وقت المدرسة هو الوقت المناسب عشان نعلم الأولاد النظام. أما الفكرة المغلوطة دايماً إننا لازم ما نخليش الأولاد يعملوا أي حاجة عشان يتفرغوا للمذاكرة. بس هل ده بيحصل؟ هل الأولاد بيتفرغوا للمذاكرة ولا إحنا بنزود وقت التدليل؟ الحقيقة إن مساعدة الأولاد في المهام المنزلية مش هو اللي حيأثر على وقت المذاكرة، لكن عدم تحملهم للمسؤولية هو اللي هيكون سبب في ده. طيب نقنعهم إزاي؟ ونعمل معاهم إيه؟ تعالي وأنا أقولك.
اقرأي أيضاً: خطة الاستيقاظ للمدرسة.. حتى يكون الصباح سعيداً
وقت المدرسة والتخلص من الفوضى
طبعاً وقت المدرسة البيت بيتحول لمعسكر. في ملابس مرمية في كل جزء في البيت وأم بتعمل جولة يومية عشان تلمها. كل ركن في كراسة أو كتاب أو قلم. طبعاً المطبخ عبارة عن مستودع لعلب اللانش بوكس الفاضية وآثار الفطار والغداء والعشا. الألعاب مش بترجع أماكنها أبداً. الحمام حدث ولا حرج. وفي نهاية اليوم في أولاد حلوين بيدخلوا سرايرهم ويسيبوكي مع كم الفوضى دي. الحل مش اليأس الحل إنك تتبعي الخطط دي
خطط ترتيب المنزل في وقت المدرسة
دلوقتي وقت التحدي
طبعاً في نهاية اليوم لو كل أم اتحولت لأفاتار عشان تقنع الأولاد إنهم ينظموا مكان مذاكرتهم فده مش هيحصل. الحجة الأساسية هي وقت المدرسة والنوم إلخ إلخ. لكن ممكن ننهي كل ده لو عملنا تحدي كل يوم. لو عندك طفل أو أكثر خصصي نص ساعة لمهمة معينة. مثل رجوع الكتب لمكانها وتنظيم المكتب. ترتيب الملابس وتجهيز اللي محتاج منهم للغسيل. لو شعروا إن في منافسة وتحدي المكان هيتحول لخلية نحل. بس التحدي ممكن ينجح جداً لو كان في تلويح بمكافأة صغيرة حتى لو ربع ساعة من اللعب الزيادة.
تحضير بطاقات المهام
لو توزيع المهمات المنزلية شيء مرهق كل يوم يبقى الحل في البطاقات المكتوبة. أول الأسبوع ممكن تحضري بطاقات يومية لكل طفل. كل واحدة فيهم هيتكتب فيها المهمات اللي هيعملها طول الأسبوع. وطبعاً هنراعي إن المهمة تكون مناسبة للعمر. مثلاً ممكن تكون مسؤولية الطفل إنه يعمل الحاجات دي ( تحضير الملابس اللي محتاجة للكوي، التخلص من الأدوات المستعملة، ترتيب المكتب بشكل يومي، تنظيف اللانش بوكس. غسل الخضروات والفواكه). أما في آخر الأسبوع هتجمعي أكثر حد حصل على نقط أو ممكن تخلي المكافأة جماعية لو عملوا واجبهم بشكل جميل.
كل طفل له تخصص
ممكن من خلال تكرار ترتيب وتنظيم البيت هتقدري تعرفي إيه أكثر مهمة حد متميز فيها، علشان كده ممكن نخليها مهمة أساسية، مثلاً البنات ممكن تفضل غسل الأطباق أو تحضير أجزاء من الأكل، الأولاد ممكن تفضل شراء الاحتياجات طبعاً لو كان أولادنا وصلوا للسن المناسب لده. لو صغيرين في مهمات زي إن كل لعبة ترجع لمكانها. أو ترتيب السرير وتعليق الملابس في مكانها.
مغامرة جديدة وقت المدرسة
كذلك من الممكن أن بشوية أفكار نحفز الأطفال بشكل كبير. تعالي نخلي يوم للمغامرة. ممكن نخفي مجموعة من العملات المعدنية أو أي شيء في أماكن مختلفة يقدروا يلاقوها وهما بيرتبوا البيت. وقتها هتكون المغامرة والاكتشاف هما الأساس اللي يشجعهم على المهمة.
خلي المهمة ممتعة
كذلك من الممكن أن نحول وقت المهمة من وقت صعب لوقت من المرح. يعني ليه ما نرتبش البيت وفي الخلفية أغاني جميلة ومسلية. اتحركي مع أطفالك وشجعيهم وخليهم يحسوا إن تحمل المسؤولية شيء ممتع مش شيء ممل.
كده نكون عرفنا خطوات بسيطة نقدر نقنع بيها أولادنا أنهم يكونوا مسؤولين في وقت المدرسة. ودي برضه طرق مهمتها إنها تخفف الضغط عن أعصابك في الفترة دي وتقللي المجهود الناتج عن المعارك اللي بتحاربي فيها في وقت واحد.
