5 حاجات تخلي جوزك يستحق أجمل هدية لـ عيد الأب 

الاحتفال بعيد الأب يعتبر واحد من الاحتفالات العالمية في العديد من الدول. لكن يمكن في مجتمعنا العربي مش بياخد الاهتمام المطلوب. وطبعاً كل الآباء يستحقوا الاحتفال. لكن في آباء يستحقوا إننا نعملهم احتفال فوق العادة خصوصاً لو كانوا بيهتموا بشوية تفاصيل. طب إيه سبب احتفال عيد الأب ومين هو الأب اللي يستحق احتفال عالمي جداً؟ 

سبب الاحتفال بعيد الأب

بدأت فكرة الاحتفال بعيد الأب في الولايات المتحدة الأمريكية على يد فتاة إسمها سونورا لويس سمارت دود. وده لما كانت بتحضر موعظة دينية في عيد الأم. البنت اقترحت تكريم والدها لأنه ربى 6 بنات بعد وفاة والدتهم. وكان أول احتفال بعيد الأب عام 1910.

لأن الأب يستحق الكثير

كلنا متفقين على إن عيد الأم من أكثر الأعياد اللي بيتم الاحتفال بها. لكن عيد الأب حظه قليل ومش بياخد الاهتمام المطلوب. يمكن لأن الجانب العاطفي عند الأم دايماً ظاهر لكن عند الأب مستخبي. ويمكن لأن الآباء بيعملوا في صمت. لكن في النهاية كل أب بيقوم بواجباته ناحية الأم والأولاد هو أب يستحق الاحتفال والتقدير لأخر يوم في عمر الكون. بس يعني في شوية تفاصيل ممكن تخلي الاحتفال عالمي وتخلي دور الأب لا يمكن يتنسي في أي بيت. طب إيه هي التفاصيل دي:-

بياخد باله من البيبي بالليل

مين هو أفضل أب في العالم؟ بالتأكيد الأب اللي بيشاركك كل تفاصيل تربية البيبي. لكن لأن في ثقافتنا إن دور الأب هو العمل ودور الأم هو البيت هنلاقي آباء كثير بيرموا كل مسؤولية التربية على الأم. أما لو كان جوزك متعاون وبيقوم كل يوم بالليل يستلم منك الوردية عشان تقدري تنامي. فانت معاكي هدية يا عزيزتي.

صارم وحنين في نفس الوقت

الأم هي اللي دايماً في وش المدفع. يعني طول النهار مع الأولاد وبالتالي هي اللي بتزعق وتعاقب وتاخد القرارات الصارمة جداً. يعني هي زي ما بيقولوا “البعبع”. ومن هنا ولأن الأب يدوبك يجي ساعة أو ساعتين يبدأ هو يبقى مصدر الحنان وإلغاء كل الأوامر. أما بقى لو جوزك صمم على تنفيذ أوامرك واستلم الراية شوية منك وبدأ يقود الحرب في البيت ده لازم يتعمل له تمثال أكبر من تمثال الحرية.

بيساعد في المطبخ وترتيب البيت

للأسف احنا اتربينا على إن تحضير الأكل والشرب وتنظيف البيت مهمة الست. بالتالي هي اللي بتشيل كل حاجة من الصغيرة للكبيرة. أما هذا الرجل الشهم الشجاع اللي يجي بكل جسارة يقولك المطبخ عليا النهاردة، أو انا حلم الغسيل وانت طبقيه فده يا عزيزتي الأم عملة نادرة، حاجة مش بتلاقيها كل وقت. لكن لو ده جوزك قومي صلي لربنا كل يوم 10 ركعات شكر.

بيستحملك وانت بتحكي له عن جروب الماميز

كلنا لازم نعترف إن جروب الماميز سبب انهيار أعصاب أي حد عاقل في الدنيا. لكن لو في حد عاقل في البيت زي جوزك عنده من سعة الصدر إنه يسمع كل تفصيلة حصلت على الجروب ويهدي أعصابك ويقولك إن كل حاجة هتبقى كويسة من غير ما يبلغ البوليس فده قائد عظيم ورجل حكيم لن تجدي مثله أبداً.

ذاكرته قوية ومش بينسى

الآباء بينسوا تفاصيل بسيطة شوية. مثلاً ميعاد التمرين الخاص بالأولاد. أو إنهم يجيبوا الأولاد من المدرسة وبالتالي بتلاقي دايماً الأولاد في مكان ما لحد ما يبان لهم صاحب. عشان كده بابا اللي فاكر كل تفصيلة وعارف امتى الولاد بيخلصوا تمرين وميعاد اجتماع أولياء الأمور ده أب مثالي جميل جمال مالوش مثال.

طبعاً كل الأباء يستحقوا هدية في عيد الأب. لكن كل أب صنع فرق وساب قيمة وقدر إنه يكون مصدر سعادة وبهجة ودعم لكل فرد من الأسرة يستحق فوق الاحتفال ألف احتفال. وكل سنة وكل أب بخير وسعادة.

 .