رسالة من The baby garage مع نهاية 2020
وأخيراً مرت سنة بكل ما فيها وكل أمالنا إن بابا نويل في آخر اليوم يعدي على بيوتنا واحد واحد ويهديه حلمه أو أمنيته. وسواء كان سانتا كلوز حقيقة أو خيال إحنا حلمنا لكل قراء The baby garage ولكل العالم أن 2021 تجيب معاها السعادة، وتعوضنا عن السنة الصعبة اللي مرينا بيها. وقبل ما السنة تعدي عايزين نقولكم حاجات كثير.
The baby garage magazine بداية
أحلى ما مر علينا كفريق عمل في 2020 إننا بدأنا The baby garage magazine. كنا محتاجين نكون ركن أساسي في حياة كل أم. نمشي معاها الرحلة من الأول للآخر. نشاور لها على المعلومة اللي تساعدها من أول لحظة تلمس فيها البيبي.
كان هدفنا إننا نكون مرجع ودليل للأمهات. معتمدين على مصادر موثوقة وآراء الأطباء وخبراء التربية. يعني حاولنا نكون بابا نويل لكل أم. لكن كنا بابا نويل بيجي الصبح عشان يقف مع كل الأمهات ويساعدها تستوعب كل تغيير بيحصل لإبنها وازاي تقدر تتعامل معاه.
وخلال مشوارنا مع الأمهات اكتشفنا إن كل تفصيلة جواها تفاصيل كثيرة جواها تفاصيل أكثر. مثلاً لو اتكلمنا عن الرضاعة، إحنا مش بنتكلم بس عن عملية طبيعية لتغذية الطفل. الرضاعة يعني اختيار ورحلة يترتب عليها تغيير في نمط حياة الأم وتغذيتها. يعني سهر ووجع وآثار جانبية وأسئلة كثيرة حاولنا نجاوب عليها.
ونقيس على كده كل تفصيلة في التربية. تغذية الطفل في المراحل المختلفة. إزي نعرف أنه مبسوط أو زعلان؟ طب نفسر عياطه بإيه؟ طب حالته النفسية..إزاي نساعده يكون إنسان سوي ونشيط؟ دي أسئلة كل أم اللي حاولنا نجاوب عليها على مدى رحلتنا في 2020.
مش بس كده. كان هدفنا برضه إننا نساعد الأمهات في تحديد طريقة أي منتج خاص بيها أو بالأطفال. حرصنا إننا نقدم مجموعة من الإرشادات المهمة عن إزاي تشتري أفضل منتج وكمان تشتريه منين.
وقبل ما تخلص 2020 أمنيتنا هي إننا نكون قدرنا فعلاً نحقق هدفنا بإننا نكون مرجع مهم لكل الأمهات في كل حاجة تحتاجها في رحلة الأمومة الجميلة. ونوعدكم بالمزيد في 2021 عشان معاكم الرحلة دائماً تستحق إننا نقدم الأفضل.
