في اليوم العالمي للمرأة.. انت استرونج اندبندنت ماما ومان

النهاردة 8 مارس اليوم العالمي للمرأة. كل مكان وكل شخص عاقل في العالم بيوجه رسالة شكر وامتنان لكل سيدة على اختلاف دورها. لكن التحية بتكون للسيدات اللي قدروا يتحدوا أنماط كثيرة ويبنوا عليها حياتهم ومستقبلهم ويحققوا نجاح كبير. لكن هل الأم ما تستحقش إننا نقول عليها إنها قوية ومستقلة؟ يعني ما ينفعش تكون مثال للاسترونج اندبندنت ومان؟ الحقيقة إن كل أم تستحق أن يكون لها يوم عالمي وتستحق إنها تكون نموذج للاستقلال والقوة.

للمزيد: عن اليوم العالمي للمرأة

في اليوم العالمي للمرأة 

ليه الأم هي مصدر الإلهام للقوة والاستقلال؟

العالم بيعتبر إن التحديات الكبيرة هي الحاجة الوحيدة اللي تستحق الإشادة والاحتفال. لكن ما فيش أم إلا لما بتواجه تحدي كل يوم على اختلاف الأعمار والطبقات والثقافات والمستويات. وكل المواجهات دي هي اللي نقدر نقول عليها إنها أول خطوة في طريق القوة والإلهام. أي أم في الدنيا بتواجه تحدي داخلي وخارجي لكنها بتنجح حتى لو كانت أبسط مخلوق في الدنيا. يمكن أمهات كثيرة حكاياتهم مش بتظهر لكن قوتهم بتبان في كل موقف خدوه في حياتهم. زي المواقف الجاية.

الأم صاحبة أجرأ قرار في الدنيا

في رواية eat pray love في جملة عبقرية بتقول “قرار الحصول مثل طبع وشم على الوجه، لا يمكن التراجع فيه أبداً”.. وده اجرأ قرار بتاخده أي ست. القرار اللي بيتبعه التخلي عن حاجات كثير. إنت أم يعني مسئولة عن شخص ثاني. يعني بتدي من حياتك أكبر جزء لروح ثانية. بتدي تسع شهور من صحتك لصحة جنين صغير. وبتدي سنتين من وقتك وعمرك لكل تفصيلة في حياته، أكله صحته مشكلاته. وبعد كده بتدي عقلك عشان تربي فيه أخلاق وقيم وتخليه في النهاية شخص سوي. ما حدش يقدر يقرر كل ده إلا إذا كان شجاع وقوي ومستقل. ما حدش يقدر يعمل ده إلا استرونج إندبندنت ماما ومان.

يوم عالمى للمرأة الـ Multi task

لو شوفنا أعظم القادة والمحاربين والأبطال الأسطوريين هنعرف إن كل واحد فيهم بيعمل مهمة واحدة. إما بيصطاد أو بيحارب أو بيجري ورا الديناصورات والتنانين في الجبال. لكن الأم بطلة أسطورية صامتة. أكثر من إيد ورجل بيتحركوا في وقت واحد. أكثر من عقل بيفكر في شخص واحد. في ثانية واحدة بتكون قادرة تصحي الأولاد وتجهز فطار وتدي تعليمات وتحضر لشغلها وتكمل تليفوناتها وتلبس وتبعت إيميل. ما فيش حد يقدر يعمل ده إلا ماما قوية ومستقلة. وتستحق أن يتعملها يوم عالمى للمرأة الـ Multi task.

ماما وقوات التدخل السريع

في قوات طوارئ في كل العالم. لكن كلها لا تضاهي لحظة تدخل سريعة لإنقاذ طفل بتقوم بيها الأم. سواء كان عندها طفل واحد أو أكثر الأم بيكون لها عيون في كل ركن. وبمجرد التهديد بلحظة خطر واحدة بنلاقيها اتحولت لسوبر ومان وقدرت إنها تنقذ أطفالها من كل الحركات الأكروباتية اللي بتحصل من غير توقع. وقتها ما فيش أي قوة في الدنيا ممكن تخلق لنفسها القدرات الكبيرة اللي بتحركها مشاعر أي أم لإنقاذ أولادها. والأمثلة على ده كثيرة جداً.

الحنان هو قوة الحقيقة

القوة مش صوت عالي أو صراع مع كل شيء حوالينا. القوة هي اللحظة اللي بتدي فيها حنان من غير مقابل بالرغم من تعبك. هي الساعة اللي بتقرري تضحي براحتك عشان تسعدي أطفالك. وهي الحضن اللي يقدر يخلق من إنسان صغير شخص واثق من نفسه. هي الحب غير المشروط اللي مش أي حد يقدر عليه. القوة هي حدوتة بالليل اللي ممكن ننسى حاجة إلا هي تفضل عايشة معانا.

فيا كل أم على وجه الأرض. النهاردة يوم تستحقي فيه الاحتفال والفخر بإنك جزء من العالم بإنجازات كثيرة حتى لو العالم بطل يسقف لها. لكن كل يوم وكل وقت تأكدي إنك سترونج إندبندنت ماما ومان.