زينة رمضان في البيت أسعارها وصور لكيفية تنسيقها
زينة رمضان من أجمل الحاجات اللي كل أسرة بتهتم بيها لأنها بتمنحنا سعادة كبيرة جداً. لكن إيه الحاجات اللي ممكن نستخدمها وتكون مناسبة للبيت؟. وازاي ننسقها بصورة جميلة؟ النهاردة هنتعرف مع بعض بالصور إيه أفضل أدوات نستخدمها، وأسعارها في الأسوق.
زينة رمضان في البيت
زينة رمضان من أكثر مصادر البهجة، ومهما كان البيت كبير أو صغير فأكيد ممكن نزينه بأكثر من طريقة. كذلك هنلاقي إن الأسواق بتقدم منتجات كثيرة وأسعارها مناسبة ممكن نستخدمها للزينة. وممكن نخصص منتجات كثيرة منها لتزيين غرف الأطفال. لكن إيه الحاجات اللي ممكن نستخدمها؟ ياللا بينا ناخد جولة في عالم الزينة والبهجة.
الفوانيس
الفوانيس هي الرمز الأساسي اللي كلنا بنحبه وليها معانا ذكريات كثيرة. كذلك هي بتعتبر العنصر الرئيسي لزينة رمضان. وفيه أشكال فوانيس مختلفة وأحجام مناسبة لكل البيوت. وفيه الفوانيس البلاستيك أو المعدن أو المصنوعة من الخيامية.
أسعار الفوانيس
تتميز أسعار فوانيس رمضان بالتنوع. فهي بتبدأ من 25 جنيه للفانوس الصغير ولحد 350 جنيه. وده بالنسبة للفوانيس الخشبية وفوانيس الخيامية. أما الفوانيس رمضان المعدن المعشقة بالزجاج فهي بتبدأ من 100 جنيه للفانوس الصغير و250 -350 للفوانيس الكبيرة أو المتوسطة. كذلك ممكن يوصل سعر الفانوس لـ 900 جنيه على حسب الخامة والطلاء.
صور لطريقة تزيين البيت بالفوانيس
زينة رمضان بالخيامية
الخيامية من أشكال الزينة اللي ظهرت حديثاً للاستخدام في البيت. لكن في نفس الوقت هي من زينة رمضان المبهجة جداً واللي ممكن نستخدمها بأشكال كتيرة. مثلاً ممكن نستخدمها ونعلقها على الستائر بدل البرقع. وممكن نحطها زي مفارش صغيرة في الأركان أو على الرفوف. كذلك ممكن نستخدمها كمفرش كبير على طرابيزة السفرة أو على كنب الأنتريه. ومن أجمل الأفكار اللي ممكن نستخدم فيها الخيامية هي استخدامها كتلبيسات للكوشن الصغيرة أو المخدات.
أسعار الخيامية
كتر الخيامية بيتراوح من 7 جنيه لـ 15 جنيه على حسب نوع القماش. لكن شراء مفارش الخيامية الجاهزة ممكن يترواح من 100 جنيه ولحد 300 جنيه.
صور لتزيين البيت بالخيامية
البيبي لايت
أضواء البيبي لايت من أبرز الأدوات المستخدمة في زينة رمضان في البيت وخارج البيت. وأجمل في الأضواء دي إنها بتضفي روح من الهدوء والفرحة في نفس الوقت، وممكن نوزعها في أركان مختلفة. كذلك من الممكن تعليقها في الشبابيك أو البلكونات بطرق مختلفة. كمان البيبي لايت المخصص لزينة رمضان بياخد أشكال كثيرة زي الفوانيس أو الهلال والنجوم ودي بتدي مظهر جميل للبيت.
أسعار البيبي لايت
أسعار البيبي لايت متفاوتة على حسب طولها وشكلها. لكن بشكل عام أقل سعر للبيبي لايت اللي مكون من إكسسوارات رمضانية بيبدأ من 50، وكل ما زاد عدد الأمتار والأشكال بيبدأ سعرها يزيد.
صور لتزيين البيت بالبيبي لايت
عرائس رمضان
بوجي وطمطم وفطوطة كونوا ذكرياتنا في رمضان، وعلشان كده العرايس اللي موجودة في الأسواق للشخصيات دي من أجمل العناصر اللي ممكن نستخدمها في زينة رمضان. وكمان دلوقتي بقى معاهم شخصيات كثيرة زي شخصيات فنانيس المختلفة. ده غير إن كثير من الشخصيات دي نقدر نشتريهم على شكل فوانيس مضيئة ومتحركة.
إكسسوارات مختلفة
بالإضافة للعناصر الأساسية اللي ذكرناها فيه أشكال مختلف وكثيرة ممكن نستخدمها لزينة رمضان. منها شكل عربية الفول المجسمة، أو شكل الهلال المجسم والمفاشر المطبوعة بأجمل الشخصيات الكرتونية اللي اتعودنا تكون معانا في رمضان. كذلك من الأشكال اللي ممكن نستخدمها للزينة المبخرة النحاسية والأشكال المزخرفة بتصميمات هندسية إسلامية. كل العناصر دي نقدر نوظفها بطرق مختلفة زي الصور اللي فاتت أو نعمل عليها تعديلات على حسب مساحة البيت وشكل الزينة.
