وثائقي لميريام فارس على نتفليكس .. صحيح غدارة يا دنيا
صباح الخير عزيزتي الأم التي تواجه مصيرها اليومي في تجربة الأمومة الجميلة والجهنمية في نفس الوقت. في صباح يوم غريب من أيامنا العجيبة خرجت علينا الأخبار بالإعلان عن فيلم وثائقي لميريام فارس على نتفليكس بعنوان الرحلة. بتقولوا ايه يا ولاد؟ ميريام فارس عاملة فيلم عن تجربتها الصعبة في وقت كورونا.. وسمت الرحلة على اسم الألبوم “غدارة يا دنيا”.. أه والله زي مبقولك كده.
ليه نتفرج على فيلم وثائقي لميريام فارس على نتفليكس؟
في الأول قلت بلاش ظلم وأصلاً الدنيا دار ابتلاء وأكيد يعني في قضية كبيرة هيناقشها وثائقي ميريام فارس على نتفليكس. ما هي ممكن الست تكون صورة للمرأة اللبنانية ومعانتها خلال وقت الحظر. أو إنها هتتكلم عن مآساة الست في لبنان بعد انفجار ميناء بيروت. لكن في الحقيقة الموضوع طلع أكبر من كده. الفيلم هو معاناة ميريام فارس نفسها جوه قصر كبييييييييييير ومجهز وفيه جيم وأسانسير وجنينة أكبر من جونينة الحيوانات…هي من ناحية معاناة فهي معاناة.
معاناة ميريام فارس في “الرحلة”
بص برضه خلينا نبص إن الموضوع فيه معاناة ورحلة. مثلاً كلنا عارفين الصعوبة اللي لاقيتها الست مريام وهي بتلبس البنطلون خلال الحمل. طبعاً إنت مصرية أصيلة ما تفكريش في الحاجات إنت تلبسي وانت ساكتة. ده غير طبعا بيوت التجميل اللي قفلت وبالتالي اضطرت بيوت التجميل تروح بنفسها لبيت مريام فارس ودي وانت ست العارفين حاجة مش سهلة. بصي هي معاناة ماحدش يختلف يعني.
ليه الدنيا غدارة؟
الحاجة الوحيدة الحقيقة في الفيلم إن الدنيا غدارة. وده إسم الألبوم اللي أنتجته وغنته ميريام فارس خلال فترة الحظر. وهو حقيقي لإن دي الكلمة الوحيدة اللي هتطلع من كل أم عانت برة القصر خلال الحظر. كل أم بتشتغل في المجال الطبي وكل أم اضطرت للنزول للشغل خلال انتشار الوباء وكل أسرة دخلها اتأثر بالتأكيد هيحسوا إن الدنيا غدارة…بس انتوا لأ ماحدش هيعمل عنكم فيلم.
لو هيتعملك فيلم تسميه إيه؟
في النهاية خلينا نقول “لايف إيز نوت فير” أه والله يعني.. لكن نفترض مثلا إن ضمير الإنسانية النايم ننة قرر إنه يصحى ويسجل وثائقي عن حياة الأمهات – غير ميريام فارس طبعاً- إنت كأم في هذا الزمان وهذا المكان تحبي تسميه إيه؟ وياتري كانت معاناتك إيه؟ وبغض النظر إن كل الستات وقت الحمل لا بتعرف تلبس البنطلون ولا تربط الجزمة لكن لو قلت لك إيه هو المشهد اللي لا يمكن تسنيه في رحلتك هتكون إجابتك إيه؟ ..شاركينى تجربتك على التجربة الجهنمية.
.
