راجعين يا هوى..هل شخصية خالد النبوي “بليغ” توكسيك؟
مسلسل راجعين يا هوى واحد من المسلسلات الرمضانية اللي نالت إعجاب ناس كتيرة جداً. وبتعتبر من المسلسلات اللي على قمة المشاهدة. أما الفنان خالد النبوي فهو في المسلسل ده بيقدم واحد من أجمل أدواره وهو دور بليغ أبو الهنا. لكن من كام حلقة بدأت الاتهامات توجه للشخصية ويقال عنه إنه توكسيك..يا ترى هل ده حقيقي.
بليغ أبو الهنا
بليغ أبو الهنا اللي بيلعب دوره الفنان خالد النبوي شخصية في غاية الخفة واللطف، هو شخص دمه خفيف وعنده كاريزما، وكمان عنده حلو بإنه يجمع عيلته من تاني. لكن المفارقات والصعوبات بتخلي بليغ أبعد ما يكون عن تحقيق الهدف ده. ده بالنسبة لعنصر القصة الأساسي، أما الجانب المظلم في شخصية بليغ فبيظهر في ملمحين.
في البداية بنعرف إن بليغ ساب حبيبته يوم كتب الكتاب وسافر، ولما رجع مرة تانية كان إحساسه بالذنب تجاه اللي عمله ضعيف جداً، وفي نفس الوقت أظهر من تصرفاته إنه مشاعره تجاه حبيبته الأولانية انتهت واللي بتعلب شخصيتها الفنانة هنا شيحا.
من ناحية تانية بليغ أبو الهنا بيبدأ يتعلق بشخصية دكتورة ماجي “الفنانة نور”..وبتجمع بينهم صداقة أقرب للإعجاب. لحد كده احنا ممكن نكون قدام قصة عادية، لكن اللي مش عادي هو ظهور بليغ في أكثر من مشهد وهو بيحاول يقرب للحبيبة الأولى لكن بيهرب قبل ما يديها أي وعد. وفي نفس الوقت يجري على ماجي وبيحكي لها.
ولأن ماجي طبيبة نفسية بتفسر تصرفات بليغ على إنها تصرفات شخصية توكسيك. لأن بليغ كان عنده تعلق كبير بوالدته، ولما ماتت فهو محتاج وجود ست جنبه طول الوقت. وبتنصحه إنه يوقف أي علاقة عاطفية لحد ما يتعافى. لكن هل تشخيص الشخصية التوكسيك مناسب لشخصية بليغ..لذلك تعالوا نعرف إيه هي سمات الشخصية التوكسيك.
علامات الشخصية التوكسيك
الشخصية التوكسيك أو الشخصية السامة ممكن نعرفها من خلال تصرفات كتيرة. وممكن الشخص يجمع أكثر من علامة علشان تدل على إنه شخص سام وإنه بيدخلنا في علاقات سامة. لكن هل الصفات الجاية بتنطبق على بليغ أبو الهنا
- الأنانية، الشخص السام شخص أناني، وكل حاجة بيعملها مش بيفكر في تأثيرها على الآخرين. لكن كل اللي يهمه إنه يكون مبسوط وبس.
- إلقاء اللوم على الآخر. وده من أهم صفاته، لأنه من الصعب يعترف بغلطه ودايماً شايف إنه صح. لكن الكارثة إنه بيقدر يوصل الطرف اللي قدامه إنه يقتنع إن الغلط فيه وبيضعف ثقته بنفسه.
- مش بيركز على الأشياء الإيجابية في الأشخاص المحيطين بيه، ودايما بيركز على الأشياء السلبية.
- الغيرة من الآخرين، لأنه مش بيقتنع إن في حد ذكي وفاهم غيره، وبالتالي كل الناس اللي بتنجح بتنجح في رأيه عن غير استحقاق.
- الشخص السام ممكن يلجأ للعنف النفسي أو العنف اللفظي في التعامل مع الآخرين، خاصة شريكته أو حبيبته.
دي أبرز صفات الشخص السام، ياترى في رأيك بليغ أبو الهنا منهم، ولا ما ينفعش نحكم عليه إلا بعد نهاية الأحداث.
