ازاي تنظمي وقتك وتحافظي على فروضك في رمضان
بما إنك أم مصرية أصيلة فده معناه إنك أكثر حد بيكون عليه أعباء كثيرة طول شهر رمضان. بداية من التفكير في الفطار والسحور، لحد تنظيم البيت، وتلبية احتياجات الأولاد. لكن للأسف كل الحاجات دي بتضيع منك روح رمضان، وبتخليكي مش قادرة تقرأي قرآن بشكل منتظم أو تصلي التراويح. لذلك قررنا النهاردة نقولك كل الطرق اللي تعرفك ازاي تنظمي وقتك، وتقللي الأعباء من عليكي، وازي تطلعي من رمضان وانت معاك ثواب وحسنات كثيرة.
ازاي تنظمي وقتك في رمضان
أولاً لازم تكوني عارفة ومتأكد إن رمضان مش شهر الأكل ومش شهر الكسل، لو انت مش مؤمنة بالقاعدة دي فبالتالي رمضان ممكن يروح منك وانت خارجة منه بوزن زيادة وعبادات قليلة جداً. لكن مش بس انت اللي لازم تعرفي، لازم إنت وشريك حياتك يكون عندكم نفس وجهة النظر وتنقلوها لأولادكم. لما تبدأي من القاعدة دي كل حاجة هتكون سهلة.
تقليل وقت تحضير الأكل
- أولاً، اكتفي بصنف واحد أو صنفين يكون واحد فيهم سهل الإعداد. لكن أوعي تعملي أصناف كثيرة تخليكي واقفة طول اليوم في المطبخ.
- ثانياً، مش مهم الأكل يكون كثير. لكن المهم إنه يكون صحي. اهتمي بالسلطات والخضروات والسوائل الصحية.
- ثالثاً، لو قمت بتفريز الأكل قبل رمضان فده هيساعدك توفري أكل كثير. لكن لو ما عملتيش ده فانت قدامك كذا حل ينقذك.
- هاتي الخضروات المنظفة بدل ما تضيعي وقت في تنظيفها.
- ممكن تعملي أكل يكفي يومين، وتشيلي جزء لليوم اللي بعده، أو لأي يوم في رمضان.
- اعصري كمية من الفواكه وثلجيها، وكل يوم طلعي جزء بدل ما تعملي عصير كل يوم.
- عمل الكنافة والقطايف كل يوم بيزود الوزن والمجهود. لذلك استبدلي الحلويات اللي بتاخد منك وقت بالفواكه.
- حضري قبل ما تنامي وجبة السحور على التسخين على طول.
- قبل كل حاجة اهتمي بنظافة المطبخ علشان ما يتكومش عليكي مجهود كبير.
ازاي تحافظي على العبادة والفروض
من هنا لازم نقولك على نقطة مهمة، وهي إن العبادة في رمضان مش صوم، وصلاة وبس. لكن في أشكال كثير من العبادة اللي لها حسنات وثواب كبير زي. (الأذكار، الذكاة، صلة الرحم، الدعاء، مساعدة الآخرين). وعلشان تقدري تحققي أكبر قد من الحاجات دي ممكن تقومي بالخطوات الجاية:-
- لو انت امرأة عاملة ممكن في طريقك من البيت للشغل والعكس إنك تخصصي الوقت لقراءة القرآن، أو ممكن تسمعيه على أي تطبيق صوتي. كذلك ممكن تقري تفسير القرآن، أو الأدعية والأذكار.
- جهزي الأكل المناسب بدري، وانتهزي فرصة الفترة اللي قبل المغرب للدعاء أو قراءة ورد من القرآن.
- لو أطفالك لسة صغيرين، لازم تعوديهم على النوم بدري، وبعدها هيكون عندك وقت طويل لصلاة التراويح.
- أما لو أطفالك كبار فإما إنهم يكونوا مع والدهم في صلاة التراويح، أو تخصصي وقت للألعاب وفيه تقومي بالصلاة. كذلك الأطفال الكبار لازم يكون لهم دور أساسي في تجهيز الفطار، وتنظيف المطبخ.
- قبل السحور اصحي قبل الكل بنصف ساعة، وممكن تصلي التراويح لو ما قدرتيش تصليها بالليل، أو تقري قرآن. كذلك ممكن تخصصي الوقت ده للأدعية والأذكار.
عادات تساعدك على تنظيم الوقت
في عادات خاطئة كثيرة هي اللي بتخلي وقت رمضان ضيق، لو التزمنا وبعدنا عنها هنلاحظ إن وقت رمضان بقى طويل جداً، وقدرنا إننا نحقق فيه كل حاجة في الشغل أو البيت أو العبادة.
- تعويد الأطفال على الصحيان والنوم في المواعيد العادية. لأن أكبر خطأ بنقوم بيه إننا بنسيب الأولاد سهرانين لحد موعد السحور. وبكده بنخليهم كسالى طول الوقت.
- تقليل السعرات الحرارية لأنها بتقلل طاقتك طول النهار، ومن المهم إنك تحصلي على سوائل كثيرة في الفترة بين السحور والفطار علشان يكون عندك طاقة.
- قرري إنك تتابعي عمل واحد أو عملين من الدراما، لأن بعد رمضان ممكن تشوفيهم ومن غير إعلانات كثيرة. لكن متابعة كل الأعمال في رمضان بيساعد على تضييع وقت العمل والعبادة.
- ادمجي الأطفال في الجو الرمضاني، زي صلاة التراويح، أو مساعدة الكبار، ومساعدتك في البيت.
بكده تكوني عرفتي ازاي تنظمي وقتك في رمضان. كل اللي انت محتاجاه هو إرادة قوية لتنفيذ خطتك، غير كده فالشهر هيمر من غير ما تحسي إنك ارتاحتي أو حتى قمت بالفروض الخاصة بالشهر الكريم.
