صورني وأنا بعيط 

النهاردة الكاتبة رانيا كمال بتشاركنا بقصة كوميدية أكيد اتكررت مع أمهات كتير وعنوانها “صورني وأنا بعيط”.

صورني وأنا بعيط

رحت اصور بنتي فى استديو تصوير..وطلبت من المصور انه يستنانى 5 دقايق بس اضبط لها شعرها…الراجل قلت له كده و طلع فيا: ما ضبطتيهاش فى بيتكوا ليه؟؟والله دى مش شغلتى استناها؟ انتى مش رايحة بيها كوافير يا ست هانم..(ايه ده انا مااسميش هانم)…قلت له برقه: معلش سورى خالص..هيا عامة مش محتاجة حاجة..ماشاء الله عليها قمر طبيعى..يرد ببرود: طب يللا خلصينا.. (انا طبعا بحاول امسك نفسى وافضل مؤدبة)..ياللا يا حبيبتى اقعدى عشان عموا العو ده هيصورك..طبعا بنتي اتفتحت فى العياط وفضلت تقول عموا ده يع عموا يع..(يا بنت ابوس ايديك اسكتى احسن الراجل يقطعنا..)..طبعا فضلت اقنعها بان عموا مش يع …….بصى يا حبيبتى..عموا ده حلو خالص ومش بيعض ماتخافيش !! هوا شكله كده.!! والبنت ابداااااااااا شغالة عياط..

ومازال العياط مستمرا

المهم حاولت اطلب من اخينا ده انه يحاول يضحكها ويعودها عليه زى اى مصور مابيعمل..يعنى يقولها يا حلوة يا بطة يا قطة..الراجل طلع فيا: والله ده مش شغلتى ياماما(جاك مو مامة ايه ؟؟انت خليت فيها ماما ولا بابا)..انتى ضحكيها ولاعبيها ورقصيها براحتك..انا شغلتى اصور وبس..(..ايه رقصيها دى شايفنى ماسكة صاجات فى ايدى)..خلاص بقى يا حبيبتى ماتخافيش هتتصورى ونروح على طول..ماشى(انا اللى بقولها)..طبعا بنتي غرقانة فى دموعها وعينها دبلت خالص وشعرها اتنكش وشكلها بقى عيضة..وقلت له: خلاص صورها كده وخلاص..اى حاجة بقى(وانا اللى استاهل)…قام قايلى بصوت عالى مجلجل اوى :لاااااااااا..لا يا ختى(مستوى الحوار معاه عمال ينزل خالص)..انتى هتستعبطى انتى وبنتك..يعنى تنكشى شعرها وتعيطيها وتقولى صورها..عشان تطلع الصورة وحشة بعد كده وتقولوا ان تصويرى اللى وحش فى الاخر..يعنى بعد كل تعبى ده وتضيعوا سمعتى..ده انتوا عالم مفترية..عارف انا الاشكال دى عارفها وحافظها..وعارف مين اللى مسلطكم.!!.

إنت الخسران

الصراحة بقى مقدرتش امسك نفسى ساعتها محدش يحوشنى لو سمحتوا:طب انت عارف ان اغلب استديوهات البلد معلقة صورتها برة فى الفاترينة ده غير ان الفنان عادل امام كان عايزها تلعب دور بنته فى فيلمه الجديد.عارف عادل امام ولا مش عارفه؟؟..الراجل بص لى بقرف: انتى هتشتغلينى؟؟من امتى عادل امام بيجيب عيال صغيرة فى افلامه؟؟…لا يا راجل(انا بكلم نفسى)..ياللا ع العموم انت كنت هتدخل التاريخ من اوسع ابوابه بس مالكش نصيب بقى!!.(الهى يارب يوعدك بكاميرا بايظة وفلاش مابينورش وفيلم حمضان وتتخبط فى تلات بروايز فى وقت واحد وماتلاقيش ولا عروسة فوتو جينيك تصورها والعريس يجى يتصور عندك وينسى العروسة قادر يارب..ويعقدك زى ماعقدتلى البنت البريئة دى)… البنت يا عينى من يومها كل ماتشوف اى ضوء..فلاش كاميرا..موبايل..ضوء شمس حتى..بيجيلها انهيار عصبى..(منك لله يااللى فى بالى) المهم استلمت الصورة منه ولقيت لها استخدام روش اوى..بقيت بستخدمها فى تخويف بنتى..يعنى كل ماتعمل حاجة غلط اقولها: (ها ..هتعملى كده ولا اوديكى عند عمووووووو ) !!

بقلم الكاتبة:رانيا كمال العربى

للمزيد: أبطال رياضيين ولا عيال مأنتخين.