إذا كنت من الأمهات اللي بتحلم بنهاية الوجبات السريعة من العالم فأكيد إنتِ في مشكلة كبيرة. أحلام اليقظة عندك بتخليكي تشوفي أولادك وقدامهم طبق مليان خضروات وفاكهة، ودايماً بيطلبوا منك أكل بيتي سخن، لكن في الواقع فيه طلبات مش بتنتهي من الوجبات السريعة، واعتراض دائم على أي أغذية صحية. بس هل ممكن أحلامك تتحقق؟ طبعاً. تعالي نجرب الخطوات والإرشادات الجاية مع أطفالنا.
ليه لازم تقولي لأ للوجبات السريعة بقوة؟
الوجبات السريعة أو الـ junk foods مش بس مجموعة من الوجبات الخالية من أي قيمة صحية. لكنها تعتبر من أكثر الأطعمة المسببة للكثير من المشكلات وخصوصاً للأطفال.
أهم مشكلة بتواجه الأطفال المعتمدين على النوع ده من الأطعمة هي مشكلة السمنة. وطبعاً في كثير من المشكلات الثانية زي مشاكل القلب والأوعية الدموية ومشاكل في الكلى. من هنا لازم تكوني عارفة إنك كلمة لأ المصاحبة لطلب الوجبات السريعة هي المفتاح الأساسي للحفاظ على صحة الأطفال.
في أمهات كثيرة
بتعتقد إن طالما وزن الطفل طبيعي ومش مصاب بالسمنة فمن حقه يحصل على الوجبات اللي بيحبها. لكن المشكلة لها أبعاد ثانية. زي إن الطفل بيبدأ يتعود على الأكل ده ومع الوقت هيرفض كل طعام طبيعي يتقدم له. الإصابة بالسكري في عمر مبكرة خطر بيهدد الأطفال حتى لو وزنهم قليل.
للمزيد: طعام صحي للأطفال .. إليكِ 7 خطط في منتهى الذكاء
ليه الأطفال بيحبوا الـ junk food؟
الحقيقة إن مش الأطفال وحدهم هما اللي بيحبوا الوجبات الجاهزة السريعة، إحنا كمان بنحبها جداً وإن كنا بنقاومها. هي الحقيقة الموضوع أكبر من الحب والكره الأطعمة دي مصممة خصيصاً عشان نحبها.
إيه ده مصممة؟!! يعني إيه مصممة؟ يعني الموضوع أكبر من سر الخلطة أو إن اللي بيجهز الوجبات دي نفسه حلو في الأكل. الوجبات السريعة مصممة بطريقة تقدر تحفز الجسم والعقل على مقاومة أي شيء تمنعه عنها، وممكن نشرح ده ببساطة تامة.
أولاً العقل بياكل معانا قبل الفم والمعدة، يعني لو حسينا بالشبع والامتلاء تماماً واتقدمت لنا قطعة من الحلوى أو الأيس كريم إيه اللي بيحصل؟ بنجري عليها مع إننا شبعانين. دي إسمها الشبع “الشبع الحسي النوعي”، يعني الجسم بيكون اكتفى من الغذاء لكن العقل بيوعده بمتعة جديدة ونكهة جديدة فتبدأ مراكز التذوق تشتغل وتدي للجسم إشارة تقوله مش هتقدر تقاوم.
خبراء الأغذية عارفين سيكولوجية الإنسان والعقل وبالتالي تصنيع الوجبات السريعة بيعتمد على منح متعة غير منتهية عن طريق إثارة أهم مراكز التذوق للملح والسكر والدهون. ودي العناصر اللي بيتم خلطها في الوجبات الجاهزة بنسب قادرة فعلاً إنها تحفز العقل قبل المعدة وتوعده بمتعة غير منتهية مع الأكل. ممكن نكون كبار وعندنا قدرة على المقاومة لكن دفاعات الأطفال لو ما قدرناش نخليها قوية النتيجة هتكون استجابة قوية للـ junk foods وأكل الأم هيكون حاجة مملة ومش لذيذة.
طرق تحفيز الأطفال على مقاومة الوجبات السريعة
أو بمعنى أصح إزاي نقوي دفاعات أولادنا قصاد النوعية دي من الوجبات ونخليهم قادرين فعلاً عن الابتعاد عنها أو على الأقل عدم الاستجابة لها بشكل مفرط.. نقدر نعمل ده من خلال الخطوات التالية:-
امتنعي عن الوجبات السريعة “كوني قدوة”
ما ينفعش تقولي لأولادك لأ على حاجة مضرة إنت نفسك بتعمليها. يعني لو الوجبات السريعة ممنوعة لهم فهي ممنوعة ليكي إنت كمان. لو ممنوعة في وقت الفسحة أو في الأيام العادية فلازم تكون ممنوعة في الأيام اللي انت مشغولة فيها وماعندكيش وقت تجهيز أكل طازة. اكتفي بتونة أو أي أطعمة من البيت وما تقدميش الأكل السريع على إنه اعتذار عن عدم وجود وجبة منزلية.
ابدأي من بدري
لو لسة أولادك في أول طريقهم دي هتكون فرصة كويسة جداً إنك تحطي قواعد قوية. لو الأطفال من عمر صغير جداً اتعودوا إن الخضروات والفواكه وأكل البيت هما الوجبات الأساسية اللي بتتقدم لهم هيكون من الصعب عليهم قبول التغيير مع الوقت.
جهزي الوجبات السريعة في البيت
مهما يحاولوا يحبطوكي جهزي البيتزا والبرجر في البيت وقدميهم. هيقولوا إن البيتزا بتاعة ماما مش بيتزا المطعم ما تتراجعيش. على الأقل إنت هتكوني قادرة تتحكمي في نوعية الدهون المستخدمة ونسبة السكر والملح. وفي نفس الوقت لاحظي إن معظم الوجبات السريعة بتعتمد على العجين والدهون والزيوت فحتى لو هتتعمل في البيت ما تحاوليش تخليها هي الوجبات الأكثر.
حاولي تخلي الأطفال مشغولين
الإنسان لما يكون فاضي أول حاجة بيدور عليها هي الأكل. عشان كده الأطفال لازم يكون عندهم أنشطة كثيرة خلال اليوم. تقليل وقت الفراغ هو فعلياً تقليل لكمية الوجبات السريعة أو السناكس اللي هيحاولوا يحصلوا عليها.
أم أهم نقطة في إننا نخليهم مشغولين، هي إنهم هيبعدوا عن المؤثرات الأساسية وهي الإعلانات في التلفزيون. ده غير إن الانشغال برياضة أو هدف أو حافز هيقلل كثير محاولة الحصول على الوجبات السريعة.
ما تخليهاش وسيلة مكافأة
أمهات كثير بتحاول تكافئ أطفالها من خلال التوجه لأهم محلات الوجبات السريعة. لكن دي مش مكافأة دي عادة سيئة وضرر بنقدمه لهم بإيدنا. خلي المكافأة مرتبطة بعادات إيجابية والفسحة في الأماكن الفتوحة اللي فيها لون أخضر وهواء مش دهون وأكل.
التنوع في الوجبات المنزلية
أهم حاجة ممكن تخلي الأطفال مقبلين على أكل البيت هي التنوع. يعني حاولي ما يكونش نفس الصنف متكرر. نوعي الشكل والنكهة وطريقة التحضير عشان تكسري الملل.
الأطفال شركاء في إعداد الطعام
تفتكري الطفل لو كان شريك ليكي في عملية شراء الطعام والخضروات وكان مساهم معاكي في إعدادها أكيد هيتشجع إنه ياكلها. ودي أهم وسيلة عشان تربطي عقلهم بإن الغذاء الصحي مرتبط بالحصول على المتعة.
لو قدرتي تصممي على تنفيذ الخطوات السابقة فتأكدي إنك بتحمي أولادك من أكبر خطر عصري يهددهم وهو خطر الـ junk foods أو ما يطلق عليها الوجبات السريعة. وأهم حاجة مع التصميم الاستمرار لإنه عامل أساسي لتعويدهم على غذاء صحي وله العديد من الفوائد.
اقرأي أيضا: 7 أخطاء يجب تجنبها عند تحضير اللانش بوكس
