ازاي تصوري ولادك على الانستقرام بشكل احترافي جداً

محاولة الأم لتصوير ولادها هي محاولة دايماً بتقابلها تحديات كتير. مثلاً كلنا مرينا باللحظة اللي ابنك أو بنتك فيها بيكون شكلهم حلو جدا وبمجرد ما تمسكي الموبايل وتصوري بتحسي إن في كارثة كونية حصلت خلت شعرهم منكوش وهدومهم متلخبطة. لكن برضه لا يمكن ننسى حب النكد الطبيعي الجيني اللي بيظهر بمجرد ما توجهي الكاميرا عليهم. لذلك بتحسي إنه لا يمكن في يوم من الأيام تحصلي على صورة حلوة زي اللي بتشوفي أصحابك نشرينها على الانستقرام أو فيسبوك. لكن هل فكرتي في يوم من الأيام هما بيعملوا إيه؟ هما مش محترفين تصوير ولا حاجة هما عرفوا شوية أسرار هنقولك عليها دلوقتي.

أسرار التصوير الاحترافي على انستقرام

لازم في البداية تتأكدي إن صور أطفال صديقاتك اللي بتلاقيها حلوة جداً على الانستقرام مش متصورة من خلال كاميرات محترفة. لكن كل الموضوع بيكمن في انك تختاري الكادر واللحظة والإضاءة. كذلك من المهم إنك تكوني مقتنعة بتفاصيل مهمة زي اللي هنقولها دلوقتي.

ماتقوليش cheeeeees

أول غلطة معظم الأمهات بتقع فيها إنها بتوقف ولادها علشان يتصوروا. لكن بتنسى إن الأولاد عشوائيين وكتير منهم بيخاف من الكاميرا. لذلك ما تطلبيش منهم يقفوا ويبتسموا ويقولوا cheeees. لكن الأفضل إنك تكلميهم وتخليهم يردوا عليكي وانت بتلقطي الصورة. وكل أم عارفة إن ولادها في كلمات بتفرحهم أو بتخلي شكلهم مضحك فممكن تخليهم يردوا عليكي بيها.

خليكي عشوائية ومتحركة

الصور المنظمة هي أسوأ شيء ممكن تعمليه. لكن العشوائية مع الأطفال هي الحل. علشان كده حاولي تتحركي بشكل مختلف، نامي على الأرض وصوريهم. كمان مش لازم تاخدي التفاصيل كاملة لأن في تفاصيل بتبقى في غاية الجمال، مثلًا لو بنتك لبست الحذاء الخاص بيكي فانت تقدري تحصلي على صورة تحصل على اعجاب كبير جدا لو فكرتي في تصوير رجليها الصغيرة في الحذاء الكبير. كذلك لو الأولاد بياكلوا شوكولاتة أو أيس كريم وكان وشهم في كله فوضى صوري التفصيلة دي بس وهتكون في منتهى الجرأة والجمال.

اختاري الأماكن المفتوحة

ساعات بيكون التصوير جوه البيت أو الأماكن المغلقة مقيد للأطفال. علشان كده أفضل شيء ممكن تعمليه إنك تصوريهم في الأماكن المفتوحة وتصوريهم بشكل طبيعي وهما بيلعبوا وواخدين حريتهم بدرجة كبيرة.

تحديد الفريم

كل الأمهات بتعتقد إن لازم الأولاد يتوسطوا الصورة عشان تطلع احترافية. لكن في الحقيقة ممكن تخلي الطفل ناحية اليمين أو اليسار بدرجة أكبر عشان توضحي تفاصيل في الخلفية هتخلي الصورة تبان احترافية جدا.

استخدام الإضاءة الطبيعية

بالرغم من إن معظم تطبيقات التصوير بتساعد على ضبط الإضاءة إلا إن الإضاءة الطبيعية لها رونقها. علشان كده حاولي دايما تصوير الأولاد في الأماكن اللي الضوء الطبيعي واصلها كويس.

استمري في التصوير

ممكن تحصلي على صورة واحدة جميلة جدا وبعدها تحسي بالرضا. لكن خليني أقولك على الأفضل. خلي وضع الكاميرا مفتوح على التقاط الصور المتتابعة لأنك فعلا هتلاقي من خلال الخاصية دي صور غير متوقعة وتعبيرات هتخلي صورتك هي الأفضل على انستقرام.

التقاط صور قريبة

قربي الكاميرا من التفاصيل زي إيد الطفل الصغيرة مع الشوكولاتة أو الكب كيك. ممكن كما تاخدي صورة لملاح الوجه بس من غير ما تبيني الكدر الخارجي أو باقي الجسم ودي بتكون صورة رائعة جدا.

نصائح سريعة قبل نشر الصور على انستقرام

تعالي دلوقتي نقولك على مجموعة من النقاط المهمة قبل ما تنشري الصور على انستقرام لازم تخلي بالك منها:-

• لما تعرضي الصورة على حساب الانستقرام تأكدي من هوية المتابعين لأن الأطفال ممكن يتعرضوا للتنمر وده يسبب لهم أذى نفسي كبير.
• حتى لو الصورة بتضحكك تجنبي نشر الصور المحرجة لطفلك لأن الموقف والإحراج مش هيروحوا من ذاكرته.
• مش من المفضل إنك تنشري مكانك الحالي زي عنوان البيت أو رقمه أو البيانات الخاصة بأطفالك على الصورة أو اسم المدرسة الخاصة بيهم. كلها بيانات ممكن تعرض أطفالك للخطر.

للمزيد: ازاي تتأكدي من دفء البيبي في الشتاء.