أسباب عدم حب الأطفال للمدرسة..ليه نصدقهم وإيه الحل؟
“أنا مش عايز أروح المدرسة”، “أنا خايف من المدرسة”، “أنا تعبان ومش عايز أروح النهاردة”.. كل دي كلمات بنسمعها كتير من الأولاد. لكن للأسف كتير مننا بيتعاملوا معاها على إنها نوع من الدلع والكسل. أما الحقيقة فهي بتكون مجرد ستارة الأولاد بيخفوا وراها حاجات حقيقة. طب ياترى إيه هي أسباب عدم حب الأطفال للمدرسة. وإيه اللي يخلينا نصدقها.
هل من الطبيعي إن الأطفال ما يحبوش المدرسة؟
من المهم جداً إننا كأمهات ندرك إن الطفل دايماً قادر يوصل مشاعره الحقيقية تجاه الأشياء. عشان كده لما نلاحظ إنه بيحاول يهرب من المدرسة ماينفعش إننا ناخد الطريق السهل ونقول إن ده دلع. لإن ساعات بتكون محاولته الهروب من المدرسة دليل على إنه بيواجه مشكلة حقيقة ومحتاج مننا تفهمها، خصوصاً لو حصل تحول في شخصية الطفل ويكون تحول مفاجئ مابين حب المدرسة للهروب منها.
أسباب عدم حب الأطفال للمدرسة..ونتعامل معاها ازاي؟
أسباب عدم حب الأطفال للمدرسة متعددة جداً ومحتاجة مننا إننا نتعامل معاها بهدوء. كذلك أهم حاجة هي إننا ما ننكرش مشاعر الطفل ومانفسرش الموضوع على إنه دلع وعدم التزام. لإن الإسباب ممكن تكون كثيرة زي:
التجارب السيئة داخل المدرسة
مش عالم الكبار بس هو اللي فيه تجارب سيئة. الأطفال ممكن يتعرضوا لتجارب مؤلمة بالنسبة لعمرهم تخليهم بيكرهوا المدرسة. مثلا التعرض للعنف من المدرسين أو السخرية والتريقة. التعرض للرفض. كذلك التعرض للتنمر. ممكن موقف واحد بس يكون سبب في إن الطفل يكره المدرسة.
نسيان عمل الواجب المنزلي
لو الطفل كان خايف يروح المدرسة لإنه ما عملش واجبه المدرسي بلاش نتسرع ونواجهه إنه غير مسؤول. ساعات الأطفال بيفقدوا مهارة تقسيم الوقت. مثلا ممكن يكون بيقعد يذاكر وقت طويل وبينسى الواجب. أو مش بيقدر يوفق بين التمارين والواجبات المنزلية. عشان كده لازم لو واجهنا المشكلة دي إننا نساعده على إدارة وقته بشكل جيد. وفي حاجات كتيرة نقدر نعملها تساعده يكون شخص منظم لوقته وتحفزه على إتمام المهمات بطريقة سليمة.
الإحساس بالإرهاق والتعب
أول ما الطفل بيقول أنه تعبان للأسف إحنا بنستنكر الشعور ده. مجرد إنه طفل وصغير بيخلينا نعتقد إنه سوبر مان ويقدر يبزل مجهود خرافي. لكن الأطفال ممكن يشعروا بالإرهاق نتيجة حاجات كثيرة. عشان كده لازم نعرف حجم المجهود اللي بيعمله مناسب ليه ولا لأ. مثلاً هل جدول المدرسة تقيل وبيخليه يشيل كتب كثيرة على ضهره وده بيسبب له تعب. هل الوجبة الغذائية كافية وقادرة تجدد نشاطه. كذلك هل الطفل بيعاني من أي مشكلة تخليه يشعر بالإرهاق مع أقل مجهود. وممكن يكون بيقوم بأكتر من نشاط وبالتالي التعب بيكون هو عنوان حياته.
صعوبة الدراسة
لو الطفل اشتكى من صعوبة الدراسة فده مش دليل على كسله أو إن قدراته العقلية أقل من زملائه في نفس المرحلة. كل طفل يقدر يتعامل مع المواد بطريقة مختلفة. وممكن صعوبة الدراسة تيجي من عدم قدرة المدرس على توصيل العلومة للطفل. وهنا لازم نتكلم مع الطفل كويس ونفهم منه الصعوبة اللي بيواجهها ونحاول نلاقي مع المدرسين المختصين حلول ممكنة تقدر إنها تسهل عليه عملية الدراسة والمذاكرة.
عدم الارتياح للزملاء في الفصل
التنمر مشكلة كبيرة الأولاد بيواجهوها في المدرسة. وفي أوقات كثيرة بيكون من الصعب عليهم إنهم يشرحوا تعرضهم للتنمر. لكن ممكن نلاقيهم بيقولوا إنهم مش بيرتاحوا مع الزملاء. أو إن الأولاد في المدرسة غير مريحين. عشان كده لازم نتدخل بشكل سريع. لازم نعرف من الطفل ليه هو حاسس بمشاعر سيئة ناحية أصدقائه. كمان لو مش قادر يكون صداقات هل ده بيحصل بسبب مشكلة نفسية واجتماعية هو بيواجها. ولا عشان فعلاً في حالة من التنمر بتمارس ضده.
دي كانت أكتر أسباب عدم حب الأطفال للمدرسة. وزي ما قلنا الحل الأول ليها هي الحوار مع الطفل ومحاولتنا إننا نوصل له دايماً إننا قادرين نفهم مشاعره وإننا عايزين نساعده يتخطاها. وده المفتاح الأساسي اللي نساعده بيه يتأقلم مع المدرسة ويواجه أي شيء بشجاعة.
