لو الأمومة وظيفة ياترى الانترفيو هيكون شكله إيه؟
لما بنقدم على عمل أو وظيفة بنبقى عارفين إحنا حنقدم إيه وهنكسب إيه. لذلك بيكون في انترفيو نقنع بيه الشركة إننا مؤهلين تماما ونقدر نؤدي كل المسؤوليات اللي علينا. لكن لو الأمومة وظيفة ياترى هتكون إيه؟. لذلك النهاردة في التجربة الجهنمية الطبيبة النفسية ” رنا الكراي” بتشاركنا مقالها اللي فيه بتتخيل انترفيو عشان تشتغل أم..وده الل حصل.
عندما تكون الأمومة وظيفة
في انترفيو عمل من وحي خيالي.
١: لو سمحت كنت عاوزة اقدم على وظيفة الأمومة ☺️
٢: بجد ….اهلا و سهلا يا فندم اتفضلي خشي برجلك اليمين😊
١:نعم👀
٢: و لا حاجة يا فندم 😊
١: احب اعرف الوظيفة دي part time ولا full time؟
٢: هههههه….لا يا فندم دي full life 😁
١:يا خبر. لكن على كده بقى ساعات العمل بتبدأ من امتى؟
٢: 😁😁حضرتك لذيذة اوي يا فندم .. ان شاء الله بتبدأ مع أول صيحة من صيحات الاولاد. لكن لو حضرتك معتقدة اني حاقولك بتنتهي مع آخر صيحة يبقى عشمك مش في محله يا فندم . ذلك لأنها ما بتنتهيش للاسف😁
١: طيب على كده في بدل عن المرمطة دي اكي؟
٢: طبعا يا فندم احنا مش بناكل على حد حقه …. الجنة و نعيمها بدل الدنيا باذن الله😁
١:😳..طيب ما فيش اي حاجة مسليه؟
٢: أزعل منك يا فندم والله …ده يومنا كله تسالي … حضرتك سمعتي الاوبرا قبل كده؟
١: اه طبعا.
٢: معانا مش حاتسمعيها. لكن حاتغنيها باذن الله 😁. كذلك حاتبقي من اروع الاصوات الاوبراليه …رحتي سيرك قبل كده؟
١: لا.
٢: حنجبهولك لحد البيت 🥳لحد البيت ايه لحد السرير والله ما انتي قايمة 😂
ا: الله ده انا شكلي حاتبسط أوي.
٢:جدا جدا يا فندم 😅
١: لكن على كده المرتب حلو ؟
٢: اهو ده احلى ما في شغلنا و اللي بيشتغله مش بيسيبه علشان المرتب ده ….خدي عندك يا ستي. المرتب بيبدأ من نظرة عين و بتشوفي المرتب بيكبر قدام عينك يوم ورا يوم بتشتري بيه حب و حنان و فرحة من النوع الغالي و بيبقى أغلى من كنوز الدنيا .
١: 🥺فين العقد أمضي❤️
٢: مش قولتلك يا فندم خشي برجلك اليمين😅
