تنمية مهارات المذاكرة والتركيز والنشاط..نعملها ازاي؟
تنمية مهارات المذاكرة والتركيز عند الأولاد مش مهمة صعبة أبداً. الموضوع كله يعتمد على كلمة واحدة وهي “التحفيز”. كلمة سحرية ولها مفعول كبير يقدر يخلي يوم المدرسة يوم خرافي. لذلك تعالوا نحاول نبدل الكسل والتعب والشعور بالزهق من المذاكرة لحالة من النشاط والحركة. يعني من الآخر ياللا نخلي وقت المدرسة والدراسة وقت مرح ويمر بسهولة.
اقرأي أيضا: عشان التركيز والمذاكرة ما تنسيش أهم الأكلات دي
تنمية مهارات المذاكرة والتركيز تبدأ بالنشاط
أيوة، طول عمرنا بنردد كلمة واحدة يبدو إننا نسيناها وهي “العقل السليم في الجسم السليم”. لكن في وقتنا الحالي نسبة كبيرة من الأطفال بيقضوا مدة لا تقل عن 7 ساعات لمشاهدة التلفزيون والإنترنت، بكده يبقى من غير المنطقي إننا نطلب منهم التركيز في المذاكرة. لأن الجسم في حالة من السكون وبالتبعية العقل هيعمل زيه بالظبط. يبقى البديهي هنا إننا نستبدل وقت التلفزيون وألعاب الفيديو بالحركة. لكن نشجعهم إزي؟ ده يحصل بالخطوات اللي جاية:-
تنمية النشاط الحركي عند الأولاد
- نبدأ باستخدام تقنيات التحكم في الإنترنت، يعني نحدد الوقت المتاح للأطفال لاستخدامه. لو الأطفال فوق ال، 7 سنين نقدر نساعدهم هما نفسهم على استخدام تقنيات المراقبة الذاتية ويحددوا الوقت المتاح ليهم.
- وجود نشاط ممتع للطفل، يعني مش مفضل أبداً إننا نجبره على ممارسة رياضة هو أو هي مش بيحبوها. لازم النشاط يكون اختياري والطفل يحس معاه بالمتعة. من غير المتعة الأطفال هيكرهوا أي نشاط بدني بيعملوه.
- لازم نكون قدوة. وهنا مهم نعترف بقاعدة أساسية وهي إن الأطفال بتقلد أكثر ما بتسمع الكلام. عايزين أولادنا يكونوا أشخاص نشيطة لازم إحنا نكون كده في الأول. لو في صعوبة في ممارسة نشاط رياضي في بدائل كثير. ليه ما نجربش تخصيص نصف ساعة كل يوم للمشي في أي مكان؟! استخدام السلم بدل الأسانسير نشاط حركي مهم.
- من المهم نحاول توفير ألعاب حركية في البيت تكون بديلة عن ألعاب الفيديو. ألعاب زي الكرة لو مساحة البيت تسمح. أو لعبة الحبال. وغيرها في كثير.
- غير مسموح إننا نجبر الأولاد على ممارسة النشاط الحركي، في فرق بين التحفيز وبين الإجبار، ولو قمنا بنشاط مشترك معاهم حتكون دي أهم خطوة لتحفيزهم.
خطوات تنمية مهارات المذاكرة والتركيز
هنا نيجي للنقطة المهمة. إيه هي الطرق المساعدة في تنمية مهارات المذاكرة والتركيز؟ قبل ما نعرف الطرق لازم نقول إن مهارات زي القدرة على التركيز والتحصيل الدراسي لها عضلات زي عضلات الجسم بالظبط. يعني كل ما حصل لها تمرين أكثر كل ما قدرنا إننا ننميها ونزودها. في أطفال مولودين بقدرة طبيعية على التركيز والمذاكرة وأولاد أقل منهم. لكن ده مش معناه الثبات في المكان. الطرق الجاية هتساعدنا ننمي المهارات دي عند الأولاد.
التركيز على مهمة واحدة في وقت واحد
أكبر غلط ممكن نأثر بيه بشكل سلبي على الأولاد إننا نطلب منهم التركيز على أكثر من مهمة في وقت واحد. تعدد المهام في وقت واحد يؤدي إلى تقليل تركيز الأطفال. الخطوة الأساسية هنا إننا نساعدهم على التركيز في مهمة واحدة. مثلاً لو الأطفال في مرحلة مبكرة من الدراسة هتكون المهمة الأساسية هي مراجعة حروف الأبجدية وصورها مع أغنية مخصصة للفكرة دي. أما لو الأطفال أكبر شوية ممكن تكون المهمة اللي يشتغلوا عليها هي حل مسألة رياضية خاصة بالقسمة في وقت محدد.
النشاط الحركي للمساعدة على تنمية المهارات والذاكرة
ساعات بنحاول نكون أذكى من أولادنا ونأجل النشاط الحركي الخاص بهم بعد المذاكرة، إحنا كده بنعتقد إننا بنساعد على تحفيزهم على إنهاء مهمتهم بسرعة عشان يلعبوا. بس للأسف إحنا كده بنساعد على حدوث حالة التشتت الذهني لهم. البدء بالنشاط الرياضي مهمة جداً، والنشاط ده ممكن يكون بسيط جداً زي.
- تخصيص وقت لركوب الدراجة.
- اللعب في المكان المخصص داخل الحي.
- الرقص على الموسيقى المفضلة أو الأيروبكس.
تخصيص مساحة للمذاكرة
دي واحدة من أهم الخطوات وهي وجود مساحة مؤهلة للمذاكرة. ركن المذاكرة مش محتاج لمجهود كبير لتجهيزه، لكن أهم صفة فيه هي إنه يكون بعيد عن أي شيء يقلل التركيز. يعني يكون بعيد عن التلفزيون وخالي من أجهزة التابلت أو التليفونات المحمولة. وبعيد عن المكان اللي فيه أشخاص بتقوم بأي أنشطة ممكن تبعد الأطفال عن التركيز في مهمتهم.
تخصيص فترات منتظمة للراحة
أمهات كثير بتفرح جداً لو الطفل بدأ مذاكرة واستمر فيها بدون فواصل لساعات طويلة. النظرية دي خاطئة تماماً، البقاء وقت طويل مع الكتب مش دليل أبداً إن الطفل كان مركز. لازم خلال وقت المذاكرة يكون في وقت محدد للراحة. الوقت مش لازم يكون طويل لكنه مهم عشان المخ يقدر يجدد طاقته من جديد. في حاجات بسيطة من الأطفال يعملوها في الوقت ده ومنها:-
- كما يجب الحصول على مشروب صحي.
- كذلك التمشية في البيت لفرد العضلات.
- تناول وجبة خفيفة أو سناكس.
التنفس بعمق من البطن
للأسف كثير مننا ما يعرفوش أهمية التنفس بعمق في تقليل التوتر وتنشيط المخ، حاجة جميلة جداً لو علمنا أولادنا إن أول خطوة لازم يعملوها لما يقابلوا مهمة صعبة هي التنفس بعمق من البطن، التنفس بيقلل التوتر ويساعد المخ على التفكير بشكل أفضل. بالخطوة دي هنقدر نحفز مراكز التركيز بشكل كبير.
تنمية مهارات الذاكرة
نجيب محفوظ قال في واحدة من أقواله المأثورة “آفة حارتنا النسيان”.. ممكن لو جاز لينا إننا نقول آفة أولادنا النسيان. بس أكيد في طرق تساعد على تحفيز الذاكرة، ودي ممكن نلخصها في النقاط الجاية.
- تنمية المهارات البصرية. بمعنى إننا نشجع الأطفال على استخدام الخيال البصري. وهنا ممكن نطلب منهم تنظيم جدول لمهمات مختلفة. وقبل ما يبدأوا في كتابته نطلب منهم يشرحوا لينا هيرسموه إزي. إيه ألوانه وتقسيمه، كل ده يقدر ينمي مهارات التخيل اللي هي في الأساس مهارات الذاكرة.
- لو الأولاد بينسوا المعلومات اللي احنا بنشرحها ممكن نعكس الأدوار، فنخلي أولادنا هما اللي يعلمونا، ممكن بعد حصولهم على درس معين مش لازم نطلب منهم إنهم يسمعوه بالطريقة التقليدية، لكن يعلمونا الحاجات اللي هما فهموها ويحاولوا يخلونا نفهمها، الطريقة دي لا يمكن تفشل في تثبيت المعلومات في الذاكرة.
- استخدام الألعاب المحفزة للذاكرة البصرية، وخاصة الألعاب الموجودة على الإنترنت ومنها البازل.
اقرأي أيضا: شجعوا أولادكم على المذاكرة بـ 5 طرق مجنونة وذكية
