شجعوا أولادكم على المذاكرة بـ 5 طرق مجنونة وذكية

كلنا متأكدين إن المذاكرة السنة دي مش سهلة. مش كل الأولاد قدروا إنهم يستمتعوا بالصيف والخروج وده حصل بسبب انتشار فيروس كورونا. علشان كدة محاولة إقناعهم بالمذاكرة هتحتاج مننا مجهود. بس المجهود اللي نقصده مش إننا نمشي تحت البيت نسمع صوت الأمهات وهو بيتحول لجرس إنذار عشان الولاد يذاكروا وينتبهوا. المجهود هنا هو شوية طرق ذكية ومجنونة هنقنع بيها الأولاد إن المذاكرة ألطف حاجة في الكون. طب نعملها إزاي؟ يلا بينا نعرف سوا.

اقرأي أيضا: بدء الدراسة أون لاين .. خطط لتشجيع الأولاد على الدراسة

طرق مجنونة وذكية لتشجيع الأولاد على المذاكرة

كل اللي محتاجين نفهمه هو إننا نحول المذاكرة من شيء ممل ومفروض لنشاط ممتع. علشان كده الأطفال محتاجين إنهم يبنوا النشاط ده بنفسهم وفي نهايته يحسوا إنهم عملوا إنجاز كبير. ده ممكن يحصل لو عملنا الحاجات الجاية.

ركن المذاكرة المختلف

دايماً بنحاول إننا نجهز مكتب وأدوات المذاكرة على حسب ذوقنا إحنا. بس للأسف مش احنا اللي بنذاكر، ركن المذاكرة لازم يتأسس من أوله لأخره على ذوق أولادنا. خليهم يختاروا المكان المفضل ليهم. بعد كده لازم نساعدهم يرتبطوا بالمكان ده أكثر. مثلاً يختاروا الصور أو الجمل المحفزة ليهم ونطبعها ونعلقها قدامهم. نخليهم يصنعوا بإيدهم صناديق من الكرتون المقوى عشان يحتفظوا فيها بالأدوات الخاصة بيهم. صورهم أساميهم الكتب اللي بيحبوها كل الحاجات دي لازم تكون محيطة بيهم. بالطريقة دي نقدر نشجعهم على المذاكرة لوقت أطول من غير حجج ولا هروب.

للمزيد: ركن المذاكرة .. أفكار مهمة للتأسيس والديكورات

لعب ودراسة في نفس الوقت

هنا يلا نفكر بشكل مختلف. كل الأمهات من الأجيال اللي اتربت إن المذاكرة والتعليم يعني الكتب والكراسات والحفظ. بس يا عزيزتي الأم إحنا في قرن مختلف تماماً، وأولادنا بيتعاملوا مع تكنولوجيا معقدة جداً. عشان كده لازم نحاول الاستفادة من التكنولوجيا في المذاكرة. تقدري تلاقي تطبيقات كثيرة تساعد على التعلم سواء لها علاقة بالمنهج أو لأ. على سبيل المثال لو أولادنا بيواجهوا مشاكل في نطق اللغات في تطبيقات كثير بتساعد على إنهم ينطقوا صح من خلال الأغاني أو الكرتون. أو الألعاب اللي بتكون معتمدة على منهج تعليمي. بكده هنكسر ملل المذاكرة التقليدي وفي نفس الوقت أولادنا هيتعلموا كويس جداً.

الجدول ثم الجدول ثم الجدول

أكبر خطأ ممكن نقوم بيه إننا نفسر الدراسة في البيت على أنها مساحة من الفوضى. العكس تماماً. إحنا عندنا فرصة عشان نعلم ولادنا طريقة جديدة للالتزام بالنظام. طب نعمل إيه؟ ببساطة نعمل جدول. جهزي للأولاد لوح كرتون ملون أو سبورة وخليهم يخططوا الجدول المناسب ليهم. يحددوا وقت المذاكرة. وقت التمارين أو الأنشطة المختلفة. وقت اللعب ووقت التلفزيون ووقت الراحة. وبعد ما يخلص الجدول إحنا مش هنسيبه على الحيطة ونمشي. لازم يكون في علامة قدام كل مهمة تنتهي. وفي نهاية الأسبوع نجمع العلامات وأكثر حد قدر يلتزم حيكون يستحق مكافأة كويسة.

تعالوا نكتشف المعلومات سوا

الأطفال بيحبوا شعور إنهم اكتشفوا شيء جديد ومختلف فما بالك لو كان الاكتشاف مشترك بينك وما بينهم. وده ممكن نطبقه مع المواد الصعبة. نفترض إنك مش قادرة تفهمي جزئية معينة في مادة الحساب الحل مش إنك تقولي لإبنك أو بنتك إنك مش فاهمة. الحل هو كلمة واحدة “تعالوا نعرف ونكتشف سوا”. على الإنترنت هتكتبي سؤالك وهتلاقي مصادر كثير تدلك وتفهمك إنت وهما. المعلومة دي أكثر معلومة لا يمكن تتنسى لأنهم هما اللي قدروا يكتشفوها.

تحديد طريقة التعلم الأنسب

كل طفل بيكون له طريقة معينة للفهم. بمعنى في طفل بيفهم لما يسمع المعلومة كثير، لكن الثاني لما يشوف فيديو عنها. في طفل بيقرأ ويفهم بسرعة لكن طفل يحب يسأل لحد ما يوصل للمعلومة. لا يمكن نطبق نظام واحد على كل الأطفال. هنا ده دورك عشان تجربي أكثر من أسلوب واللي تلاقيه جاب نتيجة هيكون هو الأسلوب اللي مكمل معانا طول السنة.

وبكدة نكون خلصنا مجموعة طرق مهمة تساعد ولادنا على المذاكرة بشكل فعال. لكن تأكدي إن الهدف النهائي منها هو تخفيف الضغط العصبي عنك وإنك تشعري كل شوية بإنك في حرب مع الوقت والكتب والواجبات. افتكري دايماً قاعدة واحدة وهي إن “كل الأشياء تبدو سهلة لو قررنا نحن جعلها كذلك”.

اقرأي أيضا: خطة الاستيقاظ للمدرسة.. حتى يكون الصباح سعيداً