إنت مين من أمهات الدراما المصرية؟
كل أم في الدنيا لها شخصية مختلفة. صعب جداً نلاقي كل الأمهات مشتركين في طريقة التفكير أو التصرف تجاه أولادهم. أما أمهات الدراما المصرية فهم أكبر دليل على أن حب الأم ممكن يظهر في شخصيات مختلفة وبطرق جميلة ومضحكة جداً. لكن هتفضل الحاجة المشتركة بين كل الأمهات هي الحب. لكن بيعبروا عنه إزاي؟ ده بقى كل واحدة وشخصياتها. يا ترى بقى إنت مين من الشخصيات دي؟
أمهات الدراما المصرية..إنت مين فيهم؟
شخصية الأم طول عمرها شخصية أساسية في الأعمال الدرامية والسينما. هي محرك الأحداث وهي برضه اللي ممكن تحول القصة تماماً. وما بين الكوميديا والدراما في أمهات كثيرة تشبهنا. على سبيل المثال:-
أمينة رزق “الدراما كوين”
قومي قدام المرايا واسألي نفسك هل أنا أمينة رزق في نفسي؟. لو انت هي. لذلك هتكوني سيدة الدراما على وجه الكوكب. دمعتك قريبة في الحزن والفرح. بتضحي بكل حاجة في سبيل سعادة أولادك. حنينة وحنيتك تتوزع على المجرة كلها وهيتفضل منها كثير. إنتِ مش حنينة على ولادك بس لأ، على ولاد الجيران والعيلة والصحاب وحتى على القطط اللي في الشارع. ممكن تكوني بتخافي كثير وميالة للحزن بس يا بخت كل اللي تحبيه.
منى “إمبراطورية ميم”
مهما كان عدد ولادك فماحدش يقدر يقول عليك مش مسيطرة. يعملوا مهما يعملوا بس هتفضلي إنت أكثر حد بيتعملوا حساب وبيتحب في البيت. لكن أهم حاجة إن المسؤولية والشغل ما أخدوش حاجة من جمالك وأنوثتك. كذلك سنك ما يبانش عليكي لإن الشباب جواكي هيفضل لأخر يوم في عمرك. تقدري تكوني أم وصديقة وحبيبة وامرأة عاملة قوية وحنونة في نفس الوقت. ما فيش دور بتعمليه بياخد من الدور الثاني..إنت عظيمة.
ماما نونا “كريمة مختار”
ماما نونا أجمل حد ممكن يدلع الولاد. أغاني تغني كلام حلو تقول حنية وطيبة مافيش بعد كده. تقدري تكوني مؤثرة في كل اللي حواليكي بشخصيتك الطيبة والذكريات والحنية للكل. بس حاسبي من الدلع الزيادة.
دلال عبد العزيز هي أمهات الدراما المصرية كلها
مين فينا مش بتشوف نفسها في كل أدوار الأم اللي قامت بها الفنانة دلال عبد العزيز. الأم الجدعة جداً والحنينة جداً بس ما يمنعش إنها طول النهار بتزعق وتشتكي. عندها إحساس إنها بتواجه الطوفان لوحدها وإن كلنا أشرار. لكن وقت الحنية مافيش أحن منها. ووقت الزعل برضه هتجيب مواقف حصلت من قبل وجود آدم على الأرض وتقول إنها مزعلاها.
أم حميدة سيدة البحار
صاحبة الشخصية القوية. تحب تدي البرستيج لكل الناس وتاخده منهم تاني. كلمتها بتعرف تتنفذ فين وإزاي وإمتى. هي مش متحكمة هي حكيمة وبتحب أولادها وبتفكر فيهم طول الوقت. كذلك خططتها عمرها ما بتفشل وفي النهاية بتوصل للي هي عايزاه.
لبلبة في فيلم “وش إجرام”
دي الأم اللي لو قلت لها هقولك سر تقولك في بير. بس البير عندها مفتوح حبيتين وتلاقي كل العيلة عرفت وفي الآخر هي بريئة وما عملتش حاجة. دي الأم اللي بتحط السبانخ لولادها وهي متأكدة إنهم مش بياكلوها. بس دي الأم بتاعة المواقف الحرجة اللي تحميك بعنيها وتطبطب عليك وقت الزعل.
عبلة كامل “اللمبي”
دي الأم اللي طول النهار بتحاول تحول أهداف ولادها ومشاريعهم لكل الحاجات اللي هي مؤمنة بيها. هي اللي بتقول إيه الكلية اللي تنفع أو ما تنفعش. بتفهم في البيزنس كويس وبتعرف تعمل دراسات جدوى. بس لو فشلت تبقى أنت السبب. هي اللي بتسعى عشان تساعد أولادها في سكتهم وهي اللي كل المواقف معاها تضحك حتى وقت الجد. سندك الوحيد في كل المواقف ووقفتها ما تقدرش بتمن.
مهما كنت دراما كوين أو تحبي الضحك بتزعقي أو بتعزي الفرفشة. هتفضلي بقلبك الحلو أهم حد في الدنيا لولادك. أما الذكريات والحنية وكل حاجة حلوة بنتيها فيهم فدي هتفضل أحلى من أي قصة اتعملت في السينما. لذلك إنت أهم بطلة في تاريخ الحياة كلها.
اقرأي أيضا: التربية الإيجابية تبدأ بالتوقف عن قول هذه الجمل.
