هصحيك يعني هصحيك

النهاردة في التجرية الجهنمية هبة أمين هتحكي لنا عن التحدي الأكبر بتاع كل يوم وولادك رايحين المدرسة..وقرارها الأخيرة ” هصحيك يعني هصحيك “.

هصحيك يعني هصحيك

ابني الصغير دخل مرحلة الكي جي السنة دي. لكن ومع كل الفرحة اللي كان ينتظرها لدخول المدرسة، وحماسه لبداية الدراسة. إلا انه بعد تلات ايام فقد حماسه لما عرف انه هيصحى بدري كل يوم وان مفيش اجازة الا اخر الاسبوع.

وكمان حدث ولا حرج بقى على فكرة الواجب واني ازاي كطفل صغير كده ارجع البيت واقعد اكتب واجب ولازم اخلصه والميس تشوفه. اية ظلم العالم ليا ده يعني بدل ما ارجع  و اقعد انتوخ قدام الكرتون، مطلوب مني اكتب واجب وانام بدري واصحي بدري.

وأصبح الصحيان بدري معركة كل يوم بتبدأ في تمام الساعة السابعة حتى ميعاد ذاهبه للمدرسة الساعة الثامنة.

كل يوم خناقة جديدة

في تمام السابعة تبدأ محايلتي له انه يصحى ويبدأ هو يعيط. ويدبدب انه مش نازل ويجري في الشقة وانا اجري وراه. محاولة ارتداء ملابسه اللي كانت شبه مصارعة الثيران. ومانكرش ان صوتي كان بيعلى وبفقد اعصابي لان مافيش فايدة. ده غير محاولات استعطافك من بطني بتوجعني. او اني سخن او اصلي عاوز انام . لا يا ماما انا سقعان وهكذا.

افكار جديدة كل يوم

ما بقاش في ايدي غير اني لازم افكر في أفكار مختلفة تجذبه عشان يقوم من السرير اصلا. وكمان ازاي اخليه يبقى حابب فكرة المدرسة وعمل الواجب.

1/اول حاجة دور في دفاترك القديمة. انت كنت عيل برضه وكنت بتحس باضطهاد انك نازل وسايب السرير لوحده. كان بيهون عليك الموضوع لو مامتك صحيتك على حاجة بتحبها. اكله فطار حلوة. لعبة صغيرة جديدة، كذلك حكاية حلوة ماما تحكيها لك تشجعك بيها.

2/ صحي ولادك بدري بوقت كفاية قبل معاد المدرسة. وده معناه النوم في وقت محدد، عشان الطفل يحس براحة، لذلك لما بيصحى قبلها بوقت بيقدر انه يستوعب فكرة النزول اصلا وأثناء الفترة من الصحيان نزول اشغل افكاره بقصص وحكاوي عن المدرسة و عن قصصك وانت صغير بس بطريقة مرحة وبلاش كلمة انا لما كنت قدك كنت بروح اضب الجرس قبل مدير المدرسة، عشان الجيل الجديد مش بيهتم بالكلام ده.

3/ كل قديم له بريقه، الخطوة دي ذهبية بالنسبة ليا ويارب تجيب فايدة معاكم، الاطفال بتميل لاغاني الاطفال القديمة وللبرامج اللي ما شفوهاش، ده صندوق علي بابا بالنسبة لهم.

كل يوم الصبح صحي ابنك على اغنية حلوة من اغاني الاطفال واضحكي معاه وارقصي كمان وخلي الوقت ده ممتع افتكري طفولتك وياه ، ممكن تشغليه له حلقة كرتون كنتي بتحبيها. كذلك احكيله قصة حلوة قبل ما ينزل واختاري قصص قصيرة عشان الوقت.

اخيرا، الصحيان بدري للمدرسة مجهود على الطفل وعشان يتعود حياخد وقت بس لازم يبقى حابب كل لحظة بيقضيها قبل ما ينزل ويستنى يصحى كل يوم بدري عشان ماما محضرة له مفاجأة حلوة في انتظاره.

للمزيد: وساعات ببقى نفسي أقولهم ” ابني مختلف”.