مع أو ضد..الست تاخد أجر مقابل الأعمال المنزلية
الحياة الزوجية حياة فيها كمية كبيرة من الأسئلة. لكن الإجابات الحادة والقاطعة مش دايماً بتكون هي الإجابات الصحيحة. بس يا ترى إيه هي أصلاً الإجابات الصحيحة؟ وهل كل الأمهات والزوجات ليهم نفس الوضع وطريقة التفكير؟ أكيد لأ. علشان كده فكرة البحث عن إجابة نموذجية مش أفضل فكرة. لكن في نفس الوقت بتفضل فيه مواضيع محتاجين نناقشها ونفكر فيها من زوايا كثيرة. مثلاً هل انت مع أو ضد إن الست تاخد أجر مقابل الأعمال المنزلية؟ قبل ما تردي تعالي نفكر سوا.
أجر مقابل إيه ولا إيه ولا إيه
دلوقتي نفترض إننا مع الجزء الموافق على إن الست تاخد آجر مقابل الأعمال المنزلية، وده معناه إنها هتاخد أجر مقابل الطبخ، تنظيف البيت، الغسيل، تحضير أدوات الأطفال، شراء الطلبات، صيانة الأجهزة، المكواة إلخ إلخ إلخ..يعني احنا المفروض ندي الأم مرتب 7 أشخاص تانين ممكن يقوموا بدورها..كده بحسبة بسيطة تاخد كام؟؟
هل ده واجب ولا فضل؟
وهنا نيجي لسجال طويل عريض لا ينتهي، وهو إن في ناس شايفة إن مسؤولية الأم في البيت جزء من واجبتها. لكن من ناحية تانية في ناس بتقول إنه فضل هي بتتفضل بيه. خصوصاً إن في بعض من الآراء الشرعية بتقول إن من حق الست إن يكون لها مساعدة في الأعمال المنزلية، وفي حديث له ذكر د.علي جمعة عن الإمام النووي قال عن خدمة الزوجة لزوجها ” سنة حسنة سارت عليها نساء المسلمين، هن يقمن تفضلا منهن بخدمة الزوج ورعاية الأطفال فهذا من الفضل، وننصح النساء أن تزيد منه”.. لكن نتيجة للظروف الاقتصادية الحالية بقى من الصعب، وبالتالي الست شالت المسؤولية كاملة.
على أرض الواقع
على أرض الواقع خلينا نفكر في شكل قد يبدو أقرب للعلاقة الصحية، العلاقة اللي مش بتعتمد على الحقوق والواجبات الحادة والمشروطة، لكن الحقوق والواجبات اللي قائمة على الحب والتعاون والمشاركة. في رأيي إن أمهات وزوجات كثير بيحبوا يعملوا شغل البيت بإيدهم، وبيحبوا يقدموا لأزواجهم أبنائهم أحسن رعاية، وده في حد ذاته جزء من الحنان اللي ارتبطنا بيه بأمهاتنا. لكن من ناحية ثانية فالأم مش المفروض تقوم بكل شيء وباقي أفراد الأسرة في عالمهم ومش بيقدموا أي تعاون، زي ما بيكون في عطاء لازم يكون فيه تعاون وبالتالي الحقوق والواجبات حيندمجوا ويبقوا كيان واحد ما ينفعش ينفصل.
دي مجموعة جوانب حبينا نناقشها، لكن هتفضل الإجابة عندك كأم وزوجة..ياترى شايفة إن أجرك مقابل كل مسؤوليات البيت يكون إيه ولا يكون كام.
للمزيد: امرأة برج الحوت..ما هي أهم عيوبها.
