ماما زمانها نايمة

مافيش طفل بقى ينام بعد الأغنية أو الحدوتة لكن تجربة الكاتبة رانيا كمال العربي كنت مختلفة تماماً..لكن ياترى النهاردة في مقالها إيه حكاية ماما زمانها نايمة.

ايه العيال المفترية دى

زمان لما كنا اطفال كانوا بيحكوا لنا حواديت قبل النوم..وكنا اول ما نسمع كلمة (كان يا مكان…)نروح فى سابع نومة..ننام ونحلم كمان !!

دلوقتى البنت اللى عندها تلات سنين عشان انيمها. لكن لازم افضل اربع ساعات ع الاقل احكى فى حواديت عن الفراشة والاسد والعصفورة والقطة المشمشية، ولقيتها بتضحك على كلامى وشوية ولقيتها صحصحت اكتر م الاول!! (البنت دى مصفحة كده ليه؟؟ ).

المهم اقتنعت ان ده مش زمن الفراشة والقطة المشمشية، ده جيل النت والتليفزيون!! جيل عايز كل حاجة بسرعة ماعدا النوم عندهم استعداد يسهروا ٤٨ ساعة متواصل!!

  و قعدت احكى لها فيلم لاحمد حلمى وهيا عمالة تضحك..لالا ماينفعش احكى لها فيلم كوميدى..ده هيخليها تفوق زيادة..اسمعى يا بنتى..(وقررت احكى لها فيلم الهروب او  فيلم خرج ولم يعد…اهى افلام حلوة وكلها عظة) حسيت انها بدات تحس بالملل..لكن احسن برضه..فيه امل انها تنام، وبعدين دخلت على فيلم رعب يمكن تخاف وتنام بسرعة فلقيتها مبسوطه ومنسجمه عالاخر وبتسالنى بكل حماس: ها وبعدين؟؟

(يا بنتى ده انا شخصيا اترعبت !! ايه العيال المفترية دى!! ).

ماما زمانها نايمة

 مفيش قدامى غير انى انيمها بالايحاء (ضلمت الاودة وقعدت اعملها حركات بايدى زى الساحر)

 ايه الهبل ده يا مامى؟؟(هيا اللى بتقول) .

المهم مابقاش فيه اى امل انها تنام ولا بعد عشر ساعات حتى!! ..تقولش البنت شاربة برميل قهوة..مفنجلة خالص ولا اجدع فنجان قهوة تركى !!

المهم فضلت احكى برضه من غير ما احس باليأس..(الفاشل بس اللى بيياس لكن انا لسه ما فشلتش انا صحيح بقى لى خمس ساعات بحاول انيمها. لكن هوا النوم بيجى فى لحظة..الصبر). وقعدت اطبطب عليها شوية وازغد فى كتفها شوية.. (يا بنت نامى بقى)..المهم بدات احس ان لسانى بدأ يتقل ..وعينى بدات تغمض شوية..مش عارفة مالى..ياريت يا زينة لو تغطينى يا حبيبتى..طبعا البنت ما صدقت وغطتنى حتى غطت دماغى (مع انها عارفة انى مش بحب اغطى راسى وانا نايمة بحس ان نفسى هيتكتم)..حاولت اطلع راسى من تحت اللحاف. لكن مقدرتش..خلاص السهم نفد..والنوم غلبنى..مش بقولكوا النوم بيجى فى ثانية..!!.وحسيت بالبنت العفريتة نطت من فوق منى وطلعت تجرى عشان تشغل التليفزيون وتشوف والت ديزنى..ماشى يا زينة..خلى ميكى ماوس ينفعك..ياللا تصبحوا على خير

بقلم الكاتبة: رانيا كمال العربي

للمزيد: عن الشبشب والتربية الإيجابية وأشياء أخرى

 .