ازاي نستعد مع أول يوم في المدرسة لأول مرة؟
أول يوم في المدرسة من أكثر الحاجات المرعبة للأطفال اللي حيبدأوا دراسة لأول مرة. عشان كده مشاعر الخوف والقلق التلقائية جواهم هتبدأ في الظهور في شكل سلوكيات وتصرفات مختلفة. للأسف ممكن حالة القلق عند الأطفال توصل لأعراض صحية. لذلك ابدأي من دلوقتي التمهيد لليوم ده من خلال الخطوات التالية.
أول يوم في المدرسة وخطوات الاستعداد
تجربة المدرسة مش تجربة سهلة على أي طفل وهو بيبدأها لأول مرة. تخيلي إنه كان في عالم من غير مسؤولية أو حدود وفجأة بقى في عالم كله تفاصيل وناس كثيرة من غير ماما تلحقه. طبيعي إن مشاعر القلق تسيطر. لكن اللي مش طبيعي إننا نخلي الأولاد يبدأوا أول يوم في المدرسة من غير ما نمهدهم للتغيير الكبير اللي هيحصل في حياتهم. عشان كده من المهم إنك تقومي بالخطوات الجاية:-
اتكلمي معاه عن المدرسة
التمهيد من أجمل الحاجات اللي بتحصل لأي إنسان. لذلك الطفل محتاج يخلق جوه تخيله تصور عن المدرسة. ابدأي اشرحي ليه حاجات مش بس متعلقة إنه هيدرس ويتعلم. لكن هي مكان تقدر تعرف فيه أصحاب كثيرة. كمان في المدرسة في أنشطة كثيرة ممكن تعملها، زي اللعب، الرياضة أو الرسم. بعد كده اديله نبذة مختصرة عن التعليم والمواد ويعرف أنه هيكون مسؤول عن الفهم والمذاكرة لكن من غير تخويف.
ابعدي مصادر التخويف
لو في أطفال في مراحل تانية من التعليم حاولي تطلبي منهم إن كلامهم يكون إيجابي. ده لأن كثير من الأطفال ممكن يتكون عندهم قلق كبير لو سمعوا حاجات زي العقاب أو الفشل أو التنمر. عشان كده من المهم إن الإخوات ما يذكروش النقاط السلبية عن المدرسة قدام الأطفال اللي لسة ما بدأوش.
جهزوا احتياجات المدرسة سوا
من الجميل إن الطفل ينزل ينقي كل الحاجات الخاصة بالمدرسة معاكي. زي الملابس أو الأدوات المدرسية. ده من أكبر الحاجات اللي ممكن تحفزه على استقبال أول يوم مدرسة.
تغيير الروتين اليومي
في مرحلة من المهم إننا نبدأ نجهز الأطفال للتغيير. عشان كده ابدأي جهزيهم للتعود على حياة المدرسة. مثلاً الدخول للنوم في وقت بدري. أو تحضير كل الحاجات الخاصة للنهار قبل النوم. ممكن لو طفلك متعود على تناول الأكل في مواعيد محددة تبدأي تغيري النظام عشان يكون متعود عليه وقت دخول المدرسة.
قللي من جدول الطفل
لو يوم الطفل مشحون بتمارين وأنشطة من المهم إنك تحاولي تقللي الضغط بالتدريج. لأن الدراسة مع المسؤوليات الكثيرة ممكن تزود الضغط على طفلك وتخليه يكره المسؤولية الجديدة المتعلقة بالمدرسة.
يوم مع الأصدقاء
من أجمل الحاجات اللي ممكن كل الأمهات يعملوها إنهم يجمعوا الأولاد من نفس الفصل أو السنة الدراسية قبل بداية الدراسة. لو قدروا أنهم يتأقلموا مع شخص أو اثنين ده هيكون حافز كبير جداً ليهم عشان استقبال أول يوم مع أصدقائهم.
زيارة للمدرسة
خدي الطفل في جولة لمدرسته. خليه يشوف فصله وأماكن الألعاب أو يتعرف على المدرسين الجداد. ده حيقلل بكتير من رهبته وخوفه في اليوم الأول.
للمزيد: الصحيان بدري مهمة مستحيلة ولكن.
