حواديت اطفال..قصة الأرنب الذكي

الأرنب من أكثر الشخصيات اللى اعتمدت عليها الحواديت. ودايما بنلاقيه شخصية ذكية وقادرة إنها تخرج من المشاكل بمنتهى السهولة والذكاء.وأي حواديت أطفال فيها الأرنب بطل فدايماً بتقدر تشد انتباه الطفل وتخليه يحبها. لذلك النهاردة هنكحي حدوتة الأرنب الذكي.

حواديت اطفال..حدوتة الأرنب الذكي

كان يا مكان كان فيه ذئب عنده مزرعة كبيرة وجميلة جداً. وكانت المزرعة كلها نباتات وزرع كتير جزر وكرنب وخس. والذئب كان بيحب حديقته جدا، وكل يوم الصبح يقوم يسقي الزرع ويرعاه ويحط البذور والسماد في الأرض علشان الزرع بتاعه يكبر ويكون أحلى وأكتر.

وكان الذئب بعد ما يطمن على حديقته وزرعه يروح البيت ينام. لكن في نفس الوقت كان الأرنب بيقوم من النوم ويمشي في الغابة علشان يدور على أكله. وكان أحلى مكان ممكن يلاقي فيه أكل هو حديقة الذئب. فكان الأرنب بيدخل الحديقة وياكل الكرنب والجزر ويشبع ويرجع بيته ينام.

ولما يجي الصبح كان الذئب بيروح الحديقة يطمن عليها. لكن بيلاقي زرع كتير متاكل منه. الذئب اتغاظ وفضل مصمم وعايز يعرف يا ترى مين اللي بيجي كل يوم من حيوانات الغابة ياكل من الحديقة بتاعته. علشان كده قرر ان يستخبى جوة الزرع ويراقب الحديقة ويعرف مين اللى بياكل محصوله كل يوم.

وفعلا استخبى الذئب جوة الزرع وبعد شوية لقى الأرنب ماشي يغني ويطنطط وهو فرحان لأنه هياكل ويشبع ويروح بيته في سلام.

الخطة الذكية

قعد الذئب يفكر ازاي يعمل مصيدة للأرنب، وفجأة خطرت على باله فكرة خطيرة. راح الذئب وجاب مادة اسمها القطران، المادة دي عاملة زي الصمغ، أي حد يمسكها يلزق فيها على طول. وكمان جاب معاها أدوات من المعدن ونحت منها تمثال لولد شقي وظريف. قال ان الأرنب أو ما هيجي يلعب مع التمثال هيلزق فيه على طول وبكده هيمسكه ويمنعه من أكل الزرع بتاعه.

وبالفعل خلص الذئب التمثال واستخبى تاني وسط الزرع. ولما جه الأرنب علشان ياكل كل يوم شاف التمثال، وافتكره ولد صغير وظريف، وقال أنا لازم العب معاه. راح الأرنب للتمثال وقاله ازيك يا ولد يا جميل..لكن التمثال ماردش. وهنا كرر الأرنب كلامه وقاله أنا أرنوب انت اسمك ايه؟ لكن برضه التثمال ما ردش عليه. الأرنب اتغاظ جدا وقاله انا بكلمك وانت مش بترد دي اهانة وعيب انك تعمل كده. لكن برضه التمثال لا اتحرك ولا رد.

علشان كده الأرنب استغرب وحاول انه يزق الولد واول ماحط ايده عليه ايده لزقت. لكن الأرنب قاله ايه الهزار التقيل ده سيب ايدي. بس التمثال ما اتحركش. راح الأرنب حاول يضربه برجله فلقى رجله لزقت كمان. فضل الأرنب يصرخ ويقوله سيبني انت ولد مش لطيف ولا دمك خفيف.

وهنا ظهر الذئب وقاله “بقى انت اللى بتاكل الكرنب والجزر بتاعي، انا حاخدك واشويك وتبقى العشا بتاعي”. راح الارنب قاله سامحني يا ذئب الغابة النبيل، انا ماكنتش اعرف ان الحديقة بتاعتك، وانت ما قلتليش ما اجيش..سيبني واوعدك اني عمري عمري ما هقرب من زرع تاني. لكن الذئب قاله ابدا انا خلاص جهزت الحطب والنار وهشويك واتعشى بيك زي ما كنت بتتعشى بالزرع الجميل بتاعي.

خطة الأرنب

قعد الارنب يفكر ولقى حل. وفجأة قال للذئب هو انت فاكر اني بخاف من النار، خالص انا مش بخاف ياللا اشويني بسرعة. انا مش بخاف من حاجة غير من الشوك والقش. ارجوك يا ذئب اوعي ترميني وسط الشوك والقش. الذئب سمع الأرنب وقاله طيب ماشي يا أرنوب طالما الشوك هو اكتر حاجة بتخوفك انا هعملك درس عمرك ما هتنساه. وقام الذئب فك أرنوب من على التمثال ورماه على الشوك. لكن أول ما الأرنب لمس الشوك جرى بسرعة، وقال للذئب أنا ضحكت عليك، أنا أصلا متعود على الشوك والقش ومولود وسطهم. وفضل يجري يجري وخلص نفسه من مصيدة الذئب وهو فرحان.

للمزيد: حواديت جميلة للأطفال حتى 5 سنوات.