تنظيم اجازة الصيف.. خلي أطفالك مشغولين لأطول وقت؟
اجازة الصيف بدأت وده معناه إنك خلصتي مسؤوليات كتيرة، زي تحضير اللانش بوكس والصحيان بدري، والمذاكرة وقلق الامتحانات. لكن ثانية واحدة! انت أكيد دلوقتي بتقولي أينعم مسؤولية المدرسة خلصت بس ده مش معناه انك هترتاحي. معناه انك هتبدأي رحلة ما بين حل المشاكل والخناقة على الألعاب والتمارين والفسح والنادي. لذلك تعالي النهاردة نعرف سوا ازاي تقدري تنظمي وقت طفلك في الصيف وتقللي المجهود الكبير.
تنظيم اجازة الصيف للأطفال
في حاجات كتيرة تساعدك على تنظيم اجازة الصيف سواء لو عندك طفل واحد أو أكتر من طفل. لكن التخطيط في البداية من أكتر حاجات اللي ممكن تساعدك. ونبدأ الخطوة الأولى.
اقرأي أيضا: 12 من أهم قنوات الأطفال على اليوتيوب للتسلية والتعليم
وضع الجدول
اهم حاجة هي انك تحددي وقت لكل الأمور الأساسية. على سبيل المثال تحديد وقت التمارين الرياضية أو الأنشطة خارج المنزل. وفي نفس الجدول حددي مواعيد العاب الفيديو أو الأنشطة داخل البيت. لكن ما تنسيش إن وقت النوم والاستيقاظ هو أهم حاجة لازم تحدديها داخل الجدول ده.
تنظيم مواعيد النوم
لو عايزة اجازة الصيف تعدي بأقل قدر من التعب يبقى أول شيء لابد من تعديله هو وقت النوم. لأن الأطفال لازم يعرفوا إن الاجازة مش معناها اللعب ومشاهدة التلفزيون أو الموبايل طول الليل والنوم طول النهار. لكن لازم تكوني صارمة في ان وقت النوم ما يبقاش بعد 12 صباحا. ووقت الاستيقاظ مايكونش بعد 9 أو10.
تحديد مسؤوليات الطفل
اتكلمي مع أطفالك عن مسؤولية كل حد فيهم وقت الاجازة على حسب الفئة العمرية. المسؤولية دي معناها انهم ملتزمين بدورهم في ترتيب البيت وترتيب غرفهم الخاصة. كذلك لو أطفالك أكبر في العمر فأكيد لازم يكون لهم دور في احضار متطلبات المنزل ووضع كل شيء في مكانه.
لكن ده مش معناه انك تتكلمي فقط، وفي حالة عدم التنفيذ تستسلمي. لأن الطفل لازم يعرف إن الحصول على حقوقه مرتبط بتنفيذ مسؤوليته. بمعني وجود شرط للحصول على الشيء، لو عايز تلعب يبقى اللعب بعد تنظيف غرفتك. لو عايز التزام في مواعيد التمرين، يبقى لازم تكون مسؤول عن تحضير شنطتك وترتيب أدواتك. الطريقة دي مش بس بتساعدك على تقليل المجهود، لكنها بتساعد الطفل يكون له شخصية مستقلة وقوية.
وقت الأصدقاء
من أكثر الأفكار المفيدة في اجازة الصيف هو تنظيم ميعاد لقاء أسبوعي للأطفال. يعني لو انتم مجموعة من 3 أو أربع أمهات لمجموعة من الأطفال اللي بينهم صداقة فممكن كل أسبوع يتم استقبال الأطفال في بيت. وبالتالي هتقدري تكوني حرة اليوم ده، وفي نفس الوقت الامهات التانين حيحظوا بنفس الفرص.
وهنا برضه لازم الطفل يكون مسؤول عن تجهيز البيت، واستقبال اصدقائه وتنظيم البيت بعد ما تنتهي الزيارة.
ألعاب الذكاء
الأطفال ممكن يقضوا وقت طويل على ألعاب الفيديو أو الموبايل. لكن في الحقيقة كل ده له تأثير سلبي على نشاطهم. لذلك من المهم إنك توفري العاب ذكاء مختلفة زي السودوكو أو الكلمات المتقاطعة أو ألعاب الذاكرة. الألعاب دي هتساعدهم على تنشيط عقولهم وفي نفس الوقت قضاء وقت طويل.
تحديد وقت الالعاب الالكترونية
لو عايزة تنقذي اجازة الصيف يبقى أول حاجة هي تحديد وقت الالعاب الالكترونية بحيث ما يكونش أكتر من ساعتين أو تلت ساعات. الوقت ده شامل مشاهدة اليوتيوب أو الفيس بوك. دي نقطة مهمة جداً لازم تتمسكي بتنفيذها.
يوم الخروج
الخروج من المشاكل الكتيرة اللى بتقابل الأمهات، نظراً للازدحام وكمان ارتفاع التكلفة. لكن ممكن تفكري في أماكن مختلفة. زي المتاحف بأنواعها المختلفة. أو زيارة الأماكن الأثرية أو الأماكن المفتوحة. مش لازم الخروج يكون في مطعم أو مكان للألعاب يخسرك كل ميزانية البيت في يوم واحد.
شجعي ولادك على القراءة
القراءة من الأنشطة اللي الأطفال يقدروا يقضوا فيها وقت طويل جداً. وممكن يشتركوا في نوادي القراءة المختلفة أو المراكز الثقافية. وبجانب القراءة في أنشطة مختلفة زي التلوين أو ألعاب التركيب أو الرسم والموسيقى. لأن كل الهوايات دي ممكن الطفل يتعلمها في البيت ويمارسها ويقضي معاها وقت طويل جداً.
للمزيد: أهم 3 خطوات لتأديب الطفل المهمل.
