لشراء مخدة صحية 5 حاجات لازم تاخدي بالك منها
كام مرة بتقومي من النوم وانت حاسة بتعب في فقرات الرقبة والكتف وساعات باقي أجزاء جسمك. لكن عمرك فكرتي إن السبب في كل ده هو نومك على مخدة غير صحية؟ طيب هي مخدتك بقالها كام سنة ماتغيرتش؟ وامتى تعرفي انها لازم تتغير، وازاي تختاري المخدة الصحية تماماً اللي تجنبك مشكلات وآلام الرقبة؟ كل ده هنتكلم فيه في مقالنا النهاردة.
ليه لازم تختاري مخدة صحية؟
بالرغم إن المرتبة بتعتبر أهم حاجة بتأثر على صحة النوم والعمود الفقري. لكن في نفس الوقت المخدة لها تأثير كبير، ولو فيه أيام كثير مزاجك بيكون مش حلو وحاسة بتكسير في الجسم ومش لاقية سبب منطقي فلو رحتي لمخدتك وسألتيها هتقولك بكل لهجة درامية “أنا السبب، أنا السبب.
طيب ازاي المخدة بتأثر عليكي؟
علشان تحصلي على وضعية نوم صحية لازم وضعية الجسم تكون مستقيمة، بداية من الساقين والعمود الفقري، وانتهاءاً بالصدر والكتفين والرقبة. لذلك لو رقبتك وكتفك مش مدعومين بشكل كويس فهما هيغيروا شكل استقامة الجسم أثناء النوم، وده السبب الأساسي في الآلم اللي بتحسي بيه.
امتى تعرفي إن مخدتك لازم تتغير؟
كتير مننا ما يعرفوش إن أي نوع من أنواع المخدات له عمر افتراضي وبعدها بيكون من الأفضل إنك تغيريها. لكن المسألة دي بتختلف على حسب نوعها والمادة المصنوعة منها وجودتها. لذلك لو اشتريتي مخدة بسعر أعلى وجودة أعلى فهي هتفضل مكملة لوقت أطول. لكن في نفس الوقت في مؤشرات بتقولك إن جه الوقت علشان تتخلصي من مخدتك القديمة، زي:-
- شيلي غطا المخدة وشوفي هل في بقع، أو بقع العرق؟ هل المخدة ممزقة. كذلك هل ريحتها جيدة؟ لو المخدة عليها الحاجات فلازم تبدليها. لأن وجودها يعتبر مؤشر إنها بقت مكان صالح للبكتريا. كذلك لازم تكوني عارفة إن الجلد الميت بيتراكم على القماش ومع العرق ده بيؤدي إن مخدتك تكون مكان غير صحي تماماً.
- اتني المخدة جزئين، لو رجعت تاني فهي كده لسة ممكن تكمل معاكي حبة كمان. لكن لو فضلت في نفس وضعية التني فهي كده بتقولك “أنا مت خلاص”. كمان لو المخدة كبيرة ممكن تتنيها على 3 أجزاء.
ازاي تشتري مخدة صحية؟
ودلوقتي انت قررتي تشتري مخدة صحية تماماً. لكن قبل ما تقومي بالخطوة دي لازم تفكري في كل الحاجات الجاية، لأنها الأساس اللي هتدوري بيه.
المادة المخصصة لحشو المخدة
في مخدات حشواتها مصنوعة من مواد كثيرة، زي الصوف والريش أو القطن، وكل حاجة لها مميزات ممكن نوضحها:-
- المخدة القطن، مميزاتها إنها بتكون على درجة عالية من الصلابة والثبات. والقطن بيتميز إنه من المواد الطبيعية اللي مش بتسبب حساسية. كذلك بيقدر يحافظ على الرطوبة وبالتالي مش بتحسي بالحر أثناء النوم. بالإضافة إلى إنه مقاوم للعث والتراب والعفن.
- الصوف، الصوف له نفس مميزات القطن، من حيث إنه صلب وثابت ومقاوم للأتربة والعفن. لكن ممكن يكون خشن وملمسه مش مناسب لكل الناس.
- الألياف، الألياف عادة بتكون مصنوعة من ريش ومواد مختلفة. وبالرغم من إنها مريحة جداً إلا إنها ممكن تسبب الحساسية. لكن في أنواع مصنوعة ضد الحساسية بس بتكون بتمن أغلى.
- اللاتكس، مخدات اللاتكس من الأنواع الصحية جداً. كذلك بتتميز بإنها صلبة ومريحة في نفس الوقت، كمان فيها خصائص بتدعم الرقبة والرأس خلال النوم.
- الفوم، ودي نوع من المخدات مناسب جداً للأشخاص اللي بيعانوا من آلام الرقبة. كذلك هي مقاومة للغبار والعفن، بالإضافة إلى إنها بتقدر توزع الوزن بالتساوي على سطحها وبالتالي بتكون مريحة أكثر. لكن مشكلتها هي إنها لها رائحة واضحة وده ممكن يسبب إزعاج لأشخاص كثير.
وزن المخدة
عادة الوسائد المصنوعة من الفوم أو الألياف أو اللاتيكس بتكون أخف من الوسائد الثانية. لكن في النهاية بيظل تفضيلك الشخصي هو المتحكم في نوع المخدة اللي هتختاريها. بس بالنسبة للأشخاص اللي عايزين مزيد من الراحة والتحكم في وضعية الرقبة والرأس فالمراتب الأخف هتكون الأفضل.
الجودة
بشكل كبير كل ما سعر الوسادة كان أعلى كل ما جودتها كانت أفضل. علشان كده حددي أعلى سعر ممكن يكون متاح ليكي. لكن في النهاية افتكري إن مخدتك هي أكتر شيء بتقضي معاه وقت طويل ويستحق جزء كبير من الميزانية.
الحجم
الحجم القياسي للمخدات هو الحجم الأفضل. لكن ما يمنعش إن في ناس بتفضل الأحجام الكبيرة. لكن في النهاية لازم ارتفاع المخدة وكثافتها يكونوا قادرين يحققوا استقامة الرقبة مع العمود الفقري. كذلك لازم تختاري غطاء المخدة المناسب لحجمها مش الأقل علشان ما يغيرش من تأثيرها.
النسيج
الأنسجة الطبيعية هي أفضل خيار. وده لأنها بتسمح بمرور الهواء، وبتحافظ على المخدات لوقت أطول، كمان بتحميها من العرق والقع. كمان الأقمشة الخاصة بغطاء الوسادة من الأفضل إنها تكون طبيعية.
