ايه اللي بيحصل لـ العلاقة الزوجية بعد أول طفل؟

الحياة سلسة طويلة من التغيرات، وأكبر خطأ بنقع فيه هو تصور إننا هنعيش مشهد واحد للأبد. وده بالظبط اللي بيحصل للعلاقة الزوجية بعد أول طفل. مجموعة من التغيرات والاختبارات بيمر بيها كل طرف والخروج منها بسلام بيتطلب عقل وتفهم. لكن خلينا الأول نعرف بعد أول طفل علاقة الزوجة والزوجة بتكون عاملة إزاي.

التغيرات في العلاقة الزوجية بعد أول طفل

هل معادلة من طرفين هتكون هي نفسها نتيجة معادلة من 3 أطراف؟ بالتأكيد لأ. لازم في تغيير في النتيجة. عشان كده قبل أول طفل العلاقة الزوجية هي مبارة بين اتنين. أنا وانت في مشهد واحد، القرارات بتاعتنا تخصنا لوحدنا، وقتنا لينا، حتى اختلافنا مافيش حد حيتأثر بيه غيرنا. لكن المشهد بعد الطفل الأول بيتغير. إحنا بقينا 3، يعني كل حاجة بين اتنين هيتأثر بيها الطرف التالت. لذلك هيفضل السؤال المهم مين يقدر يحفظ التوازن عشان المركب تمشي وسط أي تيار أو عاصفة؟ أظن إن المسؤولية مشتركة. لكن في كل الأحوال ممكن نلخص أكبر مشاكل أو تغيرات العلاقة بتمر بيها في المشاهد الجاية.

زيادة المسؤولية على الأم

طبعاً وصول طفل للعائلة يعتبر مسؤولية مشتركة بين الأم والأب. لكن هتفضل مسؤولية الأم أتقل لأنها خارجة من شهور الحمل الطويلة. غير إن كل اعتماد البيبي بيكون عليها حتى لو الأب متعاون جداً. لذلك التقل اللي بيزيد على الأم ممكن يترجم في شوية تفاصيل. زي مثلا تقليل اهتمامها بالزوج في مقابل الاهتمام بالإبن. الاهتمام بالبيت وتفاصيله. قلة النوم اللي بتترجم في شكل عصبية طول الوقت.

دي أكبر موجة بتمر بيها أي علاقة بين اتنين بعد الإنجاب مباشرة. وعشان الزواج يعدي منها هتحاج صبر وتفهم وتضحية بين الطرفين.

إحساس الأب إنه بقى درجة تانية

زي ما الأم بتدي وقت طويل من راحتها وصحتها لابنها فالأب بيدي حاجة مهمة جدا لكن من غير ما ياخد باله. الحاجة دي هي الوقت اللي كان ليه لوحده. وقت الكلام أو الفضفضة والمشاركة. كل الحاجات دي بتبدأ تقل نتيجة إن بقى في شخص محتاج مراقبة ورعاية وحلول لكل مشاكله. لكن زيادة وعي الزوج بالحدث اللي هو فيه تعتبر أكبر خطوة عشان تعدي من غير مشاكل كتيرة.

راح وقت الرومانسية

أول الزواج هو الوقت المثالي للرومانسية. لكن أول ما البيبي يوصل مش هنقول إن الرومانسية بتختفي، لكن هنقول إنها بتبدأ تاخد شكل جديد. الشكل ده ممكن ما يكونش شموع وأغاني. لكن ممكن يتحول مساعدة في كل تفصيلة، أو بمعنى صح كل حد يتسابق عشان يشيل الحمل من على الطرف التاني. 

في المرحلة دي بيكون أهم شيء هو فهم طبيعة الوقت اللي بنمر بيه. الخطأ الأكبر هو تصور إننا محتاجين نرجع المشاهد السابقة لحياتنا الحالية. مش حينفع نرجع لورا. بس هنكون محتاجين نبني خطوات لقدام تدعم الحب والتفاهم.

الميزانية

التغيير المادي على الحياة بعد أول طفل مش سهل أبداً. في شخص تالت ومحتاج بناء عالم مختلف. عشان كده كل خبراء الاجتماع والأسرة بيأكدوا إن قرار وجود طفل لازم يحصل بعد ضمان إن الحالة المادية للأسرة تقدر توفرله احتياجاته العادية والبسيطة. عشان كده لازم دراسة الوضع الاقتصادي للبيت ووضع خطة لكل تفصيلة تخص الطفل بعد ما يوصل للحياة. لكن ده يحصل بدون مغالاة أو مبالغة. مع وجود طفل لازم نتعلم ضرورة الترشيد والاستغناء عن الحاجات غير الضرورية. كما لازم نتأكد إن كل الضغط المادي ما بيزيد فالضغط المعنوي بيزيد أكتر وبيأثر على الحياة بالكامل.

للمزيد: ما الذي يدمر العلاقات الزوجية وكيف نجد الحلول؟.