ازاي نعود الطفل على الصيام من غير ضغوط؟

كل الأمهات نفسها تعود أطفالها على الصيام وأداء الفرائض الدينية في رمضان. لكن في نفس الوقت رغبتنا في تعليم أولادنا مبادئ الدين مش لازم تدفعنا إننا نضغط عليهم أو نحسسهم إنهم مقصرين. لأن حتى لو أولادنا ماقدروش يلتزموا في العبادات فلازم نفتكر إنهم في عمر غير مكلفين فيه، وإن سن “الحلم” أو سن البلوغ هو ده وقت التزامهم. لكن قبل كده دي فرصة لكل أم وأب عشاب يحببوا الأطفال في أداء العبادات ويخلوهم يعملوها بحب مش بضغط وخوف. والمرة اللي فاتت اتكلمنا عن تعويد الأطفال على الصلاة. لذلك المرة دي هنعرف ازاي نعود الطفل على الصيام ونخليه متحمس ليه وبيحبه.

الوقت المناسب لتعويد الأطفال على الصيام

سن الالتزام بالصوم هو سن بلوغ الطفل، وفي الوقت ده هو بيكون ملزم بالصيام، وده بيختلف من طفل للتاني. لكن من المهم إننا نبدأ نعرف الأطفال يعني إيه صوم، ولازم نخليهم مندمجين معانا في أداء العبادات زي الصلاة والصوم والزكاة، لأن هي دي الطريقة التدريجية عشان يعرفوا الأركان الإسلامية والشعائر الخاصة بيها. وكل ما حاولنا نربي الطفل بجو مفعم بالطاعات والعبادات كل ما قدرنا نخليه شخص سوي ومحمي من مخاطر كثيرة.

علشان كده نقدر نعود الأطفال بشكل تدريجي على الصيام بداية من 7 سنين أو 8 سنين. وممكن الأطفال في عمر 5 أو 6 يصوموا ساعة واحدة أو ساعتين قبل المغرب أو في النهار عشان يتعرفوا على الفريضة، ومع الوقت يبدأ عدد الساعات في الزيادة.

للمزيد: هل تتأثر قدرة الأطفال على التركيز في رمضان؟

ازاي نعود الطفل على الصيام؟

في طرق كثيرة تساعدنا على تعويد الطفل على الصيام. كذلك تخليه يحب رمضان ويرتبط بشكل عاطفي بالطقوس والعبادات. علشان كده تعالوا نعرف سوا نعمل إيه خطوة بخطوة:-

التدريب على الصيام

التدريب هو الطريقة الأساسية لإتقان أي عمل بنقوم بيه. لذلك التدريب على الصيام بشكل تدريجي مهم علشان الأطفال يتعودوا على إتقانه. ومن هنا نقدر ندرب أولادنا على الاستيقاظ وقت السحور وبعدها نخليهم يحاولوا الصيام لمدة ساعتين أو 3 ساعات. 

كذلك ممكن نشجعهم على الامتناع عن الأكل قبل الفطار بساعتين أو ثلاثة، ومن هنا هيبدأوا يتعودوا على الفكرة ويمارسوها. ومع الوقت هيقدروا يزودوا عدد ساعات الصيام لنصف يوم. وبكده هيكونوا قادرين لما يكبروا يصوموا اليوم بالكامل.

وضع نظام للمكافأة

وهنا مش بننصح إن المكافأة تكون شيء مادي، لكن مكافأة للتشجيع. مثلاً ممكن نعمل جدول بعدد ساعات الصيام لكل طفل، أو جدول للطفل الواحد يكتب فيه كل يوم عدد الساعات اللي قام بصيامها، وفي أخر الأسبوع ممكن نحط له نجمة أو علامة الإنجاز على أكثر يوم. وده لأن الأطفال بيحبوا التحفيز وكل ما بنحاول نخليهم يشعروا بالإنجاز، هنلاقي انهم بيتحمسوا أكثر.

المصدر: 7 Tips To Help Them Get Started This Ramadan

منع المقارنات أو التقليل

زي ما المفروض إننا نشجع الطفل على الصيام، مش لازم نخليه يقارن نفسه بأي طفل تاني قادر إنه يصوم لوقت أطول. المطلوب مننا نشجع كل محاولاتهم من غير ما نحسس الأقل إنه مقصر أو إنه في مكانة منخفضة عن الآخرين.

لازم يعرفوا معنى الصيام

من المهم إننا نبدأ نعلم الأطفال المبادئ الدينية بطريقة مبسطة، ونعرفهم إن الصوم جزء من الطاعة، وإنه أمر من ربنا للمسلمين عشان يعرفوا يتحكموا في حياتهم واحتياجاتهم. 

الدمج في الأجواء الرمضانية

الأطفال بيعشقوا الطقوس، وبيحبوا إنهم يكونوا جزء منها. وأهم الخطوات اللي تخليهم يحبوا الصيام هي إنهم يشعروا إنهم جزء منه. علشان كده لازم ندي كل حد فيهم مسؤولية. مثلا حد يكون مسؤول عن تحضير السفرة. كذلك طفل يكون مسؤول عن اختيار فطار كل يوم وباقي الأسرة تساعده.

الأب عليه دور كبير إنه ياخد أطفاله لصلاة التراويح أو صلاة العشاء علشان الأولاد يدركوا الشعائر بصورة أفضل. كمان تعليق الزينة وزيارة الأهل وتعويد الأطفال على مساعدة الآخرين كل دي حاجات تساعدهم على فهم الصيام ورمضان.

اختيار الوجبات المناسبة

علشان نعود الأطفال على زيادة عدد ساعات الصوم بشكل تدريجي من المهم إننا نختار الوجبات المناسبة ليهم. لذلك يفضل الابتعاد تماماً عن الوجبات الدسمة أو الوجبات المملحة. كذلك لازم نمدهم بالأكل اللي بيحتوي على الألياف لأنه هيساعدهم على تحمل العطش لفترة أطول.

الإلهاء

ساعات الأطفال بيبقوا عايزين يتراجعوا. لكن دورنا إننا نقوي عزيمتهم وإرادتهم. علشان كده ممكن نساعد على إلهائهم من خلال الألعاب قبل الفطار، أو برامج الكرتون لحد ما وقت الفطار يجي ويفطروا مع باقي أفراد الأسرة.

إرشادات قبل تعويد الطفل على الصيام

تعويد الأطفال على الصيام قبل سن البلوغ مرتبط بإن الصيام ما يكونش بيأثر على حالتهم الصحية، ولازم نراعي الاختلاف بين صحة كل طفل والثاني. ولو لاقينا إن الصيام بيرهق الطفل صحياً وبدأ يكون مشقة عليه فالأفضل إننا نأجل الخطوة دي. 

وبالنسبة للأطفال المصابين بأمراض الضغط أو السكري أو أي أمراض تتعارض مع الصيام، فلازم الخطوة دي تكون تحت إشراف الطبيب المعالج ليهم.

للمزيد: الصلاة وتعليمها لأطفالك في شهر رمضان.