التجربة
الأطفال بطبيعتها عندها فضول وبتدور طول الوقت على التجارب الغريبة والمختلفة عشان تعملها. و تفضل الأم واقفة حيرانة مع ولادها من أفعالهم وتصرفاتهم وتجاربهم. لكن النهاردة بحكيلكم عن التجربة مع اولادي. صحيح هي تجربة عادية بس خرجنا منها بلحظات حلوة وضحك واتعلمنا منها حاجات كتير.
أنا عايز أبو فروة
جربنا فواكه جديدة بالنسبة لاطفالنا مش اعتيادية. وكان سؤالي ليهم ما فاكهة ربنا كتير و كلها فيتامينات لية نجرب الحاجات اللي مش عارفين طعمها؟. لكن مع إصرارهم وافقت وكل واحد منهم اختار نوع، ابني اختار أبو فروة (الكستناء).
كتير ناس بتحبه وبتاكله ويمكن كلته مرة وانا صغيرة وما استحسنتش طعمه لكن مهما حكيت لابنك هو عاوز يدوق. ماهو مش هتدوق مكانه يعني!. وكان رد ابني ما يمكن يعجبني انا. رد منطقي مش بضرورة اللي ما يعجبنيش مايعجبوش مش لازم ولادنا يبقوا نسخة مننا وخلينا نجرب. اشتريت وشوفت الطريقة وعملته وللأمانة هو معجبنيش تاني و معجبهوش برضه وحسيت بحالة من نشوة الانتصار لأن وجهة نظري صح.
بس كلها يومين وكان اتفق هو وأخته على تجربة نوع تاني وكان المرة دي اختيار بنتي ورجعوا ومعاهم الافوكادو وطبعا هو فاكهة مليانة فيتامينات. ممكن اشربها عصير مع فواكه تانية بس مش هكلها برضه. لكن بنتي قالتلي على طريقة طلعتها من اليوتيوب وفعلا كلته وعجبها وعجبني برضه، وطلعت طرق كتير وانا كمان و قررنا نجرب نعمله بكذا طريقة.
الدرس المستفاد من التجربة
خرجت من تجربة الأكل المختلف بكذا نقطة:-
- ان مش لازم كل جيل يبقى زي اللي قبله.
- الجيل ده بيحب التجارب والفضول مالي قلبه خلينا نوجههم يجربوا صح ونجرب معاهم.
- مش بيندموا على تجارب عدت وفشلت احنا اللي ممكن نحسسهم بالفشل.
- بلاش تأنيب ضمير في اي تجربة تفشل خذوا الامور بضحك واتعلموا سوا حاجة منها.
- احنا مصدر لأولادنا للمعلومات والتجارب بلاش نبقى منفرين عشان لما ولادنا تكبر ما تدورش على مصادر تانية وساعتها التجارب مش هتبقى مجرد أكل والسلام.
جرب وافرح مع ابنك انت بتتعلم معاه وبتفهم يمكن حاجات عمرك ما عملتها وهو جه الدنيا عشان يونسك في طريق التجربة.
