قبل ما يرحل قمر الليل..هات أحلامنا يا بابا نويل
قبل ما يرحل قمر الليل..هات أحلامنا يا بابا نويل. دي واحدة من أجمل الأغاني اللي بنسمعها في رأس السنة. كلنا محتاجين مع بداية السنة الجديدة أمل بتحقيق كل أحلامنا. ولأن بكرة هو أول يوم في السنة خلينا نقول حاجات حلوة شوية.
إيه اللي مستنينه في 2021؟
مع نهاية السنة قررنا إن النهاردة يكون كلامنا مختلف شوية.لذلك هنوقف النصائح عن التربية والأولاد. لكن هنتكلم عن الحياة والحاجات اللي بنستناها كلنا.
بس يا ترى إيه هي الحاجات اللي بنستناها؟ أكيد أحلامنا نسبية، كل حد فينا عايز هدية مختلفة من بابا نويل. كل حد عايز حياته تكون في مكان معين بشكل معين. لكن لو اتعلمنا الدرس صح في 2020 هنعرف إن في حاجات ما ينفعش نستغنى عنها.
في 2020 اتعلمنا قيمة إننا ننزل كل يوم ونشتغل ونقابل الناس ونشم الهوا بدون خوف أو قلق، وبقى حلمنا اللي بنستناه دلوقتي اليوم اللي ينتهي فيه الكابوس عشان نمارس حياتنا بشكل طبيعي من تانى.
تقريباً طول السنة اتحرمنا من القرب من أهلنا. الجدة ما قدرتش تحضن أحفادها. وما بقناش قادرين نقعد ونقرب من أصدقائنا عشان نفضض ونتكلم ونشكي. وبقى اللي بنستناه بجد هي اللحظة اللي نرجع فيها للحظات الدافية من تاني. اللحظات اللي فيها حضن للأم والأب والأجداد والأصحاب، من غير عوازل ولا كمامات ولا خوف.
في 2012 مستنين إن كل شيء يرجع زي ما كان. مستنين اليوم نتخلى فيه عن الكمامات. اليوم اللي يعدي من غير قلق على الأحبة. والليل يمر من غير تقارير مسائية عن الأعداد أو تهديد بالإغلاق والحظر.
هات أحلامنا يا بابا نويل
يا بابا نويل إذا كنت هتعدي على بيت بيت وشباك شباك، فأحلامنا السنة دي مش صعبة أبداً. بنحلم إن الزحمة ترجع والخروجات الخروجات والتجمعات الكبيرة. عايزين ماما تكمل شكوى من التمارين والصحيان للمدرسة. والأولاد يجروا وينطلقوا ويحطوا خطط للخروج من غير أي حدود. ونمشي في الشوارع تاني من غير أي شعور بالخوف. بص يا بابا نويل رع الحياة تاني زي ما كانت قبل 2020 واحنا راضيين.
وأخيراً وقبل النفس الأخير لليل نحب نقولكم كل سنة وانتم طيبين وآمنين. بكرة سنة جديدة ويوم مختلف ما نملكش فيه غير الدعوات والأحلام..وإن شاء الله يطلع النهار وكل ما نريده موجود ومتحقق. وكل سنة وانت طيبين.
