7 قواعد للتوفير عند شراء احتياجات المولود الجديد

بمجرد الاقتراب من فترة الولادة كل أم بتبدأ بتحضير احتياجات المولود الجديد. وطبعاً بتلاقي إن القائمة طويلة جداً ومكلفة جداً كمان. وهنا تبدأ المشكلة والشعور بالحيرة. وقتها بيكون فيه أسئلة كثيرة. مثلاً تشتري إيه وتتنازل عن إيه عشان توفر؟ وإيه الكميات اللي المفروض تكون عندها من كل حاجة؟ طب المستعمل ولا الجديد؟ وغيرها كتير. لكن الأهم إن كل الأسئلة دي بيكون الغرض الأساسي منها هو التوفير. لذلك تعالي النهاردة نقولك على  قاعدة للتوفير من أول يوم.

إزاي توفري وأنت بتجهزي احتياجات المولود الجديد؟

طبعاً أي أم بتتمنى تشتري كل الحاجات سواء كانت ضرورية أو لأ. هي بتحلم بتوفير عالم مثالي وأسطوري  عشان ابنها أو بنتها يلاقوه بمجرد وصولهم للحياة. لكن كل ده محتاج فلوس كثيرة. لذلك لازم تفكري في التوفيق بين أحلامك وبين ميزانيك. وفي القواعد الجاية هتلاقي الحل.

اشتري اون لاين لكن بحدود

شراء احتياجات المولود الجديد اون لاين من أهم قواعد التوفير. لكن كلنا عارفين إن فتح باب الشراء من على الإنترنت ممكن يدفعك كثير جداً وأكثر من الميزانية المحددة. لذلك من المهم إنك تحددي قائمة بأهم الاحتياجات وبعدها اشتركي في مجموعة محددة من المواقع أو الصفحات. وهنا بننصحك إنهم ما يزيدوش عن 3 أو 4. وكمان حاولي إنهم يكونوا من الصفحات اللي ممكن تبعتلك أخر العروض الخاصة به. وبكده حتقدري تحصلي على العناصر اللازمة فقط من غير ما تشتري حاجات كمالية خارج احتياجات طفلك.

اقرأي أيضا: احتياجات البيبي (2).. لنوم هادئ وبشرة ناعمة؟

اشتري كميات من المواد الأساسية

القاعدة الأولى هي إنك تشتري المنتجات بكميات قليلة زي الملابس مثلاً. لكن لو كان الموضوع يخص الحفاضات أو اللبن الصناعي فاحنا هنا بننصحك بالشراء بالجملة أو شراء كمية كافية لشهر. ويفضل إنك تشتري من تجار الجملة لإن هيكون في فرق سعر كبير. ثانياً مش لازم يكون ليكي ولاء لنوع محدد من المنتجات لو في عرض على نوع له نفس المميزات ومريح للطفل يبقى اختاري إنك توفري في المقام الأول.

متاجر الأدوات المستعملة

من حسن الحظ إن في عالم الإنترنت ظهرت مجموعة من المواقع والصفحات المتخصصة في بيع أدوات الأطفال المستعملة واللي في نفس الوقت بتكون لها جودة عالية. حاولي تحصلي على المنتجات المستعملة زي مخدة الرضاعة أو الباونسر أو كرسي الطعام. كل دي حاجات هيتم استخدامها لفترات قصيرة وبعد كده بيكون من السهل الاستغناء عنها. لذلك من الأفضل إذا كنت عايزة توفري إنك تحصلي على المنتجات دي من المواقع المضمونة.

استثمري في منتجات الوقت الطويل

على سبيل المثال لو قررتي شراء سرير البيبي هل تختاري السرير المناسب له في العام الأول فقط؟ ده معناه إن الطفل أو ما يوصل لعامين من المفترض إننا نشتري سرير جديد. الطريقة دي معناها إهدار للفلوس. اختاري دائماً المنتجات اللي تقدر تكمل معاكي لأطول وقت. مثلاً سرير البيبي اللي بيتكون من أكثر من مستوى عشان يناسب مراحل عمره المختلفة.

كمان ممكن توفري في المنتجات اللي لها أكثر من استخدام. مثلاً السرير المتحرك اللي تقدري تستخدميه كسرير وكذلك منضدة للتغير وبيكون فيه مكان للاحتفاظ بأشياء الطفل ومستلزماته.

التوفير عند شراء الملابس

ملابس الأطفال أمر محير جداً. لكن أهم قاعدة نقدر نقولها هي ” عدم شراء الملابس غالية الثمن جداً”. أهم حاجة لازم تدوري عليها هي الملابس المصنوعة من خامات مريحة للطفل زي القطن. لكن بعد كده لازم تحصلي على الأنواع اللي أسعارها مناسبة. لأن الملابس بتتعرض لكل عوامل التلف وبالتالي هتلاقي نفسك محتاجة تشتري كميات كبيرة. 

من ناحية ثانية بلاش تكدسي كميات كبيرة من الملابس في فترة الحمل. الأطفال ممكن يمروا بطفرات نمو سريعة وتبقى الملابس المخزنة صغيرة عليهم جداً ومش هيتم استخدامها بأي شكل.

للمزيد: إزاي توفري وأنت بتشتري هدوم البيبي؟

اتفقي مع العائلة والأصدقاء

طبعاً بعد الولادة في هدايا كثيرة بتيجي للأم والمولود. وهنا ممكن تلاقي كميات زيادة من نفس الهدية أو هدايا كمالية إنت مش محتاجها. أما الحل البسيط هو إن الأصدقاء والأهل يعرفوا إيه الحاجات اللي انت محتاجاها وبالتالي تقدري تحصلي عليها من خلال هداياهم. وده الحل العملي للجميع وفي نفس الوقت هيساعدك توفري كثير.

لا مزيد من أحذية الأطفال

لو بدأتي في شراء احتياجات المولود من المؤكد إن شكل الأحذية هيكون مغري ليكي جداً. لكن في أول شهر الطفل مش بيكون في حاجة للأحذية مطلقاً. بل على العكس الأطفال بيضيعوا كل الأحذية الخاصة بيهم. وفري الفلوس واحصلي على جوارب مريحة ومن خامة جيدة لأنها أنسب حاجة للطفل في الوقت ده.

للمزيد: احتياجات البيبي الأساسية (1)