مكانش يومك يا سندريلا
بنتي فرح جايه من المدرسه تقولي المس قالت بعد مانخلص الاستوري بتاعه سندريلا هنمثلها وكل واحده فينا هتعمل دور انا بقي فرحت وبسالها زي الهبله بكل ثقه: وطبعا انتي هتعملي دور سندريلا بصتلي باستغراب وقالتلي: سندريلا مين؟ لا انا عايزه اعمل دور اختها الشريره سالتها بمنتهي السذاجه: ليه كده ياحبيبتي هيا المس اختارت بنت تانيه تعمل سندريلا؟ وهنا كانت المفاجأة
أنا وفرح ودور سندريلا
قالتلي وهيا بتضحك: لا خالص ده محدش اصلا راضي يعمل دور سندريلا.
انا: خلاص ياحبيبتي انا عايزاكي تمثلي دور سندريلا الطيبة الجميلة.
فرح: لا طبعا دي كانت خدامة.
انا : نعم ياختي اسكتي متكمليش ضيعتي ذكرياتي بتاعه الطفوله ياقلبي يانا. سندريلا الكيوت بقت خدامه!!! العيال اتغيرت كده ليه!! طيب الحمد لله انها مش عايزه تعمل دور مرات ابوها قدر ولطف. لكن الحمدلله تاني يوم بسألهم نتفرج علي فيلم ايه ف التلفزيون. قالولي عايزين الفيل الازرق قلت لهم بس ده رعب قالولي لا متقلقيش احنا مش بنخاف قلت لهم لا انا الل بخاف. 
انا اخر مره شفت فيلم رعب كان الانس والجن وكنت مرعوبه م القطه السوده تقولولي فيل ازرق!! لا ياولاد انا بقول نشوف فيلم دهب بتاع نعيمه عاكف جميل وطفولي ايه رايكم؟
– طفولي ايه يامامي دي البنت كانت حراميه في الفيلم.
انا: لا ياولاد دي كانت بنت فقيره بس اصلا كانت غنيه.
ولادي: دي كانت بتسرق.
انا: يالهوي فيروز كانت بتسرق هو العيال حصلها ايه ولا احنا اللي مكناش اطفال!! لا لا هما اللي مش اطفال. لكن مش عارفه هما اللي صح ولا احنا. لكن احنا كان فينا براءه وسذاجه وهما بقوا فاهمين كل حاجه وبيعرفوا يتكلموا في اي حاجه مش بيسيبوا حقهم. ولازم يردوا بيحبوا الصراحه وواضحين مش بيعرفوا يجاملوا ويكذبوا معتمدين علي نفسهم اكتر مش بيعيطوا ويندبوا حظهم. بياخدوا قرار وليهم هدف. لكن للأسف البراءة ضاعت وسط الحاجات الكتير دي. لكن برضه كله كوم وسندريلا كانت خدامه دي كوم تاني. 
ياعيني عليكي يا سندريلا ياختي.
نحن لانزرع الشوك
أما فرح هانم بدأت تستعد لدور اخت سندريلا الشرانيه وجهزت شوز بكعب ونكشت شعرها وبدأت تتقمص في الشخصيه البت. لما اجي اطلب منها حاجه تقولي انا مابشتغلش. نعم ياختي ده انا بقولك هاتيلي كوبايه ميه ؟ لا يامامي انا لسه حاطه مانيكر ومقدرش امسك اي حاجه قولي لزينه. لكن زينه بقي علي اخرها وبتشتكي لي من فرح: يامامي فرح بقت مغروره اوي وعايشه الدور. _متزعليش يازينه انا اصلا علي اخري منها _بت يافرح هتعمليلي فيها step sister هعملك مرات اب وstep mother. بصي بقي لمي لي شعرك وشيلي المونكير واقلعي الشوز ال بكعب دي وروحي اغسلي لي المواعين ياسندريلا الشاشه.
فرح: انا مش سندريلاااااااااااااااا انا مبحبهاش مبحبهاش انتي لسه شفتي حاجه 
ده انا شويه وهخليكي تمثلي نحن لانزرع الشوك 
استني عليا.
بقلم الكاتبة: رانيا كمال العربي
للمزيد: حبي نفسك يا ماما وحبي حتى أخطائك.
