أطرف 5 مشاهد مرت بها الأمهات في 2020
الأمهات في 2020 مروا بمواقف غريبة ما كنش حد يتوقعها. من بداية الحظر والحياة بقت مختلفة تماماً وما بقاش حد عارف إيه اللي بيحصل. وبالرغم من صعوبة الوقت ده إلا إن المواقف كانت قادرة إنها تضحكنا وتخلينا نتغلب على أيام الملل الطويل. لكن دلوقتى تعالوا نرجع فلاش باك ونفتكر سوا أهم المشاهد المضحكة في 2020.
الأمهات في 2020 ..هو إيه اللي بيحصل ده؟
تقريباً من شهر مارس والدنيا بدأت تتجه لطريق ما حدش فاهمه. شغل من البيت. إغلاق للمدارس. وقف للأنشطة. منع للزيارات والمقابلات. كل ده خلى كل أفراد الأسرة تتجمع سوا 24 ساعة. وده اللي حصل بعدها.
هو أنا مش بسيب المطبخ ليه؟
من أول ما جوزك وأولادك أقاموا المعسكر في البيت وكان سؤال هو “هو أنا مش بطلع من المطبخ ليه؟”. ببساطة لأن كل أم كان المفروض تلعب دور كل المطاعم اللي الأولاد بيحبوها. وطالما ما فيش خروج برة البيت يبقى كان لازم تتحول لشيف عالمي يلعب كل الألعاب. من أكلات لحلويات وفشار وبطاطس. لكن ده ما كنش حالك لوحدك..عزيزتي كل الأمهات في 2020 مروا بالموقف ده. اطمئني، لستِ وحدك.
أون لاين ميتنج..مالكش حق تلوم عليا
طبعاً وبعد ما بقينا كلنا بنشتغل في البيت فأكد الأون لاين ميتنج وبرنامج الزوم كانوا هما المشهد الرئيسي. لكن مش دي المشكلة، المشكلة كانت دائماً في خلفية المشهد. أولاد بتشاور في الكاميرا. أصوات بتظهر قدام المدير أو الزملاء الأفاضل. حاجات بتطير ما حدش عارف مصدرها. وهنا كان قدام كل أم خيارين، إما السيطرة على الأولاد بالطرق اللي كلنا نعرفها، لكن النتيجة إنك حتفقدي صورتك المثالية قدام الأصدقاء للأبد. أو إنك تقولي إن دي طريقة التربية الحديثة وتفقدي شغلك للأبد.. لكِ الله أيتها الأم التي عاشت هذا المشهد.
بسكويت الـ 10 دقائق
طبعاً ما فيش أم تقدر تنكر إنها كانت جزء من الجريمة العالمية الكبيرة. بسكويت العشر دقائق. تقريباً السوشيال ميديا كان كلها أمهات بتحاول تحضر الكيك أو البسكويت السريع عشان تقدر إنها تسطير على الموقف. لكن هنا المشكلة مش في عمل البسكويت، المشكلة كانت في السعرات الحرارية والوزن الزائد اللي خرجنا بيهم مع نهاية 2020.
جوزك في البيت
فاكرة أيتها الأم المصرية كام مرة طلبتي من جوزك يقعد في البيت عشانك إنت والأولاد. الحظر جه؟ جوزك قعد في البيت؟ ندمتي؟ أني أسف.
يمكن لأن الرجل بطبعه بيحب التفاصيل فوجود الأب في البيت كان معناه تدخل في كل تفصيلة. طول الوقت الآباء كان لهم أسئلة وجودية عميقة. هو الزهرية دي محطوطة هنا ليه؟. ريموت التلفزيون مش في مكانه ليه؟. هنتعشى إيه. أينعم في آباء كثير كان لهم دور رئيسي في مساعدة الأم ويكمن ده برضه كان من أغرب المواقف.
أون لاين شوبينج
عزيزتي الأم أوعي تلومي نفسك على فواتير الأون لاين شوبينج اللي جت لحد البيت. الموقف كان صعب علينا كلنا. من المعروف إن الشوبينج هو أكثر حاجة ممكن تحسن نفسية الستات. بس نعمل إيه في الكوكب اللي عمل مؤامرة علينا وخلانا مش قادرين ننزل نتسوق براحتنا. كان لازم نلاقي تعويض ماكنش ينفع نشوف حاجات كثير من غير ما نسأل ونقول “How much”..العام مش مصدق إنك التحكم في الموضوع ده صعب وقاسي. لكن كل أمنياتنا إن مع بداية 2021 ما ندخلش في حالة من الحظر تاني، عشان ما ندفعش في الأون لاين شوبينج تاني.
ودي كانت أغرب وأطرف 5 مواقف مرت بيها معظم الأمهات في 2020. بالرغم إن السنة كانت صعبة على الكل. لكن كل أم أدت دورها بكل قوة عشان تحمي ولادها من الخطر. وكل أم حاولت إنها تخبي مخاوفها عشان تقدر تكمل وتعدي وإن شاء الله الأمهات كلهم هيعدوا ويحموا أولادهم في الأيام الجاية.
للمزيد: فيروس كورونا شريك بداية السنة الجديدة،فكيف نحمي أبنائنا؟
