فن شراء المايوه .. الموضوع طلع مش سهل

بما إن الصيف جه والمصايف بدأت تفتح والفترة اللي فاتت كلنا اتحبسنا بدرجة كبيرة، فكان لازم ندور على طريقة للخروج، والخروج يعني بحر، والبحر يعني مايوه، أي مايوه سواء كان بكيني أو بوركيني أو عادي، سواء كنا هنلبسه في شاطئ مفتوح أو حمام سباحة أو مكان مخصص للبنات فقط..في النهاية القطعة دي لها تأثير سحري، أولاً لأن أي بنت في الدنيا بتحب إنها تظهر بشكل حلو في كل مكان، فما بالنا على البحر، كل واحدة فينا بتتخيل إنها عروسة البحر وده وقت رجوعها ليه، ثانياً المَايوه لو ما كنش مصنوع من قماش مريح هيفضل طول اليوم يضايق الجسم وطبعاً مش حتبقى الفسحة ليها طعم..طب إيه الحاجات اللي نفكر فيها واحنا بنشتري المَايوه؟ ياللا بينا نعرف.

قواعد شراء المايوهات بشكل عام؟

فيه كام قاعدة كده لازم تعرفيهم وانت بتشتري المَايوه، أو بمعنى مواصفات عالمية خاصة بلبس السباحة سواء في البحر أو البسين ومنها:-

• لازم المَايوه يكون مقاوم للكلور وده لو كان مخصص لحمامات السباحة.
• مقاوم للشمس، وفي أنواع كثير بتنشر درجة مقاومة الخامة للشمس، ومن المهم إن درجة المقاومة ما لا تكن أقل من 50.
• من المهم أن يكون المايوه من الأنواع اللي بتجف بسرعة ويكون قابل للتمدد “سترتش”.
• لو المَايوه طويل فمن المهم إن أطرافه تكون مبطنة علشان ما تسببش أي احتكاك مع الجسم.
• من المفضل لو المَايوه بيحتوي على سوستة إنها تكون مصنوعة من مادة غير معدنية وتكون خفية أو من الداخل.

دي حاجات مهمة لازم تركزي فيها عند شراء مَايوه..نيجي بقى للأهم.

إزاي تختاري المايوه الصح؟

في شوية نصايح مهمة لما تيجي تختاري المايوه المناسب ليكي ومنها:-

• اختاري المَايوه اللي سعره غالي، الخامة الرخيصة أولا ممكن تسبب مشاكل للجلد، وحيكون معرض للقطع كمان، ومش حيكون واقي من الشمس، وفي النهاية حيفضل عايش معاكي لأكثر من موسم خصوصاً لو مايوه بوركيني، ده غير إن أسعار المايوهات بترتفع كل سنة ومن الأفضل أنه يكون عندك واحد من براند مناسب ومعروف.
• اختاري المَايوه المناسب لجسمك، في اللون والشكل، ساعات الموضة بتنزل أشكال وألوان حلوة، لكن موضة المَايوه بتنتهي بسرعة، ولو هتجيبي مايوه غالي هاتي الشكل اللي يعيش معاكي ومع طبيعية جسمك لفترة أطول خاصة لو كنت أم.
• اختاري اللون الأغمق، لأن الألوان الغامقة بتليق على معظم الأجسام وبتداري عيوب كثير.
• لو اختيارك هو المايوه البوركيني فمن الأفضل إنك تشتريه كامل لأن ده حيسهل عليكي كتير، ما تحاوليش تجمعي القطع لأنها حتكون غير عملية بالمرة، وابعدي عن الأنواع اللي فيها أكثر من قطعتين، واللون الأسود المخطط بخطين أفضل من اختيار النوع المزخرف وملون بألوان كثير.
• لو جسمك رفيع ممكن تختاري المايوه المنقوش، لكن لو في أماكن فيها امتلاء فالأفضل المايوه السادة أو المخطط بالطول لأن ده بيدي الجسم شكل انسيابي.
• لازم تتأكدي إن الخامة خفيفة وإنها مش شفافة.
• لما تشتري المايوه قيسيه على الطبيعية وجربي حركة السباحة عشان تتأكدي أنه حيكون مريح في الحركة.

إيه هو المايوه المناسب لشكل الجسم؟

كل جسم وله طبيعة خاصة عشان كده من المهم إننا نختار المَايوه اللي يقدر يكون متناسق مع شكل جسمنا، مثل الجسم اللي له شكل الكمثرى أفضل مايوه ليه هو اللي عليه “جيبونة” قصيرة، لو كان الجسم واخد الشكل التفاحي يعني مليان من الأرداف والصدر فده مناسب لارتداء البكيني.

مواضيع متعلقة: من البكيني إلى البوركيني… كيف بدأ المايوه وما هي الموضات المختلفة له؟