الطفل الانتقائي،بيرفض معظم الوجبات وبياكل قليل.إيه الحل؟

في أي بيت في نوع من الأطفال بنقول عليه الطفل الانتقائي. النوع ده من الأطفال لا يمكن يقتنع إلا بأنواع معينة من الأكل. ولو حاولت تقديم أنواع مختلفة أو جديدة بيبدأ في رفضه تماماً. وده من أكثر الحاجات المزعجة للأم. لذلك محتاجين نعرف إيه هي الطريقة الصحيحة للتعامل مع النوع ده من الأطفال. 

الطفل الانتقائي والأكل الصحي

قبل ما نعرف إيه هي الطرق اللي نساعد بيها الطفل الانتقائي على تجربة أنواع مختلفة من الوجبات، من المهم إن كل أم تتحلى بالهدوء التام. كمان لازم تعرف إن مهما كان أكل الطفل انتقائي إلا إنهم مش هيسمحوا لنفسهم بالجوع أبداً. لذلك حاولي دائماً أنك تخلي كل البدائل المختلفة صحية. ممكن يكون الخوف الرئيسي لأي أم إن طفلها يكون بيحصل على أقل كمية من العناصر الغذائية. لكن في نفس الوقت ما ينفعش نجبر الأطفال على أكل معين. وزي ما قلنا إن التجربة والإصرار وكثرة المحاولات لها دور كبير في تغيير الوضع.

هل انتقاء الأطعمة له علاقة بالتوحد؟

إذا كان الطفل بيميل لتناول أطعمة محددة وبيرفض بشكل قاطع تناول الأطعمة المختلفة. فده مش علامة على التوحد. لكن في نفس الوقت معظم الأطفال المصابين بالمشكلة دي بيواجهوا مشكلات كثيرة مع التغذية، وبيكون من الصعب تغيير عاداتهم الغذائية. عشان كد من المهم مراجعة الحالة مع الطبيب لمعرفة إيه هي أفضل الطرق اللي تساعد على تغذية الطفل بشكل صحي.

الخبر السار بالنسبة للطفل الانتقائي

من أفضل الحاجات اللي نقدر نقولها إن الأطفال مع تقدم السن بيقدروا يطوروا العادات الغذائية الخاصة بهم. يعني لو النهاردة بيرفض تناول الخضروات ممكن بعد فترة يكون متقبل لكل أصنافها. الفكرة بتعتمد على محاولات الأم المستمرة. وعلى عدم الاستسلام وتقديم الأطعمة السريعة والأسهل للأطفال.

طرق تقديم الأكل للطفل الانتقائي

في مجموعة مهمة من الطرق أو ممكن نقول عليها خطط مهمتها إنها تبدأ تقنعه بالتنوع لكن بشكل تدريجي. وخلينا نركز على إن إجبار الطفل على نوع معين من الطعام هو أهم سبب لكراهيته له. لذلك تعالوا نحاول تطبيق الخطوات الجاية.

تقديم كميات معقولة من الوجبات

معدة الطفل مش أكبر من حجم قبضة اليد. ومن هنا لازم كل أم تفكر قبل تقديم وجبة كبيرة. الوجبات الكبيرة ممكن توصل لنقطتين. أولها إن الطفل يصاب بالشراهة للطعام وده أول سلم للإصابة بالسمنة. أو إن الطفل يكره الأكل ويبدأ في الحصول على أنواع أقل. عشان كده لازم حجم الوجبة يكون صغير. ونتنازل عن مبدأ إن الطبق لازم يخلص. طفلك أول ما يشعر بالجوع هيدور على الأكل فوراً.

لا بديل غير الأكل الصحي

طيب إذا قمنا بتقديم نوع معين من الوجبات ولاقينا رد فعل سلبي من الطفل ورفض تام ليها، إيه الحل؟ للأسف معظم الأمهات هتختار الحل الأسهل. تحضير وجبة سريعة زي البيتزا أو البرجر أو البطاطس المحمرة وفي مجموعة من الأمهات بتطلب الوجبات الجاهزة. لكن ده مش الحل مطلقاً. الحل هو تقديم بديل صحي. بدل البروكلي ممكن نقدم بطاطس مسلوقة بالبهارات. ممكن نقدم الجزر والفاكهة. ممكن نقدم العصائر الخالية من السكر والمواد الحافظة. أو الزبادي والشوفان. في بدائل طبيعية مهمة وممكن تتقدم في شكل سناكس بين الوجبات. لكن في النهاية هي بتدي الطفل العناصر الغذائية اللي بيحتاجها على عكس الوجبات السريعة.

عدم تقديم الرشاوي مطلقاً

حاولي على قدر الإمكان عدم تقديم الأطعمة كنوع من الرشاوي. بمعنى إننا ما ينفعش نطلب من الطفل إنه يخلص البيض واللبن عشان ياخد البيتزا. أو إنه لو تناول الخضروات العشاء هيكون بطاطس وبرجر. افتكري دايماً إننا بنساعد الطفل على التعلق بالأكل الصحي مش بنحاول إننا نأكله وبس.

للمزيد: طعام صحي للأطفال .. إليكِ 7 خطط في منتهى الذكاء

استخدام البهارات

دايماً بننسى إن البهارات بتعلب دور كبير في إضفاء نكهة مختلفة على الطعام. والبهارات ما لهاش تأثير سلبي على صحة الطفل إذا تم استخدامها بمعدل معتدل. عشان كده حاولي إضافة البهارات لإغراء الأطفال بتناول طعام شهي.

تقديم الطعام بشكل مختلف

دي خطوة ممكن تكون متعبة. لكن ده قدر أي أم. الأطفال بينجذبوا للوجبات اللي لها شكل مختلف. حاولي تدمجي الألوان والأشكال مع بعض. أو تتابعي مجموعة من الصور لتزيين طعام الأطفال وتحاولي تنفذيها. الخطوة دي مشجعة جداً للأطفال. كذلك اختيار أدوات الطعام للأطفال له عامل كبير في تشجيعهم.

تعميم التجربة على الأسرة

محاولة وجود صنف واحد من الطعام على مائدة الأسرة بيساعد بشكل كبير الأطفال على إنهم يتعودوا على نمط الطعام ده. ومش بيدوروا على بديل. أما إذا رفض الطفل تماماً نوع الطعام ممكن تضمي للمائدة نوع تاني يكون صحي ومقبول في نفس الوقت. النمط اللي الأسرة بتنفذه في الطعام مع الوقت بيكون هو النمط اللي الطفل هيتعود عليه.