موضة يا بابا
لما الأولاد بيبقوا عايزين يلبسوا حاجات احنا مش متعودين عليها دايما بيقولوا كلمة واحدة. دي موضة..لكن الموضة دي ممكن يكون وراها حوار ما بينتهيش.
دي موضة يابابا
مامي انا عايزه بنطلون مقطع
_ ادخلي ياحبييتي المطبخ هتلاقي ورا الباب كيس فيه بنطلونات وبلوزات مقطعه كتير
_لالا مش هينفعوا
_ ليه بس!! اختاري بنطلون منهم وامسحي بيه اوضتك
_ انا مش عايزة امسح اوضتي انا عايزه البسه
_تلبسي مقطع ليه يا ماما؟ عندك فقرة تسول بعد الضهر؟؟ عايزه تشتغلي بلقمتك يعني؟؟ ولا عندك حفله تنكريه !!
_ يامامي ده موضه
_ موضة انك تلبسي مقطع!!
ربنا يرحمك يا كالفن يا كلاين ويبشبش الطوبة اللي تحتك !!.الموضة لمت من بعدك يا خويا !!
وبعدين الراجل المحترم اللي اخترع فكره اللبس المقطع كان هدفه نبيل اننا نحس بالفقراء لكن بعد ماخلتوها موضه محدش هيتعاطف معاهم ومش بعيد كمان انهم يتحسدوا علي المقطع اللي لابسينه !! بدل ما نساعدهم يلبسوا لبس كويس !!
وتشوف الولد الغلبان في الشارع ويتحايل عليك : ياعم عايز فلوس اشتري حاجة البسها
فترد عليه وانت معجب بلبسه: تشترى ايه ياعم ده انت كده زي الفل ده انا عايز البس زيك !! انت عارف البنطلون المقطع بكام دلوقتي!!
طيب ياريت تتضامنوا شوية مع الناس الغلبانه برضه اللي مش بتحب تكوي الهدوم وانشروا فكرة ان اللبس المكرمش موضه ده غير إنه بيحسسنا بمعاناة المرأه العامله المستعجله اللي معندهاش وقت تكوي !! وبالمره ننشر فكرة ان الشراب يبقي فرده وفرده عشان ننقذ بيوت كتير ممكن تتخرب بسبب ضياع معظم فرد الشراب في ظروف غامضه !! و العريس يبقي رايح يتقدم لعروسه و هو ناكش شعره و لابس بنطلون مقطع وقميص مكرمش وشراب فردة وفردة و قاعد بكل ثقة في قلب الصالون !!
الاب: انت جاي تخطب ولا جاي تهرج؟
العروسة بتدافع : دي موضه يابابا!!
الاب: انت ازاي قاعد كده ؟انت مش عارف انت داخل بيت مين!! ازاي يااستاذ جاي تخطب ولابس بنطلون جينز مقطع من جمب واحد بس !! واضح انك مش هتقدر تعيش بنتي في نفس المستوي بتاعها!! انا اسف يااستاذ معنديش بنات للجواز!!
بقلم الكاتبة: رانيا كمال العربى
للمزيد: أبطال رياضيين ولا عيال مأنتخين.
