الخناقات بين الأولاد أكبر مشاكل الصيف.تعملي إيه؟
بدأت إجازة الصيف وكل أم هتكون متأكدة إن المشاكل بدأت معاها. وبالرغم من إن الإجازة هي الوقت اللي بتستنيه للراحة والاستجمام إلا أن ده عمره ما هيحصل والأولاد موجودين في البيت. طبعاً أول شيء هتلاقي نفسك قدامه هو الخناقات بين الأولاد. في حرب هتكون محتدمة بين كل الأطراف بصورة كبيرة وإنت مش هتعرفي تسيطري. لكن لأ.. لا يمكن تستسلمي إحنا هنا معاكِ وهنقولك إزاي تقيمي السلام وتنزعي فتيل الحروب وتعيشي بعض أوقات الاستجمام بعيداً عن الخناقات اللي مش بتنتهي.
إيه الأسباب الأساسية لـ الخناقات بين الأولاد في الصيف؟
المثل بيقول إذا عرف السبب بطل العجب. لذلك قبل ما تحاولي حل الخناقات بين الأولاد لابد في البداية من منع أسبابها تماماً. خلينا نقدم لك ملخص لأهم الحاجات المسببة للخناقات بين الملايكة الصغار في البيت.
الفراغ
الفراغ هو السبب الرئيسي لكل مشكلة. كل طفل محتاج إنه يطلع طاقته في شيء. محتاج يوضح شخصيته ويبينها لكل الناس حواليه. طول الوقت محتاج يقول أنا هنا. لذلك أول ما بيلاقي إن مافيش مخرج للطاقة الموجودة جواه بيدور على أطراف يقيم معاهم صراع ويحس بالانتصار بعده.. لذا من هنا تبدأ النيران في الاشتعال.
الشراكة
من أهم أسباب الخناقات بين الأولاد وجود شراكة في بعض العناصر. مثلاً وجود جهاز تابلت أو كمبيوتر واحد وبالتالي الصراع هيكون على أحقية كل حد في أخذه واللعب بيه. أو الشراكة في لعبة معينة أو مكان معين. الشراكة في حد ذاتها مبدأ مهم جداً. وأكيد إحنا مش بنشجع إن يكون فيه تابلت لكل طفل في البيت. لكن إدارة الشراكة بشكل صحيح هو مسؤوليتك اللي هنقولك تتعاملي معاها صح تماماً.
اختلاف الطباع والهوايات
بالتأكيد كل طفل له شخصية مستقلة عن التانى وده مصدر من مصادر الخناقات بين الأطفال بشكل دائم. كل حد فيهم بيحاول يوضح نفسه ويفرض سيطرته على الحاجة اللي بيحبها أو يظر من خلال الموهبة اللي بيحبها. لكن إزاي تساعدي كل حد فيهم إنه يمارس ده بشكل صحيح؟ ده هنعرفه في النقاط الجاية.
دليلك السحري للتخلص من الخناقات بين الأولاد
بعد ما عرفتي الأسباب الخفية لمعظم خناقات الأطفال في البيت دلوقتي تعالي نقولك إيه هي الطرق المختلفة اللي تقدري تسيطري بيها وتفرضي قواعدك لأطول وقت ممكن.
تخلصي من السبب الأساسي
زي ما قلنا إن أول سبب للخناق بين الأطفال في البيت هو الفراغ. لذلك أول معركة ليك لازم تكون مع الفراغ خلال إجازة الصيف. تقدري تحققي ده من خلال دمج الأطفال في الأنشطة المختلفة. الأنشطة كفيلة إنها تخرج طاقة الغضب أو تحقيق الذات في شيء مفيد وبالتالي هيكون تواجدهم في البيت أقل ضرراً من الأطفال اللي مش بيمارسوا أنشطة مختلفة وعندهم فراغ كبير.
اقرأي أيضا: أنشطة ترفيهية وألعاب للأسرة بأفضل الأسعار والعروض
أوعي تريحي دماغك والسلام
للأسف في أمهات كثيرة لما بتبدأ تواجه الخناقة بين الأولاد في البيت بتلجأ فوراً لإنهاء الخناقة عن طريق توجيه الأوامر وإنهاء الموقف في الحال من غير حل المشكلة الأساسية. لكن الطريقة دي هي اللي ممكن نقول عليها ” تريح الدماغ”. لازم تدخلك يكون إيجابي عشان يكون عندهم مهارة حل المشكلات مش الهروب وإنهاء المواقف من غير حلول.
علميهم إزاي يحلوا المشاكل
ساعات الخناقات بتكون وسيلة للأطفال عشان يتعلموا حل المشكلات بينهم. لذلك أول ما تلمحي بوادر الصراع ما تقدميش حل سريع. لكن اهتمي بفصل القوات واطلبي من كل طفل إنه ياخد ساعة يفكر في أكثر من حل للمشكلة وبعدها تجتمعوا مع بعض وتناقشوا الحلول وتطبقوا الأفضل فيها.
افتكري إنك قدوة
الأطفال بيقلدوا الكبار بكل طريقة. عشان كده لازم تفكري ألف مرة قبل الخناق حوالين أي شيء. أولاً لازم تكون خلافاتك الزوجية بعيدة عنهم تماماً. لو عندك مشاكل في العمل من المهم إنك تحليها بشكل دبلوماسي وما تحاوليش تظهري غضبك قدامهم لإن ده سلوك هيكتسبوه وينفذوه بسهولة. أما عند توجيهم برضه ما تحاوليش تتخانقي معاهم. حلي المشكلات بهدوء عشان يتعلموا منك نفس المبدأ ويتعاملوا بيه.
شجعي السلوك الإيجابي
زي ما قلنا قبل كده إن الأطفال ممكن يلجأوا للخناق عشان يظهروا نفسهم ويثبتوا شخصيتهم. هنا لازم تستغلي أوقات السلم عشان تبرزي السلوك الجيد لكل حد فيهم. شجعي الطفل وهو بيعمل شيء مفيد بكلمات جميلة وبالطريقة دي يبدأ يحاول إنه يعمل السلوكيات اللي بتقدمله التحفيز والتشجيع.
