6 من أسرع سندوتشات المدرسة..كل يوم فكرة جديدة

سندوتشات المدرسة هي التحدي الكبير لكل أم. أولاً التفكير في تحضير الساندوتش المناسب. ثانياً يا ترى إزاي توازني بين الصحي واللذيذ. ثالثاً إزاي نضمن إن الأولاد ما يرجعوش بالسندوتش تاني. أما رابعاً تجيبي منين عقل يفكر كل يوم في نوع جديد؟ عشان كده إليك يا سيدتي الماما المحتارة 6 أفكار تقدري تبدلي بينهم كل يوم.

6 أفكار مختلفة لسندوتشات المدرسة

زمان كانت سندوتشات المدرسة هي وجبة بسيطة تدي الأطفال طاقة خلال اليوم المدرسي. لكن يبدو إن الزمن اتغير وبقت عبارة عن معادلة وحيرة بنقع فيها كل يوم. كذلك الأطفال مش سهل يرضوا بأي حاجة وعندهم رغبة دائمة في التجديد. لكن أكيد في حل ممكن تلاقيه في القائمة الجاية:-

ساندوتش بيض بالبطاطس

نقدر نقول إنه واحد من سندوتشات المدرسة الصديقة لميزانية الأسرة المصرية. وطريقته سهلة جداً وممكن تعمليه في العيش العادي أو الفينو و عيش التوست. ممكن تستخدمي برضه خبز التورتيلا. 

اهرسي ثمرة بطاطس بعد سلقها وحطي عليها توابل زي الملح والفلفل والزعتر والبابريكا. بعد كده غطيها بشرائح البيض المسلوق. كذلك ممكن تحطي شرائح زيتون عشان يكون طعمها مميز جداً.

ساندوتش سلطة الجبنة

بدل الجبنة والخيار اللي ممكن الأولاد يحسوا معاها بالملل تقدري تعملي سلطة جبنة. مكوناتها سهلة جداً. اخلطي قطعة من الجبن الفيتا أو أي نوع من الجبن مع الخيار والخس والفلفل الملون  والزيتون وجبنة تركي مبشورة. بعد كده ضيفي زيت الزيتون واعملي ساندوتش لا يقاوم.

ساندوتش سلطة التونة

التونة من أكثر الأغذية المغذية جداً. وممكن تعملي الساندوتش بسهولة. لكن في البداية صفي التونة تماماً من الزيت وتأكدي إنها بقت خالية منه جداً. بعد كده اخلطي التونة بالمايونيز مع شرائح الخس الرفيع والخيار والطماطم والزيتون. استخدمي أي نوع من العيش وهيكون طعمه لذيذ جداً.

زبدة الفول السوداني بالموز

ممكن في يوم واحد من الأسبوع نعمل ساندوتش فيه كمية كبيرة من الطاقة. كذلك هيساعد الأولاد يحسوا بالتغيير. هاتي خبز التورتيلا وافردي عليه طبقة من زبدة الفول السوداني. ومعلقة من العسل وعليهم موزة. بعد كدة لفي الساندوتش وهيكون هدية أسبوعية جميلة ومفاجأة.

ساندوتش الجبنة التركي والبسطرمة

جهزي شرائح  الجبنة التركي والبسطرمة بعد كده حطيهم في العيش. ضيفي الطماطم والفلفل الرومي. دخلي العيش في الفرن لحد ما الجبنة تبدأ في الذوبان.

ساندوتش بواقي الثلاجة

هو ده مش اسمه. لكنه طريقة كويسة عشان توفري وفي نفس الوقت تستغلي الأكل اللي بيفضل وما ترميهوش. ممكن الكفتة يتك تسخينها وضيفي لها الخس والطحينة وهتكون ساندوتش يجنن. لو اتفضل قطع دجاج ممكن تقطعيها قطع صغيرة جدا وتشوحيها مع الفلفل الملون والبصل وتحشيها في العيش الفينو أو خبز التورتيلا. وبكده تكوني عملتي زي كل أم ذكية بتضرب كل العصافير بنفس الحجر.

للمزيد: جدول وجبات مدرسية ممكن تحضريها خلال الأسبوع.