ازاي نصرف فلوس أقل واحنا بنشتري زي المدرسة؟
بالرغم إن في مدارس بتفرض على أولياء الأمور شراء زي المدرسة من خلالها. إلا إن من حسن الحظ إن في مدارس بتترك الحرية لشراءه من أي مكان. وده يعتبر متنفس لكل أولياء الأمور وفرصة كويسة لدفع مبلغ أقل في ملابس المدرسة. عشان كده لو لسة ما بدأتيش التجربة خصوصا مع وجود مدارس هتبدأ في شهر أكتوبر، ياللابينا نعرف توفري فلوسك إزاي.
إرشادات مهمة قبل شراء زي المدرسة
قبل ما تشتري زي المدرسة وتدفعي فيه فلوس كثيرة لازم تقرري العكس. أو بمعنى أصح تشتري بطريقة عملية تقدري من خلالها تحصلي على المنتجات المهمة واللي لها جودة عالية في نفس الوقت. وعشان تعملي ده إنت محتاجة الخطوات الجاية
استخدام الملابس السليمة
خرجي ملابس السنة اللي فاتت. ابدأي اعملي تقييم للقطع اللي لسة سليمة. مثلا القمصان اللي ماعلهاش بقع. الياقة سليمة. القماش لسة محتفظ بلونه.
ممكن شوية تعديلات ترجع القطعة جديدة تماماً. مثلا تركيب أزرار جديدة. التأكيد على السوست إنها بتشتغل بشكل كويس. لو فيه بنطلونات قصرت على الأولاد أو حتى السكيرت تقدري تبصي إذا كان فيهم تانية تخلي المقاس مناسب أو لأ.
مش بس كده لو عندك أكثر من طفل في مراحل عمرية مختلفة ممكن يستخدموا الملابس السليمة لأخواتهم. اقنعيهم إن الفلوس اللي هيتم توفيرها يقدروا إنهم يحصلوا بيها على أدوات مختلفة أو محببة لهم.
دوري على العروض ومحلات الجملة
وانت نازلة تشتري زي المدرسة إبعدي عن الأماكن المخصصة ليها. عادة بتكون بأسعار عالية جداً. لكن الأفضل إنك تدوري على معارض الملابس الجملة. أو تدوري على أفضل العروض الموجودة على الإنترنت. ساعتها هتلاقي نفسك وفرتي فلوس كثيرة.
الخامات
لو سبتي الخيار لأطفالك فبالتأكيد هيدوروا على الملابس اللي شكلها مغري ليهم أكثر. لكن كوني ذكية ودوري على الخامة والتفاصيل اللي تخلي الملابس تعيش لوقت أطول. مثلا دوري على البنطلون اللي فيه بطانه عند الركبة. لأن المنطقة دي معرضة للقطع دايماً. لكن لو في بطانة فيها البنطلون هيعيش أطول. كذلك وزي ما قلنا قبل كده اشتري الملابس إللي تقدر تحتوي زيادة الوزن أو الطول ويكون فيها تنيات تقدري تعملي عليها تعديل.
العدد
في قطع من الملابس بتحتاج للغسيل كل يوم. مثلا القمصان والملابس الداخلية. عشان كده حاولي تشتري منهم عدد أكبر. لكن بالنسبة للبنطلونات أو السكيرت أو الجاكيت الخارجي والبلوفر فدي مش بتحتاج لغسيل كثير وبالتالي تقدري تحصلي على أقل عدد.
الغسيل والكوي
إنت مش بس محتاجة توفري فلوس، إنت محتاجة توفري مجهود ووقت. عشان كده دوري دايما على الأقمشة اللي مش بتحتاج كي. كذلك الأقمشة اللي من سهل إزالة البقع من عليها. بالطريقة دي تقدري تحافظي على الملابس لأطول وقت ممكن.
الوقت
بالرغم إن وقت شراء زي المدرسة معظم المحلات بتوضح إنها عاملة خصومات كبيرة لكن ده مش بيكون حقيقي. عشان كده أفضل وقت للشراء هو بعد وقت الشراء. بمعني إنك لو استنيتي لحد آخر شهر عشرة هتلاقي تخفيضات وتصفيات لملابس المدرسة مهمة جداً. لذلك ممكن نستعين بملابس السنة اللي فاتت لحد ما نجيب الجديد. أو ممكن تجيبي الملابس الجديدة المناسبة للطقس الحالي. بعد كده تجيبي الملابس الأثقل في وقت التصفيات. النصيحة الأهم إن لو في فرصة تشتري ملابس المدرسة مع بداية الصيف هتلاقي أسعار خرافية جداً.
للمزيد: شراء اللانش بوكس وأفضل مواصفات له.
