أنا ماما
عيد الأم المصرية..جمل ماحدش بيقولها غيرها
في يوم 21 مارس دول كثيرة بتحتفل بعيد الأم. لكن لو كنا منصفين فلازم يكون في عيد الأم المصرية بالذات. مش لأنها بس أحن أم في الدنيا. لكن لأنها متفردة دايماً في المواقف والطرائف والجمل اللي لا يمكن تسمع حد بيقولها غيرها. النهاردة هنقولها كل سنة وإنت طيبة. لكن خلينها نفكرها بشوية حاجات بتقولها.
عشان عيد الأم المصرية دي أكثر جمل بتقولها
- هتقوموا في يوم ماتلاقونيش ولا حد يعرفلي طريق “جملة التهديد الأشهر”.
- لو جيت وجبتهولك ” الجملة دي تخوف عشان قدراتها في البحق تفوق قدرات المفتش كلومبو”.
- ياما قلت وكلامي ما تسمعش “عادة بتكون قالت عكس الكلام بس عديها”.
- جرب الفاصوليا هتعجبك “بتقولها بعد ما تكون جربت الفاصوليا 10 سنين ولسة ما بتعجبكش”.
- ده مش واسع عليك انت هتطول ويبقى على قدك “لا انت بتطول ولا هدوم بتضغر”.
- إنت لسة صغير مش فاهم “لما تكون بتعارض”..إنت خلاص كبرت وبتفهم كل حاجة “لو عايزة تشيل إيدها”.
- ما انت مستنين الخدامة تيجي تغسل المواعين “معروف إن مشهد المواعين يخض أي حد”
- أنا مش عايزة هدايا أنا أملي في الحياة أشوفكم مبسوطين “الجزء الثاني حقيقة بس هي بتحب الهدايا برضه”.
- سيب الموبايل من إيدك “مع التطور الحادث بتقولها وهي ماسكة الموبايل”.
جمل مش هتسمعها إلا من الأم المصرية
- كل ده نوم الظهر أذن “غالباً بتتقال يوم الإجازة الساعة 8 الصبح”.
- يااااااااااااااااارب “على حسب التون هتعرف بتدعيلك ولا بتدعي عليك – من ورا قلبها طبعا-“.
- النهاردة قلت نعمل أكل خفيف “تقريباً بيبقى في 10 أصناف على السفرة”.
- ليه كلامي مش بيتسمع “عشان إحنا لازم نسمع الكلام”.
- وأنا قدك كنت بشيل البيت شيل “ما تصدقيش..دي ماما مش سوبر مان”.
- من هنا ورايح أنا ماليش دعوة بحد “أكبر كذبة في تاريخ البشرية”.
- إنتِ حتى خاسة ووشك عدمان “تاني أكبر كذبة في التاريخ”.
- لفيت السوق كله ما لقتش غير دول. لكن الحقيقة هي ما رحتش غير المكان اللي عايزاه.
- احكيلي ومش هقول لحد. لكن “هي خالتو دي حد غريب”
- هات المصروف أنا هشيله معايا. أما دي حاجة تضحك بشكل.
- مافيش حد بيخاف عليك ولا يحبك دي قدي. “دي جملة مشهورة. لكن الحقيقة أصدق جملة في التاريخ.
اقرأي أيضا: إنت مين من أمهات الدراما المصرية؟.
