أفلام ومسلسلات قضي معاهم العيد في البيت

ياترى العيد ده هتخرجي تروحي فين؟ دي من الأسئلة اللي بتتكرر علينا كل عيد ودايما بتكون الإجابة مش معروفة. لكن ما يمنعش إن في ستات وأمهات كتيرة مش بتحب تخرج في العيد تجنبا للزحام والدوشة. لذلك بتقرر إنها تحضر ركنها الهادي ومعاها موبايل وسماعات وتفصل عن الحياة كلها. ولو انت من الناس اللي قررت تسترخي في البيت في العيد، فاحنا قررنا نرشح لك أفلام ومسلسلات هتخلي يومك في منتهى السعادة.

أفلام ومسلسلات لإجازة العيد

جهزي ركنك المفضل وابعدي عن كل دوشة البيت واخلقي العالم الخاص بيكي..ده حقك بعد 30 قضتيهم في تحضير الأكل وتجهيز البيت والاهتمام بمسؤولية الأولاد مع مجهود الصيام والتعب. علشان كده يوم مع كوباية النسكافيه وطبق الفشار والموبايل أو اللاب توب هيفرق معاكي كتير.

مسلسل you

لو انت بتحبي مسلسلات الإثارة النفسية فمسلسل you هيكون واحد من الاختيارات المفضلة ليكي. المسلسل معروض من خلال 3 أجزاء. بتدور قصة المسلسل عن شخص مصاب بالهوس المرضي اسمه جو غولدبيرغ، هوسه المرضي بيخليه يعجب بالبنات وبيحاول يقرب منهم بكل الطرق حتى لو كانوا مش بيبادلوه الإعجاب. لكن المفارقة بتحدث لما بيقابل جينيفر بيك وهي كاتبة مبتدئة. جو بيراقبها وبيراقب كل التفاصيل الخاصة بيها وبيقتحم بيتها وقت غيابها علشان يعرف كل حاجة عنها. وهي طول الوقت ده بتقرب منه من غير ما تعرف نوع الهوس المصاب بيه. لكن تفاصيل القصة بتطور لما بيقوم بقتل صديقها المفضل نتيجة هوسهه.

فيلم Marriage Story

هل الحب وحده كفيل باستمرار الزواج ونجاحه؟ دي واحدة من أهم القضايا اللي بيعرضها فيلم Marriage Story. الفيلم بيعرض زواج بدأت بقصة حب بين تشارلي و نيكول. شارلي بيعمل في الاخراج المسرحي أما نيكون فهي ممثلة بتحلم بالشغل في السينما. لكن بعد الزواج بتبدأ أحلام نيكول في التراجع وتندمج أكتر في حياة المسرح والعائلة.

لكن بتتحول الحكاية في اللحظة اللي بتكتشف نيكون إن تشارلي خانها لمدة ليلة واحدة  علاقة عابرة، وقتها بنشوف حوار استمر لمدة 10 دقائق بيوضح قدر كبير من الصراعات اللي كان الأبطال بيعيشوها في علاقتهم.

مسلسل البحث عن علا 

مسلسل البحث عن علا من المسلسلات الاجتماعية اللي أثار نقاش كبير في الفترة الأخيرة. علا الصيدلانية الشابة اللي في يوم وليلة لقت جوزها أخد قرار بالانفصال. وبتبدأ علا تواجه حياة مختلفة مابين البحث عن حياة جديدة والكثير من الأسئلة الوجودية عن نفسها وأسرتها وعلاقتها بمامتها، بمعنى أصح بتبدأ رحلة البحث عن علا.

فيلم تيتانيك

فيلم تيتانيك من الأفلام اللي عدى عليها أكثر من 20 سنة من بداية عرضها، لكنه هيفضل من الأفلام العالمية اللي لا يمكن تتكرر مرة تانية. ولو عايزة تقضي وقت رومانسي مليان بالتفاصيل الرائعة والتضحية والإخراج الضخم فأكيد فيلم تيتانيك من أكثر الأفلام اللي بنرشحها لك.

فيلم The Mountain Between Us 

الفيلم من الأفلام المحيرة عن الحب والعلاقات، ازاي علاقة رومانسية ممكن تبدأ بين اتنين وازاي ممكن تنتهي. هل التعود والتضحية قادرين يخلقوا الحب ولا الحب بينشأ بالصدفة البحتة ويكمل؟ كل دي حاجات هتفكري فيها وانت بتتفرجي على قصة الحب اللي بتبدأ بين كيت وينسلت وإدريس ألبا بعد ما بيتعرضوا لتحطم الطائرة الخاصة بيهم وبيبدأ رحلة النجاة بين جبال الجليد.

مسلسل friends

مسلسل friends من المسلسلات اللي عمرنا ما هنشعر بالملل منها مطلقاً. لذلك تقدري تقضي إجازة العيد مع كل الحلقات المحببة ليكي وهتلاقي إنك قضيتي وقت ممتع جدا ونفسك يطول أكثر وأكثر.

مسلسل squid game

لو ما جربتيش مشاهدة الأعمال الكورية فمسلسل squid game هيبدأ يغير فكرتك عنها تماما. المسلسل من أعمال التشويق والإثارة اللي فعليا هتخليكي مش قادرة تستني كتير علشان تعرفي ياترى هيحصل إيه في الحلقة الجاية.

مسلسل ما وراء الطبيعة

قصص ما وراء الطبيعة كانت من أجمل الأعمال اللي كل جيلنا اتعلق بيها وبكتابات المؤلف الراحل أحمد خالد توفيق. لكن تحويل القصص لمسلسل من بطولة أحمد أمين كان من أكتر الحاجات المبهجة. علشان كده لو لسة ما اتفرجتيش على المسلسل يبقى ابدأ جهزي وقتك علشان تشوفي قدر كبير من المتعة والإثارة والتشويق.

للمزيد: راجعين يا هوى..هل شخصية خالد النبوي “بليغ” توكسيك؟.