتاحي وأنا هجيب الولاد. الرسالة دي تقدر تحسس أي ست إنها ملكة الكون، والمساعدة وتخفيف الحمل هي الحب اللي بيدون لألف سنة.

أنا فاهمك كويس

التفهم مش حاجة سهلة بين الطرفين، في قصص حب كثيرة بتنتهي لمجرد إن فيه طرف ما قدرش يفهم التاني. لكن لو لاقيتي التفهم في حياتك ومع شريكك فده معناه إنك عندك أحلى هدية فلانتين. التفهم ساعة ما بيقولك أنت مقصرتيش وعملتي اللي عليكي. لما بيفهم اللحظات اللي بيكون فيها مزاجك مش مفهوم وانت نفسك مش عارفة ليه. الوقت اللي بيعرف فيه لحظة خوفك من المسؤولية ومن الوقت ومن الزمن وملامحه. التفهم مش سهل وعشان نوصل ليه لازم نمر بمراحل كثيرة وان كل شخص يفكر في الثاني أكتر ما بيفكر في نفسه.

مش بعرف أعملها من غيرك

مرة سألوا أطفال صغيرين عن تعريفهم للحب، فواحد فيهم قال “لما ماما بتعمل لبابا النسكافيه وتاخد منه حبة قبل ما تدي  له”.. الولد عبر عن المشاركة وكأنها من أكبر قيم الحب ومعانيه. ولما بيكون في زوج وزوجة قادرين يشاركوا بعض الحاجات فدول أسعد اتنين في الدنيا. المشاركة يعني مش بعرف أفرح من غيرك. ومش بعرف أعيط غير قدامك. الأكل مش حيبقى حلو غير واحنا سوا، الفسحة أحلى واحنا مع بعض حتى لو هناكل درة مشوي على الكورنيش. فلو في عيد الحب اتقدملك لحظة مشاركة حقيقية فأنت أخدتي أجمل هدية الفلانتين.

الاحترام والتوقير

صفة الاحترام والتوقير للأسف من الصفات اللي بنفقدها كل يوم في العلاقة الزوجية. يعني ممكن نلاقي الراجل مسجل اسم مراته على الموبايل بصفة مش حلوة، والستات بيتكلموا عن أزواجهم بصورة سلبية. لكن لو لسة فيه زوج بيتكلم عن زوجته قدام الناس بمودة وفخر ولو فيه زوجة قادرة إنها تبجل زوجها في غيابه وحضوره فدول أكثر اتنين عاشوا الحب. لو لسة بيمشي جنبك ويمسك إيدك وانت طالعة السلم، لو بيحافظ على كل كلمة وفعل ليه عشان ما يجرحكيش فانت مش محتاجة هدية عيد حب لأن انت عندك الحب كله.

للمزيد: عادات يومية تعيد الرومانسية إلى الحياة الزوجية.