أمهات كثيرة بيعتبروا نفسهم محظوظين لإنهم عندهم طفل أو طفلة بينتموا لبرج الدلو. وهو يعتبر واحد من الأبراج المميزة. وأهم صفة بيتميز بها أصحابه هي الشخصية العطوفة والصادقة. ده غير مجموعة من الصفات المختلفة هتعرفيها من خلال مقالنا اليوم.
صفات الأطفال في برج الدلو
نقدر نقول إن فيه مجموعة من الصفات بيشترك فيها الأطفال في برج الدلو. لكن أغلب صفاتهم تعتبر صفات إيجابية ومحببة. أما أهم السمات الشخصية ليهم فهي كالتالي:-
شخصية اجتماعية جداً
بمجرد أن طفل برج الدلو يلمح ابتسامة من شخص غريب فمش هيتردد لحظة واحدة في التعرف عليه أو صداقته. لأنهم شخصيات اجتماعية جداً وعندهم انفتاح واسع على الحياة. ده غير إن الناس في محيطه من السهل إنها تحبه وتحول معاملتهم معاه لصداقة وطيدة جداً.
الفضول الشديد
لكن نقدر نقول إن الفضول عند شخصية برج الدلو هو فضول إيجابي مش سلبي. وده لأن الأطفال بيوجهوا فضولهم للنواحي العلمية والمعلوماتية. فلو كان إبنك أو بنتك بينتموا للبرج هتلاحظي إنهم بيسألوا كثير. وبيحاولوا يعرفوا كل التفاصيل المرتبطة بأي موضوع أو معلومة. وده معناه ساعات طويلة من الكلام هيكون من الصعب إيقافها إلا بعد الحصول على كل المعلومات اللي محتاجينها.
أطفال برج الدلو نشطاء جداً
أهم صفة ممكن أم تتمناها في أولادها هي صفة النشاط. عشان كده مش هتواجهي مشكلة الكسل لو أولادك من برج الجدي. لإن النشاط يعتبر أكثر صفة غالبة عليهم. وده بيخليهم يتغلبوا على المشاكل اللي بيواجهوها بسرعة. كمان عندهم طاقة للعب والمرح والمذاكرة على مدار اليوم بأكمله.
شخصية محبة للتعلم
دي واحدة من الصفات الحلوة جداً في أطفال برج الدلو. وهي الشغف بالتعلم. وكمان هما مش بيدوروا على التعلم بشكل سطحي. لكن نقدر نقول إن صفة الفضول اللي بيتميزوا بيها بتخليهم يدوروا على أصل الفكرة وجوهر الموضوع. لذلك ما تستغربيش لو أولادك فككوا اللعب الخاصة بيهم. هما مش هدفهم التخريب هما بس بيحاولوا يتعرفوا على كل تفاصيلها والطريقة اللي بتشتغل بيها.
أطفال متعاطفين للغاية
من أجمل صفات أطفال الدلو إنهم شخصيات متعاطفة جداً. عندهم قدرة على الاستماع لغيرهم من غير ملل. ويقدروا يوصلوا مشاعر التعاطف لغيرهم بطريقة سلسة جداً ومن غير أي حدود أو تكلف. لو شعرتي بالحزن هتلاقي انهم أفضل صديق أو صديقة يكونوا معاك في الوقت ده.
العناد الشديد
بالرغم إن بعض الأمهات بتجد إن صفة العناد صفة سيئة. لكن عند برج الدلو نقدر نقول إنها من أكثر الصفات الإيجابية. أطفال البرج ده من الصعب التأثير عليهم بأي فكرة. هما بيقتنعوا فقط بالأشياء اللي ترضي عقلهم ومن الصعب إجبارهم على تغيير مسارهم. ممكن يكونوا متعبين في حاجات مختلفة لكن مع الوقت العناد بيحولهم لشخصيات ناجحة ومستقلة تماماً.
عندهم إرادة قوية
الشخصية العنيدة لازم تكون شخصية عندها إرداة قوية وإلا العناد هيكون من أسوأ الصفات. لكن مع الدلو فالإرادة القوية هي اللي بتروض العناد وتجبره إنه يكون مسؤول. وبالتالي الأطفال لما بيقرروا أي قرار بيكونوا قادرين على تحمل مسؤوليته. لكن أهم شيء إنه من الصعب كسرهم بسهولة أو إقناعهم بالتخلي عن أي حلم من أحلامهم.
مش بيعرفوا التردد
الأطفال عموماً عندهم حالة من التردد، إلا أطفال برج الدلو. تتميز شخصيتهم بمعرفة الأشياء اللي بتحبها من الأشياء اللي بتكرهها، وبالتالي بيكونوا محددين تماماً في أي اختيار خاص بيهم وبيكونوا عارفين هما عايزين إيه بالظبط.
اقرأي أيضا: أطفال برج الجدي..تتوقعي منهم إيه؟
