الرضاعة الطبيعية الناجحة للأم الجديدة

ملايين الأسئلة في عقل كل أم جديدة عن الرضاعة الطبيعية الناجحة. ما تقدريش تنكري إنها ساعات بتتحول لقلق كبير. كلام كثير بتسمعيه عن الألم والتعب، أو رفض المولود الجديد للرضاعة أو نقص الحليب وعدم كفايته. أكيد لكِ حق تقلقي لكن عشان تتعاملي مع الموقع صح محتاجة تكوني معلومات كثير عن خطواتك الأولى في رحلة الرضاعة الطبيعية. وفي مقالنا النهاردة هنقولك جزء من المعلومات دي.

الرضاعة الطبيعية الناجحة بعد الولادة مباشرة

ممكن نقول إن رحلة الرضاعة الطبيعية الناجحة بتبدأ من لحظة الولادة، اللحظة دي مهمة عشان الوقت الجاي بأكمله، وبتساعدك على تفهم حاجات كثيرة من خلال التجربة، عشان بعد الولادة اهتمي بالتفاصيل الجاية:-

كوني مع طفلك من اللحظة الأولى

اللحظة الأولى بعد الولادة تساوي ملايين السنين. بالرغم إن في كثير من الناس بتفصل الأم عن المولود لكن النظرية دي اتغيرت تماماً. وبقى في دراسات بتأكد أهمية تواصل الأم والرضيع بمجرد ولادته. وجود طفلك قريب منك في اللحظة دي له تأثير إيجابي على الاستجابة الهرمونية المتعلقة بالرضاعة الطبيعية الناجحة. والوضع ده مش مرتبط بس بالولادة الطبيعية. لكن مهم برضه بعد الولادة القيصرية.

اتخاذ الوضع الصحيح والمريح

أول أيام الرضاعة هي فرصتك لاختبار أفضل الأوضاع المريحة ليكي وللمولود. نقدر نقول إن كل حد فيكم بيختبر التجربة لأول مرة لتحديد أفضل وضعية. 

هنا من المهم نقول إن الأيام الأولى بيكون الثدي فيها لين وبيبدأ في تحول اللبأ المغذي للحليب الناضج، ودي فرصة كويسة جداً عشان تحددي فيها أفضل الأوضاع المريحة ليكي، غير إنها قادرة تجنبك مشاكل كثيرة في الفترات المقبلة.

للمزيد: 4 طرق لـ الرضاعة الطبيعية الصحيحة تساعدك على الراحة والتخلص من الألم

الصبر مفتاح الرضاعة الطبيعية الناجحة

القاعدة بتقول إن التكرار يعلم الشطار، وده الوضع مع الرضاعة الطبيعية. نقدر نقول إنها مهارة بتقدري تنميها إنت والمولود مع الوقت. عشان كده المهارة دي محتاجة الصبر، الشعور بالأحباط أو الملل منك أو من الرضيع شيء طبيعي ومنطقي وغير مقلق. عشان كده لو حسيتي إنك تعبانة أو مش قادرة تقومي بالعملية بشكل صحيح خذي راحة، تخلصي من إحساسك بالتوتر وجربي مرة ثانية. مع كل مرة هتقدري تحسني من خبرتك وطفلك هيعرف زي يلاقي وجبته المغذية.

أهم نصائح رحلة الرضاعة الطبيعية الناجحة

بعد مرور الأيام الأولى هتكوني خلاص دخلتي في الحدوتة أو بمعنى أصح دخلتي في الجد. أوقات كثيرة هتمري بحاجات ومفاجأت لأول مرة لكن ما فيش داعي للخوف أو القلق. اعرفي المعلومات الأساسية اللي تخلي الرحلة أسهل مما يمكن.

قبل البكاء كوني مستعدة

في أمهات كثيرة بتنتظر بكاء الطفل عشان تبدأ الرضاعة، لكن ليه تستني؟ لحسن الحظ إن الطفل بيدي مجموعة من الإشارات لإنقاذ الموقف في الوقت المناسب. راقبي طفلك ولو قام بأي شيء من الآتي يبقى ده ميعاد أكله المناسب:-

• تحريك رقبته في مجموعة من الاتجاهات كإنه بيدور على حاجة مهمة.
• يبدأ في امتصاص أي شيء قريب منه.
• يبدأ في فتح وغلق فمه ويحرك لسانه.

منح الحرية لطفلك

مع الرضاعة الطبيعية خليكي مؤمنة إن البيبي بيعرف مصلحته أكثر منك. يعني لو قرر ينام فمافيش أي داعي إنك تصحيه عشان يرضع لمجرد إن ميعاد الرضعة جه. لو قرر إنه يرضع في وقت غير متوقع فده ناتج عن شعوره بالجوع. إدي للطفل الحرية في تحديد الوقت والمدة المتعلقين بالرضاعة. لو لقيتيه بيرضع لمدة 10 دقائق فقط ده مش داعي للقلق ومافيش أي داعي للضغط عليه. 

اختيار الوضعية الصحية

بالرغم إن رحلة الأمومة بتعتمد على تضحيات كثيرة، لكن أثناء الرضاعة الطبيعية احذري من التضحية باختيار الوضع الصحي والمريح. أثناء الرضاعة من المهم إنك تهتمي بدعم منطقة الرقبة والظهر لأن مع الوقت الألم المستمر في الأجزاء دي من الجسم ممكن يؤدي لمتاعب كثيرة على المدى الطويل.

التسرب شيء طبيعي

من أكثر المشكلات المؤرقة للأم الجديدة مشكلة تسرب اللبن. لكن من حسن الحظ إن مع الوقت التسرب بيقل ويختفي تماماً. حاولي دائماً إنك ترضعي الطفل عشان اللبن ما يتراكمش في الثدي لوقت طويل ويبدأ في التسرب. لو كنت بتشتغلي فاستخدمي شفاط اللبن. وطبعاً منعاً للإحراج فوط منع التسرب هي صديقتك في المرحلة دي.

تجنب الحلمات الصناعية أو المواد الغذائية التكميلية

في المراحل الأولى من الرضاعة من المهم إنك تتجنبي استخدام الحلمات الصناعية أو زجاجات الرضاعة. ده طبعاً لو كانت الرضاعة الطبيعية كافية. مع الوقت الطفل بيشعر إنه مش محتاج يبذل مجهود مع الحلمات الصناعية زي الرضاعة من الثدي، وده ممكن يخليه يستسهل ويرفض الرضاعة الطبيعية. الأولاد أذكى مننا للأسف.

تجنبي حدوث الاحتقان

احتقان الثدي من أكثر المشكلات اللي ممكن تحصل نتيجة إفراز لبن أكبر من حاجة الطفل، وهو بيبقي عبارة عن تورم وتيبس في منطقة الثدي. والحل إذا كان الرضيع بياخد جرعة قليلة إنك تقومي بشفط اللبن عشان تتجنبي الإصابة بالاحتقان.

الاهتمام بنمط الحياة من أجل الرضاعة الطبيعية الناجحة

الرضاعة الطبيعية رحلة مهمة داخل حياتك، وهي مش عملية وقتية مرتبطة بس بالوقت اللي بيكون الطفل بين أحضانك فيه، لكنها عملية مرتبطة بكل حاجة داخل نمط حياتك. الرضاعة الطبيعية مرتبطة بنوعية الأكل وساعات النوم والحالة الصحية والعصبية والنفسية. ومن هنا بنقدملك مجموعة من النصائح اللي مهم تراعيها مع بداية الرضاعة.

• الالتزام بالأكل الصحي. وده معناه المزيد من الخضروات والفواكه والمواد الغذائية المحتوية على معادن. ومع المتابعة مع الطبيب المختص تقدري تعرفي إذا كنت في حاجة للمكملات الغذائية ولا لأ.
• الاهتمام بالحصول على معدل كافي من الماء والسوائل الطبيعية كل يوم.
• طبعاً التوقف عن التدخين تماماً أو شرب الكحول.
• تقللي نسبة الحصول على المواد المحتوية على الكافيين سواء الشاي أو القهوة أو المشروبات الغازية.
• النوم بشكل كافي، والبعد عن التوتر.
• عدم الحصول على أي دواء أو مسكن إلا بعد تصريح من الطبيب المعالج لحالتك.

كده نقدر نقول إن معاكي مرشد في رحلتك الأولى لعالم الرضاعة الطبيعية الناجحة. في النهاية افتكري إن تجربة الأمومة تجربة ثرية ومهمة وعبقرية وفيها تفاصيل إنت بس اللي هتحسيها وتعرفيها.

اقرأي أيضا: وقت الرضاعة الطبيعية كيف يكون مسلياً ومختلفاً؟