حدوتة الطبق الذهبي
النهاردة في حدوتة قبل النوم هنحكي حدوتة الطبق الذهبي..الحدوتة من أجمل القصص اللي ممكن نقولها للأطفال لأنها بتعلمهم قيمة الأمانة. كذلك بتديهم رسالة على فظاعة الطمع ومحاولة الغش وخداع الآخرين.
حدوتة الطبق الذهبي
كان يامكان في قرية قديمة في وقت بعيد جدا كان فيه اتنين من بياعين الحلي واحد إسمه آسر والتاني اسمه ساهر، هما الاتنين أخدوا كل الحلي اللي عندهم زي العقاد والخواتم والأساور وركبوا مركب واتجهوا لقرية بعيدة علشان يبيعوا فيها بضاعتهم ويكسبوا فلوس تعيشهم. لكن وهما في المركب لما كل حد فيهم بص على بضاعة التاني لقى إن معاهم نفس الحاجات وبالتالي مش هيعرفوا يبيعوها مع بعض. لذلك صاحب المركب اقترح عليهم اقتراح مهم جداً.
صاحب المركب قالهم إيه رأيكم إنكم توزعوا نفسكم في القرية. آسر يروح في الجزء الشمالي منها ويعرض بضاعته على الناس. وفي نفس الوقت ساهر يبقى في الجزء الجنوبي ويبيع حاجته. وبعد ما كل حد يخلص يبدلوا الأماكن، وآسر يروح للجنوب، وساهر للشمال.
الفكرة عجبت ساهر وآسر جداً، وقرروا أول ما ينزلوا من المركب ينفذوها. وبالفعل أخد ساهر بضاعته وكل الحلي اللي معاه وراح لجنوب القرية. أما آسر فأخد كل بضاعته ومشى في شمال القرية علشان يبيعها.
البيت القديم
في نفس الوقت في بيت قديم جدا كان فيه بنت صغيرة عايشة مع جدتها الفقيرة. لكن البيت كان فقير ومكسر، ويادوبك الجدة والبنت الصغيرة عارفين يلاقوا قوت يومهم. بس البنت لما سمعت ساهر وهو بينادي على الحلي والأساور طلبت من جدتها إنها تجبلها عقد أو أسورة علشان تفرح بيهم. لكن جدتها قالت لها إنها ماعهاش فلوس. البنت قعدت تعيط وتححايل على جدتها.
وهنا جدتها قررت إنها تدور على أي حاجة في البيت علشان تبيعها وبتمنها تجيب للبنت الصغيرة الأسورة. نادت الجدة على ساهر وادته طبق قديم. لكن ساهر بص على الطبق وقالها ده طبقى متغطي بالتراب والرماد ومالهوش قيمة، ومش هينفع يديها حاجة بداله. بس وهو بيمسح الطبق بص لقى جزء فيه بيملع، وهنا اكتشف إن الطبق مصنوع من الذهب. لكن لأن ساهر كان طماع فكان عايز ياخد الطبق من غير ما يدفع تمنه. علشان كده قال لنفسه أنا همشي وأقولهم إن الطبق مالهوش قيمة، ولما أرجع تاني هاخده من غير تمن. وبالفعل مشى.
في اليوم التاني وصل آسر للقرية، ومشى ينادي على بضاعته، الجدة الفقيرة والبنت الصغيرة طلعوا وادوله الطبق وقالوا له ممكن ياخده ويدي البنت إسورة أو عقد. آسر لما بص للطبق من بعيد عرف إن مالهوش قيمة. لكن كان عايز إنه يبسط البنت الصغيرة، علشان كده قالهم انه هيشتري الطبق لكن بعد ما يبص عليه. وهو بيبص عليه اكتشف ان الطبق مصنوع من الذهب. علشان كده قال للجدة أن الطبق ده قيمته كبيرة، وان البضاعة اللى معاه أقل من قيمته. لكن الجدة قالت له خد الطبق الذهبي وادي البنت كل الحلي اللي معاك. قبل آسر عرض الجدة وأخد الطبق وراح للمركب. ولما رجع ساهر للجدة حكت له اللي حصل، جرى ساهر ورا المركب، لكن المركب كان مشى بعيد. ندم ساهر على غشه وطمعه، لكن آسر كان معاه الطبق الذهبي وكان عارف إن حياته هتتغير وهتبقى أحسن من أي وقت.
