إزاي تجهزي مكان للمذاكرة مهما كانت مساحة البيت؟
المذاكرة هي الكلمة الأساسية اللي هتبقى في كل بيت مصري خلال الشهر القادم. يعني كل واحدة فينا يا هتكون أم بتزعق لولادها عشان يقوموا يذاكروا. أو أم بتسمع صرخات الأم الثانية اللي برضه بتزعق. لكن مش يمكن الأولاد مظلومين ومحتاجين إننا نجهز لهم مكان للمذاكرة عشان يقدروا ينجزوا واجباتهم بسرعة. تعالي دلوقتي نفكر سوا ونشوف نقدر نجهز مكان إزاي حتى لو كانت مساحة الشقة صغيرة.
نفكر في إيه قبل تجهيز مكان للمذاكرة؟
حتى لو كانت مساحة البيت واسعة. وبرضه لو كانت صغيرة خلينا الأول نفكر هو إزاي نخلق مكان للمذاكرة قادر إنه يوفر للأولاد بيئة مناسبة تشجعهم على الاستمرار. وعشان كده لازم نفكر في الحاجات الجاية.
- اختيار ركن بعيد عن المشتات، زي التلفزيون أو المكان اللي بيتجمع فيه كل أفراد الأسرة.
- طبيعة الأولاد. يعني لو في حد فيهم محتاج تكوني متابعاه طول الوقت يبقى لازم المكان يكون قريب منك وتحت عينك.
- في كام طفل في البيت وازاي هنقدر نوفر مساحة خاصة لكل حد فيهم.
ازاي نجهز ركن للمذاكرة بأقل إمكانيات؟
دلوقتي تعالي نعرف إيه هي الحاجات اللي ممكن توفر للأولاد ركن خاص وممتع جداً:-
اختيار المكتب
لو كانت مساحة الأوضة كبيرة من الممكن إنها تستوعب مكتب كامل فده هيكون اختيار لطيف جداً. لكن لو كانت مساحة الغرفة صغيرة فالحل هيكون في اختيار المكتب المعلق. وده بيكون عبارة عن رف ملتصق بالحائط ويتم فتحه وغلقه بسهولة جداً. كذلك اختيار الرف المعلق مناسب جداً لو كان في أكثر من طفل.
لكن لو مافيش مكتب؟ ممكن نعمل إيه؟ الحل هنا إنك تختاري طرابيزة مريحة ولها ارتفاع مناسب وتشوفي أنسب مكان في البيت لها. لكن في شوية تفاصيل تخلي الأولاد يفضلوا عليها ما يتحركوش.
الديكور المناسب
الأولاد لو حسوا بخصوصية الركن الخاص بيهم ممكن يستمروا في المذاكرة لوقت طويل. لذلك لو كان مكان المذاكرة هو المكتب أو طرابيزة في أي مكان في البيت تقدري تخلي لها خصوصية وشكل جميل من خلال أفكار بسيطة جداً.
- جهزي لوحة خشبية لها إطار وعلقيها على الحائط. ممكن عليها يبدأوا يعلقوا الورق الخاص بخطة الأسبوع. أو الصور اللي بيحبوها وكما الإنجازات والخطط اللي من المهم تنفيذها.
- جهزي مجموعة إكسسوارات مكتبية بسيطة. زي كوب الأقلام أو مشابك الورق وأباجورة المكتب. لأنها مش هتخلي عند الطفل حجة عشان يسيب مذاكرته ويقوم.
- لو الطفل مهتم بمجال زي العلوم أو الرياضة ممكن نعمل ركن صغير خاص بتنمية المجال ده. مثلا الكتب الخاصة به. كذلك السيديهات أو الصور.
- اهتمي بلون الحائط أو الغرفة في مكان المذاكرة. لأن ألوان زي الأزرق بتساعد على الخمول والنوم. لكن ألوان زي الأصفر والبرتقالي بتساعد على النشاط أكثر.
وحدات التخزين
طبعاً الفوضى ثم الفوضى ثم الفوضى هي مأساة أي أم. عشان كده وحدات التخزين هي أفضل حاجة تخلصك منها. لكن مش لازم تجيبي أثاث مكتبي غالي أو خشبي. اعتمدي على وحدات التخزين المنفردة المصنوعة من البلاستيك واللي ممكن يتم نقلها بسهولة. وبكده يقدر الأطفال يحتفظوا داخلها بالكتب والأدوات المدرسية ويفضل البيت في حالة من الروقان والهدوء.
